به‌گوێره‌ی چالاکوانێکی ناوچەکە، فڕۆکە جەنگیەکانی روسیا بەردەوامن لە ئەنجامدانی چەند هێرشێکی ئاسمانی و بە ئامانجکردنی ناوەندە مەدەنیەکان و دەزگا خزمەتگوزارییەکان لە ناوچەی ئیدلیب، کە زیاتر لەژێردەستی هاوپەیمانێتی تووندڕەوی تەحریر شامدایە.

چالاکوان هەیسەم ئیدلیبی بە دیارونای وت دوو گەڕی یەک لەدوای یەکی هێرشی ئاسمانی بۆ سەر سەراقیب، خۆرهەڵاتی شاری ئیدلیب، بوونه‌ هۆی كوشتنی چوار کەس و برینداربوونی زیاد لە 10 كه‌س، لەنێویاندا ئەندامێکی بەرگری شارستانی سوریا (کڵاوسپیەکان).

ئیدلیبی وتی تیمی کڵاوسپییەکان تووشی دووەمین هێرشی ئاسمانی بوون لەکاتێکدا گەیشتبوونە شوێنەکە بۆ رزگارکردنی قوربانیانی هێرشەکەی یەکەم.

وتیشی فڕۆکە جەنگیەکانی روسیا لە گوندی میلاجەی باشوری ئیدلیبیشیان دا، کە شەش کەس کوژران، لەنێویاندا چوار ژن و چەندینی دیکە برینداربوون، لەنێویاندا چەند ژن و منداڵێك.

ئیدلیبی وتی هێرشە ئاسمانیەکانی روسیا لە وێستگەیەکی کارەباشیان دا لە مەعەرەت دبسە، خۆرهەڵاتی ئیدلیب و لەکاریان خست و بووە هۆی کارەبا بڕان.

وتی فڕۆکە جەنگیەکانی روسیا بۆمبی سێرۆماتیك (خاڵی له‌ هه‌وا) بەکاردەهێنن کە بەتەواوی دەزگا بەئامانجکراوەکان وێراندەکات و ئه‌وه‌ش ژمارەی زۆری قوربانیه‌كان رووندەکاتەوە.

ئاماژەیکرد بەوەی ئەو بینایانەی لە میلاجە و سەراقیب کرابوونە ئامانج بەتەواوی رووخان، کە کڵاوسپییەکانیان ناچاركرد به‌ به‌كارهێنانی ئامێری گەورە بۆ لادانی داروپەردوو تا لاشەی مردووان بگوێزنەوە و برینداران رزگاربکەن.