هێرشە ئاسمانیەکانی رژێمی سوریا دووشەممە (2 کانونی یەکەم) 10 مەدەنییان لە پارێزگای ئیدلیب کوشت، لەکاتێکدا لە دوو رۆژی رابردوودا پێکدادانی کوشندە لەنێوان رژێم و گروپە چەکدارەکانی هاوپەیمانی تەحریر شامدا پەرەی سەندووە.

رێكخراوی روانگەی سوری بۆ چاودێری مافەکانی مرۆڤ رایگەیاند كه‌ هێرشەکان بوونە هۆی برینداربوونی 15 مەدەنیش لە شارۆچکەی مەعەرەت نوعمان.

دووشەممە هێزەکانی رژێم و گروپە چەکدارەکان لە پێکدادانی سەختدا بوون لە کەناری باشوری خۆرهەڵاتی ناوچەکە، بەجۆرێك لە دوو رۆژدا نزیکەی 100 چەکدار کوژران.

به‌گوێره‌ی رێكخراوه‌كه‌، شەڕەکان لە کەناری ئیدلیب لە شەممەوە بە سەختترین دادەنرێن لەوکاتەوەی ئاگربەستێکی سازێنراو لەلایەن روسیاوە لە کۆتایی ئاب جێبەجێکرا.

ئەو گروپی چاودێرییە رایگەیاند: "بەیانی دووشەممە شەڕ بڵێسەی سەند لە چەندین بەرەوه‌ له‌ ناوچە گوندنشینەکانی باشوری خۆرهەڵاتی ئیدلیب."

رێكخراوه‌كه‌ راشیگەیاند كه‌ 51 چەکداری رژێم لە ماوەی 48 کاتژمێردا کوژران، لەکاتێکدا 45 لە دژەکانیان، لەنێویاندا 31 توندڕەویش، گیانیان لەدەستدا.

'سەختترین شەڕ له‌ماوه‌ی چەند مانگێكدا'

چالاکوانێكی ئیدلیب، موسعەب عەساف وتی ژمارەی بەرزی قوربانیان بەهۆی دەستاودەستکردنی کۆنترۆڵی هەندێك گوند و شارۆچکەوه‌یە لەلایەن هەردوولاوە.

وتی ناوچە گوندنشینەکانی باشوری ئیدلیب شایەتی سەختترین شەڕن له‌ماوه‌ی چەند مانگێكدا لەنێوان هێزەکانی رژێم و میلیشیا هاوپەیمانەکانیدا لەلایەك و تەحریر شام و هاوپەیمانەکانی لەلایەکی دیکەوە.

وتیشی کۆنترۆڵی ژمارەیەك ناوچە دەستاودەستیکردووە لەکاتی شەڕەکەدا و ئاماژەیکرد بە کەفریا لە قەزای سنجار لە مەعەرەت نوعمان، هه‌روه‌ها گوندی ئیعجاز، ناوچە سەقامگیرەکان و شارۆچکەکانی سروج و رەسم ئەلوەرد.

بەگوێرەی عەساف، گەڕی نوێی شەڕ دوای ئەوە هات کە تەحریر شام هێرشی کردە سەر چەند پێگەیەکی رژێم و کۆنترۆڵی کردن لە ئۆپەراسیۆنێکدا بەناوی "كۆڵ مه‌ده‌ن".

وتی بەڵام هەرزوو رژێم دژەهێرشێکی ئەنجامدا و زۆربەی پێگە لەدەستچووەکانی گرتەوە بەیارمەتی هێزی ئاسمانیی روسیا و سوریا.

عەساف وتی فڕۆکە جەنگیەکانی روسیا دەیان هێرشی ئاسمانییان ئەنجامدا لە کەنارەکانی مەعەرەت نوعمان و شاری کەفر نەبل.

وتیشی هاوکات، کۆپتەرەکانی سوریا بۆمبی بەرمیلییان بەردایەوە لە چەندین شارۆچکە و گوند، لەنێویاندا حاس، تەرمەلا، کەنسەفرە و کەنارەکانی شاری سەراقیب.

شەپۆلێکی بەرفراوانی ئاوارەیی

عەساف وتی شەڕەکە بووە هۆی شەپۆلێکی بەرفراوانی ئاوارەیی، بەجۆرێك مەدەنیەکان بەرەو باکور چوون بۆ ناوچە سنوورییەکان، کە لەوێ بەنێو کێڵگە کشتوکاڵیەکاندا بڵاوبوونەوە.

کەمپی ئاوارەکان لە ناوچە سنوورییه‌كه‌ پڕن و نەیانتوانی ئەو شەپۆلە نوێیە لەخۆبگرن، کە وایکرد ئاوارە نوێکان پەناگەیان نەبێت لە وەرزی سەرما و زوقمدا.

حافز، باوکێك کە لە ماڵەکەی دەرکراوە و رۆژی شەممە ناوچەکەی به‌جێهێشت لەگەڵ ژنەکەی و سێ منداڵەکەی، وتی: "نامەوێت منداڵەکانم ببینم لەژێر داروپەردوودا گیربخۆن."

سەدان هەزار کەس لە باشوری بە تووندوتیژی تەنراوی پارێزگاکە هەڵاتوون لەوکاتەوەی لە سەرەتای ئەمساڵدا شەڕ تێیدا پەرەیسەند.