چالاكوانێكی ناوخۆ وتی هه‌وڵه‌كانی ته‌حریر شام بۆ وه‌رگرتنی "زه‌كاتی زه‌یتوون" له‌ خاوه‌نی كێڵگه‌كانی زه‌یتوون و خاوه‌نكارگه‌كانی گوشینی زه‌یتوون له‌ پارێزگای ئیدلیبی باكوری خۆرئاوای سوریا خۆپیشاندان و تووندوتیژییان لێكه‌وتۆته‌وه‌ له‌ چه‌ند شارێك له‌م رۆژانه‌ی دواییدا.

كاتێك دانیشتوانی ئه‌و ناوچانه‌ی له‌لایه‌ن هاوپه‌یمانه‌ تووندڕه‌وه‌كه‌وه‌ كۆنترۆڵكراون ره‌تیانكرده‌وه‌ زه‌كاتی زه‌یتوون بده‌ن، ناكۆكی و تووندوتیژی دروستبوو، له‌ چه‌ند ناوچه‌یه‌كیش خۆپیشاندانیان ئه‌نجامدا.

رێنماییه‌ داراییه‌كه‌ی ته‌حریر شامیان ره‌تكرده‌وه‌ و وتیان به‌ناو "حكومه‌ته‌ رزگاری"یه‌كه‌ی باج و چه‌ندین جۆر زه‌كاتی سه‌پاندووه‌ به‌سه‌ر خه‌ڵكی سوریادا، كه‌ به‌ بارودۆخێكی سه‌ختدا تێده‌په‌ڕن.

وتیشیان هاوپه‌یمانه‌ تووندڕه‌وه‌كه‌ ته‌نانه‌ت هه‌وڵیداوه‌ زه‌كاتی زه‌یتوون له‌و كه‌سانه‌ش كۆبكاته‌وه‌ كه‌ نه‌گه‌یشتوون به‌ "نیساب"، ئه‌و ئاستی سامانه‌ی كه‌ دیاریكراوه‌.

دانیشتوویه‌كی مه‌عره‌ت نوعمان، هانی نوعمان، به‌ دیارونای وت زۆربه‌ی كات ته‌حریر شام شێوازی نوێی زه‌كات ده‌سه‌پێنێت بۆئه‌وه‌ی داهاتی خۆی زیاتربكات -- دواهه‌مینیشیان زه‌كاتی زه‌یتوونه‌ كه‌ سه‌پاندوێتی به‌سه‌ر خاوه‌نی كێڵگه‌كانی زه‌یتووندا له‌ ناوچه‌كه‌.

وتی ئه‌م تووڕه‌ییه‌ش بۆته‌هۆی شه‌ڕ و پێكدادانی چه‌كداری له‌ چه‌ند ناوچه‌یه‌ك، له‌نێویاندا شارۆچكه‌ی كه‌فر ته‌خاریم، كه‌ له‌وێ دانیشتوان و میلیشیای فه‌یله‌ق شام رووبه‌ڕووی ته‌حریر شام بوونه‌وه‌.

وتیشی دوو كه‌س كوژران و چه‌ندی تریش له‌ رووداوه‌كه‌دا برینداربوون.

هه‌روه‌ها وتی ته‌حریر شام دواتر چووه‌ ناو شارۆچكه‌كه‌ و رێكه‌وتنێك ئه‌نجامدرا بۆ هێوركردنه‌وه‌ی دۆخه‌كه‌. زه‌كاتی زه‌یتوون به‌شێوه‌یه‌كی كاتی وه‌ستێندرا تا ده‌گه‌نه‌ چاره‌سه‌رێك بۆ قه‌یرانه‌كه‌.

تووڕه‌یی له‌ ته‌حریر شام

نوعمان وتی ته‌حریر شام كۆكه‌ره‌وه‌كانی زه‌كاتی له‌ هه‌موو كارگه‌كانی زه‌یتوون داناوه‌.

وتی ئه‌مه‌ دانیشتوانی ناوچه‌كه‌ی تووڕه‌كردووه‌ و ئاماژه‌ی كرد به‌وه‌ش كه‌ زۆربه‌ی خاوه‌ن كێڵگه‌كانی زه‌یتوون له‌ ناوچه‌كه‌ به‌روبومه‌كانیان نافرۆشن به‌ڵكو خۆیان به‌كاریدێنن.

وتیشی تووڕه‌یی زیاتر هاته‌ ئاراوه‌ كاتێك ته‌حریر شام دووجار زه‌كاتی سه‌پاند -- جارێكیان له‌سه‌ر باخ و كێڵگه‌كان و جارێكی تریش له‌سه‌ر خاوه‌نی كارگه‌كان.

ئه‌مه‌ له‌گه‌ڵ ئه‌و باجانه‌ی خراونه‌ته‌سه‌ر خاوه‌نی بارهه‌ڵگر و جۆره‌كانی تری گواستنه‌وه‌ كه‌ له‌ لێكردنه‌وه‌ی زه‌یتوونه‌كان و به‌رهه‌مهێنانی زه‌یتی زه‌یتووندا به‌كارده‌هێنرێن.

چه‌ندین خۆپیشاندان له‌دژی ته‌حریر شام و به‌ناو "حكومه‌تی رزگاری"یه‌كه‌ی ئه‌نجامدران له‌ چه‌ند شار و شارۆچكه‌یه‌كی پارێزگای ئیدلیب، له‌نێویاندا مه‌عره‌ت نوعمان و ئیدلیب و ته‌فته‌ناز.

هه‌روه‌ها وتی له‌ ته‌فته‌ناز، ته‌حریر شام كۆبوونه‌وه‌كه‌ی به‌ زه‌بری هێز بڵاوه‌پێكرد و فیشه‌كی راسته‌قینه‌ش به‌كارهێنرا بۆ بڵاوه‌پێكردنی خۆپیشاندانه‌كان. وتیشی له‌ئه‌نجامدا ژماره‌یه‌ك مه‌ده‌نی برینداربوون.