![هێزه‌كانی عێراق و دانیشتوانی روتبه گفتوگۆده‌كه‌ن له‌سه‌ر باشتركردنی باری ئاسایش و هاریكاری له ناوچه‌كه‌دا. له مانگی تشرینی یه‌كه‌مدا هێزه ئه‌منیه‌كانی عێراق هێرشێكی "دەوڵەتی ئیسلامی لە عێراق و شام" (داعش)یان پوچه‌ڵكرده‌وه بۆسه‌ر ئه‌م شاره‌ی ئه‌نبار. [خاوەنی وێنە: وه‌زاره‌تی به‌رگری عێراق]](/cnmi_di/images/2016/11/23/6619-Iraqi-forces-rutbah-700_496.webp)
هێزه‌كانی عێراق رێوشوێنی ئه‌منییان گرتۆته‌به‌ر له شاری روتبه‌ی خۆرئاوای ئه‌نبار بۆ رێگه‌گرتن له دزه‌كردنی چه‌كدارانی "دەوڵەتی ئیسلامی لە عێراق و شام" (داعش) پاش هێرشێكی سه‌رنه‌كه‌وتوانه‌ی گروپه‌كه، به‌رپرسانی ناوخۆ به دیارونایان وت.
چه‌كدارانی داعش رۆژی 23 تشرینی یه‌كه‌م هێرشیان كرده‌سه‌ر شاره‌كه له هه‌وڵێكدا بۆ خافڵگیركردنی هێزه‌كانی عێڕاق له هێرشیاندا بۆسه‌ر موسڵ، به‌رپرسه‌كان وتیان. به‌ڵام هێزه‌كانی عێراق دزه‌كه‌ره‌كانیان كوشت دوای دوو رۆژ له شه‌ڕی سه‌خت و ئاگریان به‌ردا له ئۆتۆبیله‌كانیان.
دانیشتوان و به‌رپرسانی ناوخۆ وتیان شاره‌كه، كه له 19 ئازار رزگاركرا دوای ئه‌وه‌ی دوو ساڵ له‌ژێر حوكمی داعشدا بوو، باری ئاسایی به‌ده‌ستهێناوه‌ته‌وه و سه‌قامگیرییش له‌گه‌ڕانه‌وه‌دایه. وتیشیان كه ئێستا دیسان له ئاماده‌باشیدان پاش ئه‌و هێرشه.
نانه‌وایه‌كی شاره‌كه، جه‌بار عوبه‌یدی، 41 ساڵ، به دیارونای وت: "خه‌ڵك له‌ده‌وری سوپا و پۆلیس كۆبوونه‌ته‌وه بۆ به‌رپه‌رچدانه‌وه‌ی هه‌ڕه‌شه‌ی تێرۆریستان."
وتیشی: "ئێمه سازش ناكه‌ین له‌سه‌ر ئه‌منیه‌تی شاره‌كه‌مان. ئێمه گه‌ڕاوینه‌ته‌وه بۆ شاره‌كه‌مان دوای ئازارچه‌شتنێكی زۆر به‌هۆی ئه‌وه‌ی داعش ناچاریكردین به ئاواره‌یی و ئێستا هیوامان زۆره."
هه‌روه‌ها وتی: "تێرۆریسته‌كان تێكده‌شكێن به‌په‌نای دڵسۆزیی هێزه‌كانمان و پشتگیریی ئێمه بۆیان." وتیشی دانیشتوانی شاره‌كه "ده‌یانه‌وێت له ئاشتی و سه‌قامگیریدا بژین دوور له تێرۆر و وێرانكاری".
پاراستنی ئاسایشی روتبه
قایمقامی روتبه، عیماد مشعه‌ل دوله‌یمی، به دیارونای وت داعش ته‌نها سانتیمه‌ترێكی شاره‌كه‌شی له‌ژێرده‌ستدا نیه. ئاماژه‌ی به‌وه‌ش كرد كه هێرشه‌كه‌ی تشرینی یه‌كه‌م به‌ته‌واوی به‌رپه‌رچی درایه‌وه.
دوله‌یمی وتی: "به‌هاریكاری له‌گه‌ڵ خێزانه‌كان، هێزه‌كانمان توانیان ئه‌و هێرشه گه‌وره‌یه پوچه‌ڵبكه‌نه‌وه كه له‌یه‌ك كاتدا له چه‌ند لایه‌كه‌وه به‌رپاكرا له‌لایه‌ن ئه‌م گروپه تێرۆریستیه‌وه به به‌كارهێنانی ده‌یان خۆكوژ و ئۆتۆمبیلی بۆمبڕێژكراو."
وتیشی: "هه‌موو هێرشبه‌ره‌كان كوژران و ئۆتۆمبیله‌كانیان تێكشكێنران. به‌دوای ئه‌مه‌شدا هه‌ڵمه‌تێكی گه‌وره‌ی پشكنین ده‌ستیپێكرد بۆ دڵنیابوونه‌وه له‌وه‌ی هیچ تێرۆریستێك له گه‌ڕه‌كه‌كاندا نه‌ماوه."
هه‌روه‌ها وتی: "ئێستا شاره‌كه ئه‌مینه و هێزه ئه‌منیه‌كان و دانیشتوان هه‌ردوولا له ئاماده‌باشیدان بۆ رێگرتن له دووپاتبوونه‌وه‌ی هه‌ر مه‌ترسیه‌كی ئه‌منی."
دوله‌یمی داوای له هێزه ئه‌منیه‌كان كرد بۆ چڕكردنه‌وه‌ی گه‌ڕانه ئاسمانیه‌كانیان له ناوچه‌كه‌دا بۆئه‌وه‌ی به‌ته‌واوی له چه‌كدارانی داعشیان پاكبكه‌نه‌وه و مه‌ترسی له شاره‌كه دوربخه‌نه‌وه.
وتی: "داعش جێ پێی له روتبه له‌ده‌ستداوه، به‌ڵام ده‌شێت هێشتا حه‌شارگا و مۆڵگه‌یان مابێت له بیابانه‌كه‌ی نزیكیه‌وه."
وتی هه‌روه‌ها شاره‌كانی قائیم و عانه و راوه و عه‌كاشات له خۆرئاوای ئه‌نبار "هێشتا له‌ژێرده‌ستی تێرۆریسته‌كاندان و هه‌ڕه‌شه‌یه‌كن بۆ ئاسایشی شاره‌كه‌مان". دوله‌یمی داوای له هێزه‌كانی عێراق كرد ئه‌و ناوچانه رزگاربكه‌ن.
ئه‌ندامی لیژنه‌ی ئاسایش له ئه‌نجومه‌نی پارێزگای ئه‌نبار، راجع به‌ره‌كات، وتی روتبه ئه‌مینكراوه و سوپا و پۆلیس و هێزه خێڵه‌كیه‌كان كۆنترۆڵی بارودۆخه‌كه‌یان كردووه.
به‌ره‌كات به دیارونای وت كه له‌گه‌ڵ ئه‌وه‌شدا، "هه‌ڕه‌شه‌ی داعش هێشتا به‌رده‌وامه، چونكه شاره‌كه كراوه‌یه به‌سه‌ر ناوچه‌یه‌كی بیابانیی به‌ریندا كه كۆنترۆڵكردنی ته‌واوه‌تی ئه‌م ناوچانه زه‌حمه‌ت ده‌كات به‌هۆی بوونی زۆر حه‌شارگای سروشتییه‌وه".
وتیشی گرنگه ئه‌و یه‌كه سه‌ربازیانه‌ی ئه‌ركی پاراستنی روتبه‌یان پێسپێردراوه پته‌وتربكرێن به كردنه‌وه‌ی ده‌رگا بۆ دانیشتوان تا خۆبه‌خشانه په‌یوه‌ندییان پێوه‌بكه‌ن، چونكه ئه‌وان شاره‌زاییه‌كی باشیان هه‌یه له ناوچه‌كه.
هه‌روه‌ها وتی: "گرنگیشه ئۆتۆمبیلی زریپۆش و چه‌كی قورسی زیاتر دابینبكرێت بۆ هێزه‌كان له‌وێ، چونكه زۆربه‌ی ئه‌ندامانی پۆلیس له شاره‌كه‌دا ژماره‌یه‌كی دیاریكراو ئۆتۆمبیلی زریپۆش و چه‌كی سوكیان هه‌یه."
خزمه‌تگوزاریه‌كانی حكومه‌تی خۆجێی
له‌هه‌مانكاتدا، حكومه‌تی خۆجێی به‌رده‌وامه له‌سه‌ر خزمه‌تگوزاریه گشتیه‌كان بۆ ئه‌و خه‌ڵكه‌ی ده‌گه‌ڕێنه‌وه بۆ روتبه و سه‌رۆكی ئه‌نجومه‌نی ناوخۆ، سوبحی جوبه‌یر زیاب، ئاماژه‌ی به‌وه دا كه نزیكه‌ی 4,000 خێزانی ئاواره‌بوو له كۆی 6,000 گه‌ڕاونه‌ته‌وه له‌وكاته‌وه‌ی شاره‌كه رزگاركراوه.
زیاب به دیارونای وت "هه‌موو هه‌وڵێكمان ده‌ده‌ین بۆ دابینكردنی خزمه‌تگوزاریه‌كان بۆ خێزانه گه‌ڕاوه‌كان."
وتیشی: "قوتابخانه‌كانمان كردۆته‌وه، به‌ڵام كه‌موكورتیه‌كی زۆرمان هه‌یه له مامۆستا و ده‌بێت نه‌خۆشخانه‌كانیش خزمه‌تگوزاریی باشتر پێشكه‌شی خێزانه‌كان بكه‌ن. كار بۆ ئه‌وه‌ش ده‌كه‌ین كه ئاوی خواردنه‌وه بۆ هه‌موو گه‌ڕه‌كه‌كان دابینبكه‌ین."
هه‌روه‌ها وتی: "هه‌رچی كاره‌باشه، خه‌ڵكه‌كه به ته‌واوی پشتیان به‌ستووه به موه‌لیده‌كانی خۆیان چونكه شاره‌كه به‌زۆری كاره‌با له وێستگه‌ی كاره‌بای قائیمه‌وه وه‌رده‌گرێت و ئه‌و شارۆچكه‌یه‌ش هێشتا له‌ژێرده‌ستی تێرۆریستاندایه."
زیاب وتیشی: "سه‌ره‌ڕای سه‌ختیه‌كان بارودۆخی شاره‌كه به‌ره‌و باشتر ده‌ڕوات و دانیشتوان دڵخۆشن به‌وه‌ی له‌ده‌ست داعش رزگاركراون و له‌گه‌ڵ هێزه ئه‌منیه‌كان كارده‌كه‌ن بۆ پاراستنی شاره‌كه‌یان."
