https://diyaruna.com/ckb/articles/cnmi_di/features/2019/11/07/feature-02

×
×
مافی مرۆڤ |

هێرشه‌ ئاسمانییه‌كانی روسیا و سوریا نه‌خۆشخانه‌یه‌ك و ناوه‌ندێكی به‌رگری شارستانی له‌كارده‌خه‌ن

وه‌لید ئه‌بولخه‌یر له‌ قاهیره‌

image

نه‌خۆشخانه‌یه‌كی منداڵبوون له‌ شارۆچكه‌ی شنانی پارێزگای ئیدلیب به‌هۆی هێرشێكی ئاسمانییه‌وه‌ له‌ خزمه‌تگوزاری خرا. [خاوه‌نی وێنه‌: به‌گری شارستانی سوریا]

چه‌ند كاتژمێرێك پێش ئێستا، هێرشه‌ ئاسمانییه‌كانی روسیا و سوریا نه‌خۆشخانه‌یه‌ك و ناوه‌ندێكی به‌رگری شارشتانیی (كڵاوسپییه‌كان)یان له‌ ناوچه‌ گوندنشینه‌كانی پارێزگای حه‌له‌ب و پارێزگای ئیدلیب كرده‌ ئامانج، ئه‌مه‌ش بووه‌ هۆی برینداركردنی چه‌ندین مه‌ده‌نی و په‌كخستنی هه‌ردوو نه‌خۆشخانه‌ و ناوه‌نده‌كه‌، چالاكوانێكی ناوخۆ پێنجشه‌ممه‌ (7 تشرینی دووه‌م) وتی.

چالاكوانێكی ئیدلیب، موسه‌عه‌ب عه‌ساف، به‌ دیارونای وت ئه‌و ناوه‌ندی به‌گری شارستانییه‌ی كرایه‌ ئامانج ده‌كه‌وێته‌ شارۆچكه‌ی عه‌ندان له‌ پارێزگای حه‌له‌ب، كه‌ خزمه‌تگوزارییه‌كانی رزگاركردن و فریاگوزاری سه‌ره‌تایی و ئاگركوژاندنه‌وه‌ی پێشكه‌شده‌كرد له‌ ناوچه‌ گوندنشینه‌كانی حه‌له‌ب و ئیدلیب.

وتی هێرشه‌ ئاسمانییه‌كان به‌ته‌واوی ناوه‌نده‌كه‌یان له‌كارخست و كه‌لوپه‌له‌كانی به‌جۆرێك زیانیان پێگه‌یشت كه‌ به‌كارنه‌یه‌نه‌وه‌.

عه‌ساف وتی هێرشه‌ ئاسمانییه‌كان نه‌خۆشخانه‌ی منداڵبوونی ئیخاڵسیشیان له‌ گوندی شنان له‌ باشوری ناوچه‌ گوندنشینه‌كانی ئیدلیب كرده‌ ئامانج.

image

ناوه‌ندی به‌رگری شارستانی له‌ شارۆچكه‌ی عه‌ندان له‌ ناوچه‌ گوندنشینه‌كانی حه‌له‌ب به‌هۆی هێرشێكی ئاسمانییه‌وه‌ له‌ خزمه‌تگوزاری خرا. [خاوه‌نی وێنه‌: به‌گری شارستانی سوریا]

image

به‌شی په‌رستاری له‌ نه‌خۆشخانه‌ی منداڵبوونی ئیخڵاس له‌ شارۆچكه‌ی شنان به‌ هێرشێكی ئاسمانی وێرانكرا، ئه‌مه‌ش ده‌ستپێڕاگه‌یشتنی مه‌ده‌نییه‌كان به‌ خزمه‌تگوزاری ته‌ندروستی سنووردارده‌كات. [خاوه‌نی وێنه‌: ئیدلیب پڵه‌س]

به‌گوێره‌ی رێكخراوی كۆمه‌ڵگه‌ی پزیشكیی سوری-ئه‌مریكی، نه‌خۆشخانه‌كه‌ له‌لایه‌ن یه‌كێتی خزمه‌تگوزاری پزیشكی و رێكخراوه‌كانی كۆمه‌كه‌وه‌ به‌ڕێوه‌ده‌برێت.

عه‌ساف وتی ژماره‌یه‌ك كه‌س برینداربوون، نه‌خۆشخانه‌كه‌ش زیانێكی زۆری به‌ركه‌وت كه‌ بووه‌ هۆی ئه‌وه‌ی به‌ ته‌واوی له‌ خزمه‌تگوزاری كه‌وت.

وتیشی ئه‌ندامانی كڵاوسپییه‌كان چوونه‌ شوێنی رووداوه‌كه‌ بۆئه‌وه‌ی ئه‌و ئاگره‌ بكوژێننه‌وه‌ كه‌ له‌ نه‌خۆشخانه‌كه‌ كه‌وته‌وه‌ دوای هێرشه‌ ئاسمانییه‌كه‌ و برینداره‌كانیان گواسته‌وه‌ بۆ شوێنێكی سه‌لامه‌تتر، كه‌ دوو كارمه‌نده‌ی پزیشكییان له‌نێودابوو.

"له‌ چه‌ند رۆژی رابردوودا، ناوه‌نده‌ ته‌ندروستییه‌كانی باكوری خۆرئاوای سوریا كراونه‌ته‌ ئامانجی ژماره‌یه‌ك هێرش،" رێكخراوی كۆمه‌ڵگه‌ی پزیشكیی سوری-ئه‌مریكی له‌ به‌یاننامه‌یه‌كدا رایگه‌یاند كه‌ تێیدا ئاماژه‌ به‌ چه‌ند رووداوێكی دیكه‌ كراوه‌.

به‌گوێره‌ی به‌یاننامه‌كه‌: "هێرشه‌كه‌ی سه‌ر نه‌خۆشخانه‌ی منداڵبوونی شنان 63هه‌مین هێرشه‌ بۆسه‌ر ناوه‌نده‌ ته‌ندروستییه‌كان له‌ باكوری خۆرئاوای سوریا له‌ ده‌ستپێكی زیادبوونی تووندوتیژییه‌كانه‌وه‌ له‌ 26 نیسانه‌وه‌، هه‌روه‌ها 23هه‌مین هێرشیش بوو بۆسه‌ر ناوه‌ندێكی سه‌ر به‌ رێكخراوی كۆمه‌ڵگه‌ی پزیشكیی سوری-ئه‌مریكی له‌ هه‌مان ماوه‌دا."

راشیگه‌یاند: "هه‌روه‌ها ئه‌مه‌ شه‌شه‌مین هێرشه‌ بۆسه‌ر نه‌خۆشخانه‌یه‌كی منداڵبوون، كه‌ به‌تایبه‌تی جێی نیگه‌رانییه‌ به‌هۆی ئه‌و هه‌موو كه‌موكڕوییه‌ی هه‌یه‌ له‌ دابینكردنی چاودێریی پزیشكیدا بۆ منداڵبوون له‌ باكوری خۆرئاوای سوریا."

كه‌مبوونه‌وه‌ی خزمه‌تگوزارییه‌ سه‌ره‌كییه‌كان

عه‌ساف وتی نه‌خۆشخانه‌كه‌ و ناوه‌ندی به‌رگری شارستانییه‌كه‌ خزمه‌تگوزارییان پێشكه‌شی دانیشتوانانی ناوچه‌ گوندنشینه‌كانی حه‌له‌ب و ئیدلیب ده‌كرد -- كه‌ مه‌زه‌نه‌ده‌كرێن به‌ 100,000 كه‌س.

وتی له‌گه‌ڵ بۆردومانی نه‌خۆشخانه‌ و ناوه‌ندی به‌رگریی شارستانیه‌كه‌، ئه‌م خزمه‌تگوزاریانه‌ چیتر به‌رده‌ست نیین، به‌ڵام كڵاوسپییه‌كان هه‌وڵده‌ده‌ن بنكه‌ی نوێ بكه‌نه‌وه‌ بۆئه‌وه‌ی ئه‌و زیانانه‌ پڕبكه‌نه‌وه‌.

وتیشی هێرشی ئاسمانیی سەخت رۆژانە بەردەوامن، بەتایبەتی لە باشوری ناوچە گوندنشینەکانی ئیدلیب، ئەو شوێنەی دانیشتوان بەسەختی کراونەتە ئامانج و بوونەته‌ هۆی کوشتن و برینداربوونی ژمارەیەکی زۆر مەدەنی.

عه‌ساف وتی بەمدواییانە سێ منداڵ کوژران و دایکیان بریندارکرا کاتێك خانووەکەیان لە گوندی دار که‌بیره‌ لەلایەن هێرشێکی ئاسمانییەوە کرایە ئامانج.

بەگوێرەی رێكخراوی كۆمه‌ڵگه‌ی پزیشكیی سوری-ئه‌مریكی، لە شاری جسر شوغور، ناوەندێکی سه‌ره‌تایی تەندروستی کرایە ئامانج، کە لەلایەن رێکخراوی پزیشكیی سورییه‌كانی تاراوگه‌وه‌ پشتگیریدەکرێت.

عه‌ساف وتی ناوچەکانی تریش کە هێرشیان كراوه‌ته‌سه‌ر، بریتین لە مەعه‌رەت نوعمان و شارۆچکەی مەعەر شورین، کە ڕۆژانه‌ بۆردوماندەکرێن.

تەحریر شام بەشێوەیەکی بەرفراوان کۆنترۆڵی هه‌رێمی ئیدلیب دەکەن، کە هێزەکانی سوریا شەڕی بۆ دەکەن بۆئەوەی بیخەنەوە ژێردەسەڵاتی رژێم بەهاوکاریی سەریکیترین هاوپەیمانیان، کە روسیایە.

ئەم بابەتەت بەدڵە؟
0
نەخێر

0 كۆمێنت

رێوشوێنەکانی کۆمێنت نوسین
Captcha