بەرزبوونەوەی ژمارەی قوربانیانی هێرشە موشەکییەکان بۆسەر پێگه‌ سەربازی و دیپلۆماتییەکان لە عێراق بووەتە هۆی ئەوەی زۆر له‌ عێراقییه‌كان میلیشیاکانی سەربە ئێران تۆمەتباربکەن بە رێکخستنی هێرشەکان بۆ پەراوێزخستنی وڵاتەکەیان.

شارەزایه‌كی بواری سەربازی و لیوای خانەنشینکراو، جەلیل خەلەف شوێلی، وتی ئەنجامدەرانی ئەو هێرشە موشەکییە "ترسنۆکانە" هیچ نیشتمانپەروەری و دڵسۆزییه‌كیان بۆ وڵاتەکەیان نییە.

بە دیارونای وت هێرشە موشەکییە کاتیوشاکان پێگه‌ مەدەنییه‌كان و ئه‌و بنکە سەربازیانه‌ی عێراق دەکەنە ئامانج، کە راوێژکاران و راهێنەرانی هاوپەیمانی نێودەوڵەتییان لێیه‌.

لە دەستپێکی ئەمساڵەوە، دەیان هێرشی موشەکی فڕۆکەخانەی نێودەوڵەتی بەغدا، ناوچەی سەوز لە ناوەندی بەغدا و بنکە سەربازییەکانی تاجی، بەلەد، بەسمایە و سپایکەریان کردۆتە ئامانج.

بەگوێرەی راپۆرتە میدیاییەکان، بەمدواییانە چەندین تەقەمەنی دەستکرد لەسەر رێگا سەرەکییەکانی باشوری عێراق ئەو بارهەڵگرانەیان کردۆتە ئامانج کە کەلوپەل و پێداویستی بۆ هاوپەیمانی نێودەڵەتی دەگوێزنەوە.

زیانگەیاند بە وێنەی عێراق

شوەیل میلیشیاكانی سەربە ئێرانی تۆمەتبارکرد بە رێکخستنی ئەو هێرشانە "بۆ زیانگەیاند بە عێراق، پێشێلکردنی سەروەرییەکەی و پیشاندانی بە هەموو جیهان کە وڵاتەکە هیچ ئەمنیەتێکی نییە و یاسا تێیدا سەروەر نییە".

وتی لەڕێی ئەو کردەوانەوە، دەیانەوێت "[عێراق] پەراوێزبخەن لە تەواوی ناوچەکە و هاوبەشە نێودەوڵەتییەکانی".

وتیشی رژێمی ئێران ئامانجێتی "عێراق وێرانبکات و بیخاتە نێو بازنەی پشێوی و بارگرژییه‌وه‌ لەپێناو سوودبینین لە سەروەت و سەرچاوە ئابورییەکانی تا بەتەواوی دەستبگرێت بەسەر پرۆسەی بڕیاردانیدا".

هه‌روه‌ها وتی سەرکردەکانی ئێران نایانەوێت عێراق هەڵبستێتەوە و هێزی خۆی بەدەستبهێنێتەوە، هەر لەبەر ئەوەشە کە بەردەوامن لە بەکرێگرتنی ئەو لایەنانەی لایەنگریانن و چەک و پارەیان بۆ دابیندەکەن.

شوەیل جەختیشیکردەوە له‌وه‌ی عێراقییەکان پێویستە رووبەڕووی ئەو لایەنانە بوەستنەوە و رێوشوێنی بەرلێگرتنیش بگرنەبەر بۆ رێگریگرتن لە چالاکییە وێرانکارەکانیان و وڵاتەکەیان بپارێزن.

شوەیل وتی: "داوا لە حکومەت دەکەم رووبەڕووی ئەو لەیاسادەرچوانە ببێتەوه‌ و ئەندامانی ئەرکە دیپلۆماسییەکان بپارێزێت لەکاتێکدا ئەوانه‌ میوانی وڵاتەکەمانن" و ئاماژەیکرد بۆ ئەوەش کە هاوپەیمانی [نێوده‌وڵه‌تی] پشتیوانی و راهێنان پێشکەشی سەربازانی عێراق دەکات لە شەڕی دژ بە تیرۆریزم و هاوکاریده‌كات لە هەڵمەتەکانی بونیادنانەوەدا.

چەند کاتژمێرێک دوای ئەوەی سەرەکوەزیران مستەفا کازمی لە 18 ئاب بە سەردانێکی فەرمی بەرەو ئەمریکا کەوتەڕێ، موشەکێکی کاتیوشا لە نزیک فڕۆکەخانەی نێودەوڵەتی بەغدا -- کە نزیکی بنکەیەکی سەربازییە کە سەربازانی هاوپەیمانی لێینیشتەجێن -- بەبی ئەوەی هیچ قوربانییەکی لێبکەوێتەوە.

دوو رۆژ پێشتر، موشەکێک لە ناوچەی سەوز کەوتە خوارەوە بەبێ ئەوەی هیچ قوربانییەکی لێبکەوێتەوە، لەکاتێکدا هێزە ئەمنییەکان دوو موشەکی دیکەیان پوچەڵکردەوە کە بۆ هاویشتن ئامادەکرابوون.

کەمکردنەوەی کاریگەریی ئێران

شارەزایه‌كی عێراقی بواری ستراتیژی و شرۆڤەکاری سیاسی، عەلا نەشوع بە دیارونای وت ئێران میلیشیا لایەنگرەکانی لە عێراق بەکاردەهێنێت -- كه‌ کۆی گشتی 73 گروپی میلیشیان -- وەک کەرەستەیەک بۆ فشارخستنە سەر کۆمەڵگەی نێودەوڵەتی و ئەمریکا.

وتی سوپای پاسدارانی شۆڕشی ئیسلامی ئێران هێرشە موشەکییەکان رێکدەخات "تاوەکو عێراق وەک مەیدانی رووبەڕووبوونەوە لەگەڵ جیهان بەکاربهێنێت و پەیامێکی رەتکردنەوە لەدژی سزا ئابورییەکانیش بنێرێت".

وتیشی لەئەنجامدا، ناڕەزایەتی عێراقییەکان زیاتر و زیاتر دەبێت سەربارەت بە ده‌ستێوه‌ردانه‌كانی ئێران لە وڵاتەکەیاندا و هەوڵی رژێمەکە بۆ پێشێلکردنی سەروەریی عێراق.

رۆژنامەوان و شرۆڤەکاری سیاسی عێراقی، زیاد شەنگالی پشتیوانیی لەم تێڕوانینە کرد و ئاماژەیکرد بۆ ئەوەش کە رژێمی ئێران تەنیا "زمانی خوێن و وێرانکاری دەزانێت و دوودڵنییە لە ئەنجامدانی کردەوەی بێویژدانانە بۆ بەردەوامیدان بە کاریگەریی خۆی و له‌ناوبردنی رکابەرەکانی".

وتی ئەمە ئاشكرایه‌ له‌و دواهەمین شەپۆله‌ی تیرۆرکردنەکان کە چالاکوانانی عێراق لە پارێزگای بەسرە دەکەنە ئامانج، کە زۆر كه‌س بەرپرسیارێتی ئەنجامدانیان دەخه‌نه‌ ئەستۆی میلیشیاکانی سەربە ئێران.