هێزەکانی عێراق دووشەممە (22 حوزەیران) ده‌ستیانكرد به‌ سێیەمین قۆناغی هەڵمەتی سەربازیی "پاڵەوانانی عێراق" بۆ بەدووکەوتن و هێرشکردنە سەر پاشماوەکانی رێکخراوی "دەوڵەتی ئیسلامی" (داعش) لە باکور و خۆرهەڵاتی عێراق.

یەکەکانی فەرماندەیی ئۆپەراسیۆنەکانی سەلاحەدین و سامەڕا و دیالە و فیرقەی زرێپۆشی 9 بەشداریدەکەن لە یەکێك لە سێ بەرەکانی هەڵمەتەکەدا له‌ ناوچەیەکدا کە نزیکەی 5,000 کیلۆمەتر دووجایە.

ئەمە ئەو ناوچانەش دەگرێتەوە کە لەنێوان سنوورە کارگێڕییەکانی پارێزگاکانی سەلاحەدین و دیالە و کەرکوکدان.

وتەبێژی فەرماندەیی ئۆپەراسیۆنەکانی سەلاحەدین، عەمید فیراس بەشار سەبری وتی هێزەکان لە یەکەمین رۆژی ئۆپەراسیۆنەکەدا "ئەنجامی بەرچاو"یان بەدەستهێنا.

راپۆرتە هەواڵگرییەکان ئاماژەیان بەوە کرد کە شانەکانی داعش لە ناوچەکانی عەیس، حەوزی عوزه‌یم، موتەیبجە و ئەو ناوچەیەی لەنێوان دیالە و سامەڕادایە چڕبوونەته‌وە.

سەبری وتی: "چەندین بنکەی نهێنی [داعش]مان تێکشکاند کە خۆراكی پشتیوانی و ئامێری پەیوەندیگرتنیان تێدابوو."

وتی جگه‌ لەوەش، سێ حەشارگە، چوار تونێل، دوو شوێنکار بۆ دروستکردنی بۆمبی دەستکرد و كۆگایه‌كی تەقەمەنی تێکشکێنران.

گەمارۆدانی پاشماوەکانی داعش

بەرەی باشوری خۆرئاوای کەرکوكی ئۆپەراسیۆنه‌ سەربازییه‌كه‌، بەشداریی یەکەکانی وەزارەتی ناوخۆی بەخۆوە بینی کە فەرماندەی پۆلیسی فیدراڵی، فەرماندەی فیرقەی کتوپڕ و فەوجەکانی سوات و تاکتیکییان تێدابوو.

ئەم هێزانە چوار حەشارگەی داعشیان تێکشکاند و وێستگەیەکی دروستکردنی تەقەمەنی و دەیان بۆمبی دەستکرد و موشەکیان تەقاندەوە.

بەرەی سێیەم، کە ناوچە جیاوازەکانی دیالە، سەلاحەدین، سامەڕا و کەرکویان تێدابوو، چەند لیوایەکیان لەخۆدەگرت لە هێزەکانی حەشدی شه‌عبی و هێزە خێڵەکیەکان.

سێ حەشارگە و كۆگایه‌كی تەقەمەنی و ژمارەیەك بۆمبی دەستکردیان تێکشکاند.

سەبری وتی ئۆپەراسیۆنەکە بە پشتیوانی ئاسمانیی هێزی ئاسمانی عێراق و فڕۆکە جەنگیەکانی هاوپەیمانی نێودەوڵەتی ئەنجامدەدرێت.

وتیشی پێشڕەوی بەدەستدەهێنێت بەگوێرەی پلانێك کە ئامانج لێی "گه‌مارۆدانی چەکدارەکانە لە هەموو لایەکەوە تا هیچ دەرفەتێکیان پێنەدرێت بۆ هەڵاتن".

وتی وێنەگرتنی ئاسمانی بەکاردەهێنرێت بۆ کنەوپشکنین و چاودێریکردنی تەواوی خاکەکە بەشێوەیەکی بەردەوام و وتیشی هێڵی گرنگی پشتیوانییان له‌ تووندڕەوەکان بڕیوە.

هه‌روه‌ها وتی ئەندامانی داعش بەشێوەیەکی خێرا کەمدەبنەوە و ئاماژەیکرد بەوەی ئەو ئۆپەراسیۆنانەی لەم چەند مانگەی دواییدا لە چەند ناوچەیەکی بەئامانجکراو ئەنجامدەدرێن، "تەنیا بریتین له‌ چاندنی بۆمب و بەشێوەیەکی هەڕەمەکی هێرشکردنە سەر بازگە ئەمنیەکان لە ناوچە دوورەدەستەکان".

یەکەمین قۆناغی هەڵمەتی "پاڵەوانانی عێراق" لە ناوەندی شوباتدا دەستیپێکرد و روماڵی 26,000 کیلۆمەتر دووجای کرد لە بیابانی خۆرئاوای عێراق.

قۆناغی دووەم، کە لەنێوان 2 بۆ 4 حوزەیران ئەنجامدرا، ناوچەیەکی 7,000 کیلۆمەتر دووجای لەخۆگرت لەنێوان پارێزگاکانی سەلاحەدین و کەرکوكدا.