تێرۆریزم

5 منداڵ و 2 ژن کوژران لە هێرشێکی موشەكدا بۆسەر فڕۆکەخانەی بەغدا

فارس عومران و ئاژانسی فرانس پرێس

image

پیاوانی عێراقی لەسەر کفنی ئەندامانی خێزانێك پرسە دەگێڕن کە رۆژێك پێشتر کوژران کاتێك موشەکێك لە ماڵەکەیانی دا نزیك بە فڕۆکەخانەی بەغدا، لەکاتی پرسەکەیاندا لە گوندی ئەلبو شەعبان لە ناوچەی رەزوانیەی کەناری پایتەخت، لە 29 ئەیلول. [ئەحمەد روبەیعی/ئاژانسی فرانس پرێس]

سێ منداڵی عێراقی و دوو ژن لە هەمان خێزان ئێوارەی دووشەممە (28 ئەیلول) کوژران کاتێك موشەکێك کە فڕۆکەخانەی بەغدای کردبووە ئامانج، کە هێزە ئەمریکیەکانی لێیە، لەجیاتی ئەوە کەوتە ماڵه‌كه‌یانه‌وه‌، سوپای عێراق رایگەیاند.

دوو منداڵی دیکە بە سەختی لە هێرشەکەدا برینداربوون و دواتر بەهۆی برینەکانیانەوە لە نەخۆشخانە مردن.

سوپا رایگەیاند كه‌ موشەکەکە لە گەڕەکی جیهادەوە لە خۆرئاوای پایتەخت هاوێژراوه‌.

ئەمە دواترین بوو لە زنجیرەیەك هێرش کە بەرژەوەندیەکانی ئەمریکا لە عێراق دەکەنە ئامانج و زیاتر میلیشیاکانی سەربە ئێرانیان پێ تۆمەتباردەکرێت کە لە وڵاتەكه‌دا چالاكن.

image

عێراقیەکان ماڵێك پاکدەکەنەوە کە رۆژی پێشتر بە موشەکێك زیانی پێگەیەندرا نزیك فڕۆکەخانەی بەغدا، لە کەناری پایتەختی عێراق، لە 29 ئەیلول. پێنج منداڵ و دوو ژن لە هەمان خێزان لەو هێرشەدا کوژران، کە زیاتر میلیشیاکانی سەربە ئێرانی پێ تۆمەتباردەکرێت. [ئەحمەد روبەیعی/ئاژانسی فرانس پرێس]

image

هێزەکانی عێراق ده‌ستیانگرت به‌سه‌ر کاتیوشایه‌كدا کە ئامادەی هاویشتن بوو لە باکوری بەغدا، لە 5 تەمموز. [خاوەنی وێنە: شانەی میدیای ئەمنی]

ئەمریکا هەڕەشەی داخستنی باڵیۆزخانەکەی کردووە لە بەغدا گەر موشەکەکان نەوەستن.

سوپا "باندە تاوانکارییەکان و گروپە نایاساییەکان"ی تۆمەتبارکرد بە هەوڵدان بۆ "دروستکردنی پشێوی و تۆقاندنی خەڵك".

لەنێوان تشرینی یەکەم و تەمموزدا، لانیکەم 39 هێرشی موشەکی بەرژەوەندیەکانی ئەمریکایان لە عێراق کردۆتە ئامانج. له‌وكاته‌وه‌ش نزیکەی هەمان ژماره‌ روویداوەتەوە.

کۆی گشتی، چوار سەرباز -- دوو بەریتانی و عێراقیەك و ئەمریکیەك -- لەگەڵ گرێبەستکارێکی ئەمریکی و عێراقی لەم هێرشانەدا کوژراون، لەکاتێکدا چەندین مەدەنی برینداربوون.

ئەو ئه‌كاونتانه‌ی تویتەر کە پشتیوانی ئێرانن بەشێوەیەکی ئاسایی دەستخۆشی لە هێرشەکان دەکەن، بەڵام دووشەممە بەوشێوەیە نەبوو، کاتێك هیچ گروپێك دەستبەجێ بەرپرسیارێتی لە ئەستۆ نەگرت.

پێنج شه‌ش لایەنی پێشتر نەناسراو بەپرسیارێتی هێرشی لەوشێوەیەیان لە چەند مانگی رابردوودا گرتۆتە ئەستۆ، لەژێر ئاڵای "بەرەنگاری ئیسلامی"دا.

بەڵام پسپۆڕان دەڵێن ئەوانه‌ تەنیا رووکه‌شن و ئەندامانی پێشووی میلیشیاكانی سەربە ئێرانیان تێدایە كه‌ به‌شێكن لە هێزەکانی حەشدی شەعبی، کە تۆڕێکی سەربە دەوڵەتی نزیك بە تارانە.

عێراقیەکان سەرکۆنەی هێرشەکە دەکەن

ئەو ڤیدیۆ و وێنانەی لەسەر ئینتەرنێت بڵاوکراونەتەوە ماڵە رووخاوەکە و پەڵەی خوێن نیشاندەدەن. ئەندامێکی خێزانێك نیشاندەدەن کە دەڵێت یەکەمجار نییە موشەکێك کە بۆ فڕۆکەخانە هەڵبدرێت نزیك بە ماڵەکەیان دەکەوێته‌وه‌.

شەپۆلێك توڕەیی و سەرکۆنەکردن دوای هێرشەکە لە شەقامی عێراقیدا بڵاوبووه‌وە.

دانیشتوویه‌كی گەڕەکی دۆرەی بەغدا، ویسام عوبه‌یدی، کە داوایکرد ناوی ساختەی بۆ به‌كاربهێنرێت، وتی: "ئەمە نابێت بەبێ بەرپرسیارێتی راگرتن بەسەربچێت... ئەمە تاوانێکی گەورەیە کە ژیانی ژنان و منداڵانی بێتاوانی تێدا لەدەستچووە. چ هەڵەیەکیان کردووە کە بەمجۆرە بکوژرێن؟"

بە دیارونای وت: "چیتر هەست بە سەلامەتی ناکەین، تەنانەت لە ماڵەکانی خۆماندا، لەبەر کارەکانی ئەم گروپە نایاساییانە."

لەکاتێکدا هێرشە موشەکیەکانی پیشتر بوونەتە هۆی قوربانی و زیانی ماددی بۆ ماڵی هاوڵاتیان، رووداوەکەی دووشەممە خوێناویترین بوو.

حه‌یده‌ر، دانیشتوویەکی گەڕەکی فورات نزیك بە فڕۆکەخانەی بەغدا، کە تەنیا ناوی یەکەمی خۆی دا وتی: "لە مۆتەکەدا دەژیین بەهۆی بۆمبارانی بەردەوامی فڕۆکەخانەکەوە."

بە دیارونای وت حکومەت دەبێت دەستێوەردان بکات بۆ "رێگرتن لە کوشتاری نوێ بەدەستی ئەم باندە تاوانکارییانە".

'دەبێت لێکۆڵینەوەکان ئەنجامیان هەبێت'

لە بەیاننامەیەکی دووشەممەدا، سوپا رایگەیاند كه‌ سەرەکوەزیران مستەفا کازمی فەرمانیداوه‌ بە لێکۆڵینەوەی دەستبەجێ بۆ رووداوەکە و بۆ شوێنپێهەڵگرتنی ئەنجامدەرانی "بەبێ ره‌چاوكردنی هاوسۆزی و پەیوەندی سیاسییان، تا سزای تووندیان بدرێت".

راشیگەیاند کازمی فەرمانی دەستگیرکردنی ئەندامانی ئەو هێزە ئەمنیەی داوه‌ کە بەرپرس بوون لە چاودێریکردنی ئەو ناوچەیەی موشەکەکەی لێوە هەڵدرابوو بەرامبەر "شکستهێنان"یان لە ئەنجامدانی ئەرکەکانیان.

داوای لە دەزگا ئەمنیەکانیش کرد کە هەوڵە هەواڵگرییەکانیان برەوپێبدەن بۆ "بەرگرتن بەم تاوانانە و تۆقاندنی هاوڵاتیان".

ئەندامێکی لیژنەی ئەمنی له‌ پەرلەمان، کاتع نەجمان ریکابی وتی لێکۆڵینەوەکان دەبێت ببنە هۆی دەستگیرکردنی خێرای ئەنجامدەرانی تاوانەکە.

بە دیارونای وت: "چەندجار وتوومانە کە دەسەڵاتداران دەبێت یاسا جێبەجێبکەن و هاوڵاتیان بپارێزن و دەزگا دەوڵەتیەکان لە چەکی کۆنترۆڵنەکراو بپارێزن."

وتیشی دەبێت پەرە بە ئۆپەراسیۆنە بەرپێگرەکان بدەن لەو ناوچانەی موشەکەکانیان لێهەڵدەدرێت تا "رێگری لە هێرشەکانی داهاتوو بکەن لەلایەن ئەو کەسانەوه‌ کە تاکتیکه‌كانی لێدە و راکە و شەڕی گەریلایی بەکاردەهێنن".

ریکابی داوای لە حکومەت کرد خێرا "ئەنجامی لێکۆڵینەوەکە دەربخات دەربارەی کوشتنی ئەو خێزانە" و هەموو لێکۆڵینەوەکان دەربارەی دزەکردنە ئەمنی و تیرۆرکارییەکانی رابردووش.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500