هه‌واڵه‌كانی عێراق
تێرۆریزم

عێراق لێکۆڵینەوە لە کوشتاری فەرحاتیە دەستپێدەکات

فارس عومران

image

سەرەکوەزیرانی عێراق مستەفا کازمی و بەرپرسانی ئەمنی لە 18 تشرینی یەکەم گوێ بۆ کەسوکاری یەکێك لە قوربانیانی کوشتارگەی فەرحاتیە دەگرن لە پارێزگای سەلاحەدین. [خاوەنی وێنە: نوسینگەی میدیای سەرەکوەزیران]

سەرەکوەزیرانی عێراق مستەفا کازمی لیژنەیەکی تایبەتی پێکهێناوە بۆ لێکۆڵینەوە لە کوشتنی هەشت مەدەنی لە پارێزگای سەلاحەدین لەکاتێکدا توڕەیی جەماوەری بەربڵاوە دژی ئەوەی عێراقیەکان بە "کوشتار" ناویدەبەن.

هێزێکی چەکدار لە بەیانی شەممە (17 تشرینی یەکەم) هەڵیکوتایە سەر گوندی فەرحاتیە له‌ قەزای بەلەد و 12 پیاوی گەنجی رفاند و بردنی بۆ شوێنێکی نادیار.

لە کاتژمێرەکانی سەرەتای بەیانیدا، فەوجەکانی دۆخی کتوپڕی پۆلیسی سەلاحەدین هەشت جەستەیان دۆزییەوە بە شوێنی فیشەکەوە، لەکاتێکدا چارەنوسی چوار پیاوەکەی دیکە بە نەزانراوی ماوەتەوە.

هاشتاگی #Salaheddine_massacre #Farhatiya_massacre (#کوشتاری_سەلاحەدین، #کوشتاری_فەرحاتیە) لە کۆتایی هەفتەدا لەسەر تۆڕە کۆمەڵایەتیەکان لەنێو عێراقیە تووڕەکاندا بەربڵاوبوو، کە وێنەی مەدەنیە کوژراوەکانیان بڵاودەکردەوە و میلیشیا چەکدارەکانیان تۆمەتباردەکرد بە ئەنجامدانی تاوانەکە.

image

عێراقیەکان لە 18 تشرینی یەکەم خولەکێك بە بێدەنگی راوەستان بۆ قوربانیانی هێرشەکەی سەر گوندی فەرحاتیە لە پارێزگای سەلاحەدین. [خاوەنی وێنە: بەڕێوبەرێتی دابەشکردنی کارەبای سەلاحەدین]

کازمی، بە یاوەری بەرپرسانی باڵا، یەکشەممە بەشدارییکرد لە پرسەیەكدا بۆ قوربانیان.

لە بەیاننامەیەکدا وتی مافه‌كانی قوربانیەکان "دەپارێزرێت لەڕێگەی یاساوە" و خودی خۆی بەدوای ئەو لێکۆڵینەوەیەدا دەچێت کە بەگەڕخراوە.

وتی ئەنجامدەران "لەلایەن دادگاکانەوە سزادەدرێن نەك تۆڵەکردنەوە" و وتیشی تاوانباران لەدەست دادپەروەری رزگاریان نابێت.

خێزانی قوربانیەکان حەشدی شەعبی تۆمەتباردەکەن

جیا لە لیژنەی لێکۆڵینەوەی حکومەت، سەرۆکی پەرلەمانی عێراق محەمەد حەلبوسی لیژنەیەکی پێکهێنا لە ئەندامانی لیژنەی ئاسایش و بەرگری پەرلەمان بۆ لێکۆڵینەوە لە تاوانەکە.

سەرۆکی خێڵی ئەلبو عیسا و پەرلەمانتاری پێشووی پارێزگای سەلاحەدین، شەعلان کەریم، بە دیارونای وت هەردوو لیژنەکە دەستیانکردووە بە لێکۆڵینەوە و ئەنجامدانی کۆبوونەوە لەگەڵ لایەنە پەیوەندیدارەکان.

وتی: "چاوەڕێین لە چەند رۆژی داهاتوودا ئەنجامەکان ئاشکرا بكرێن و رابگەیەنرێن."

ئاماژەیکرد بەوەی خێزانی قوربانیان و دانیشتوانی ناوچەکە لیوای 42ی هێزەکانی حەشدی شەعبی، لایەنێکی میلیشیای عەسائیب ئەهل حەقی سەربە ئێران، تۆمەتباردەکەن بە دەستهەبوون لە تاوانەکەدا.

کەریم وتی: "شایەتحاڵان، لەنێویاندا خزمانی کوژراوه‌كان و دانیشتوانی ناوچەکە و ئەندامانی ئه‌و هێزە ئەمنیەی بەرپرسه‌ لە ناوچەکە -- فەوجی 3ی هێزی کۆماندۆی فەرماندەیی ئۆپەراسیۆنەکانی سامەڕا -- ئەم تۆمەتانەیان پشتڕاستکردۆتەوە."

حەشدی شەعبی نکۆڵی لە تۆمەتەکان کردووە و لە بەیاننامەیەکدا یەکشەممە رێکخراوی "دەوڵەتی ئیسلامی" (داعش)ی تۆمەتبارکرد.

کەریم وتی: "هێزی یاسا جێبەجێدەکرێت بەسەر ئەوانەدا كه‌ تێوەگلاون، جا سەر بە هەر لایه‌نێك بن."

فرەجۆریی فەرماندە ئه‌منییه‌كان

کەریم وتی: "تاوانی فەرحاتیە بەڵگەیەکی زیاتره‌ بۆ مەترسی چەکی نایاسایی و گروپە چەکدارەکان کە ملکەچی فەرمانەکانی سەرەکوەزیران نین." وتیشی ئەمە هەڕەشەیەکی جددیە بۆسەر ئاسایشی نیشتمانی.

داوایکرد ئه‌منییه‌تی سەلاحەدین بدرێتە سوپای عێراق و پۆلیسی ناوچەکە، لەگەڵ حەشدی خێڵەکی، کە لە دانیشتوانی ناوچەکە پێکدێت.

وتی فرەجۆریی فەرماندە ئه‌منییه‌كان و حەشدەکان کە لە سەلاحەدین جێگیرن، خزمەت بە ئاسایشی پارێزگاکە ناکات.

وتیشی: "بەرپرسیارێتی ئەمنی لە پارێزگاکە لەمڕۆدا لەنێو سێ فەرماندەیی سەربازیدا دابەشبووە: فەرماندەیی ئۆپەراسیۆنەکانی سەلاحەدین، فەرماندەیی ئۆپەراسیۆنەکانی سامەڕا و ناوەندی کۆنترۆڵی فەرماندەیی کەرکوك."

کەریم وتی سەرەڕای ئەوەش، دوو فەرماندەیی حەشدی شەعبی لە پارێزگاکە هەن: لیوای سەلام لەنێو فەرماندەیی ئۆپەراسیۆنەکانی سامەڕادا و فەرماندەیی حەشد لە سەلاحەدین.

وتیشی لقە ئەمنیەکانی باکور و باشوری ئاسایشی تکریتی دەزگای ئاسایشی نیشتمانیش لە سەلاحەدین چالاکن.

وتی بوونی چەندین دەزگای ئەمنی "کاریگەریی نەرێنی هەبووە بۆسەر ئاڵوگۆڕی زانیاری ئەمنی و کۆنترۆڵی بەسەر بڕیاردانی ئەمنیدا لاوازکردووە لە پارێزگاکە".

کەریم وتی بەگوێرەی یاسای عێراق، ئاسایشی پارێزگای سەلاحەدین لە دەسەڵاتی پارێزگاردایە، کە لەمڕۆدا "ئەو دەسەڵاتەی نەماوە".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500