ئاساییش

عێراق به‌ڵێنده‌دات ئەو کەسانە سزابدات کە هێرشیانکردۆتە سەر نزیک فڕۆکەخانەی بەغدا

فارس عومران

image

حکومەتی عێراق له‌ 16 حوزەیران کۆبوونەوەیەکی بەپەلەی ئه‌نجامدا دوای ئەوەی بەیاننامەیەکی دەرکرد کە تێیدا سەرکۆنەی هێرشەکانی كرد بۆسەر پێگە سەربازییه‌كان و دیپلۆماتکارانی بیانی لە وڵاتەکەدا. [خاوەنی وێنە: نوسینگەی سەره‌کوەزیران]

حکومەتی عێراق سێشەممە (16 حوزەیران) فەرمانیکرد بە ئاژانسە ئەمنییەکان بۆ دۆزینەوە و دەستگیرکردنی ئەوانەی بەرپرسیارن لەو هێرشانەی كراونه‌ته‌‌ سەر فڕۆکەخانەکان و پێگە سەربازییەکان و بنكه‌كانی دیپلۆماتکارانی بیانی لە وڵاتەکەدا.

سێ موشەکی کاتیوشا شەوی دووشەممە نزیک فڕۆکەخانەی بەغدایان کردە ئامانج بەبێئەوەی هیچ زیانێکیان لێبکەوێتەوە، كه‌ چوارەمین هێرش بوو تەنیا لە ماوەی زیاتر له‌ یەک هەفتەدا.

ئەو موشەکانە ناوەندی پشتیوانیی دیپلۆماسییان کردە ئامانج لە بەغدا، کە شوێنی بەرپرسانی هاوپەیمانی نێودەوڵەتییه‌.

بەشداربووانی کۆبوونەوە بەپەلەکەی ئەنجومەنی ئاسایشی نیشتمانی کە سێشەممە لەلایەن سەره‌کوەزیرانه‌وه‌، مستەفا کازمی، سەرپەرشتیکرا، سەرکۆنەی هێرشەکانیان کرد و له‌قه‌ڵه‌میاندان به‌ "مەترسی بۆسەر ئاسایشی نیشتمانی و بەرژەوەندییەکانی وڵاتەکە".

image

هێزەکانی عێراق له‌ 14 حوزەیران موشەکێکی کاتیوشایان دۆزییەوە لە ناوچەی راشیدیە له‌ باکوری خۆرهەڵاتی بەغدا. [خاوەنی وێنە: وەزارەتی بەرگری عێراق]

بانگه‌شه‌یانكرد بۆ "زیادکردنی هەوڵە هەواڵگرییەکان و گرتنەبەری رێوشوێنی پێویست بۆ دەستگیرکردنی ئەنجامدەرانی ئەو کردەوانە و به‌رپرسڕاگرتنیان".

وتیان دەبێت ئاژانسە ئەمنییەکان رێوشوێنی تووند بگرنەبەر بۆ رێگریکردن لە دووبارە روودانی ئەم هێرشانە.

هیچ لایەنێک بەرپرسیارێتی ئەنجامدانی ئەم هێرشانەیان لەئەستۆنەگرتووە، بەڵام چاودێران دەیخەنە ئەستۆی میلیشیا عێراقییەکانی سەر بە ئێران.

'پێشاندانی هێز'

سکرتێری گشتی ئەنجومەنی خێڵە عەرەبەکان لە سەڵاحەدین، سایر بەیاتی وتی: "ئه‌وه‌ هەوڵێکه‌ بۆ ئیحراجكردنی حکومەتەکەی کازمی، کە له‌ دیالۆگه‌ ستراتیژییه‌كه‌یدا لەگەل ئەمریکا به‌ڵێنی داوه‌ پابەندبێت بە پاراستنی پێگە نێودەوڵەتییە سەربازییەکان و شوێنی دیپلۆماتکارانی بیانی [لە عێراق].

بە دیارونای وت كه‌ لەبەرامبەر ئەمەدا ئەمریکا رازیبووە ژمارەی سەربازەكانی لە عێراق کەمبکاتەوە.

بەیاتی وتی: "پەیامەکە روونە: ئێرانییەکان و میلیشیا بریكاره‌كانیان هه‌وڵده‌ده‌ن باڵاده‌ستی و نفوزی سیاسییان نمایشبكه‌ن و ئه‌وه‌ پیشانبدەن کە دەتوانن بەپێی ویستی خۆیان دەستوەردان لە ئەمنیەتی وڵاتەکەدا بکەن."

وتیشی دەیانەوێت ئەوە دەربخەن کە "ئەوان خاوه‌نی رۆڵێكی گرنگن لە عێراقدا و كه‌ره‌سته‌ی ئه‌وه‌یان هه‌یه‌ بەرگری بكه‌ن لە ئەجه‌ندا تیرۆریستی و ئامانجەکانیان".

هه‌روه‌ها وتی میلیشیاکانی سەر بە ئێران ئامانجیانە ئەمنیەتی وڵاتەکە تێکبدەن و پشوێنی بنێننەوە، لەکاتێکدا ئێستا هەست بە مەترسییەک دەکەن بۆسەر ئامادەیی خۆیان لەکاتێکدا حکومەتە نوێکە رایگەیاندووه‌ کە خاوەندارێتی چەک سنووردار ده‌كات بۆ دەوڵەت و ئەمەش رێگری لە چالاکیەکانیان دەکات.

وتی ئەو میلیشیانە پەیوەندی پته‌ویان هه‌یه‌ لەگەڵ تۆڕی سیاسی و بازرگانە گەندەڵەکانی وڵاتەکە و "ئەمڕۆش زیاتر لە هەر کاتێک ترسیان لە بەرژەوەندییە ئابورییەکانیان هەیە و ئامادەن بۆ ئەنجامدانی هەرشتێک بۆ پاراستنیان".

بەیاتی وتی پلانی حکومەت بۆ چاکسازی ئابوری ئەو میلیشیانەی تووڕەکردووە کە دەیانەوێت رێگریبکەن لەو هەنگاوانەی بە ئاراستەی بەدەستهێنانی چاکسازی دەڕۆن.

وتیشی هێرشه‌كان بۆسەر پێگە سەربازییەکان و شوێنی دیپلۆماتکاران "مەترسییەکی جددین بۆ سەرەوەی و شکۆ [ی عێراق] و بەرژوەندی و ئەمنیەتی گەلی عێراق."

"ئەوە شتێکی په‌سه‌ندنەکراوە کەسانێک کە بەرپرسیارن بە ئازادی دەسووڕێنەوە و رێیان پێناگیرێت."

ئەم بابەتەت بەدڵە؟
0
0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 پیتت ماوە بینووسیت (1500 MAX)