بەرپرسان بە دیارونایان وت ئامادەکاریە ئەمنیەکان بۆ هەڵبژاردنی پەرلەمانی عێراق له‌ 12 ئایار تەواوبوون و پلانە ئەمنیەکان لە سەرانسەری پارێزگاکاندا ده‌خرێنه‌گه‌ڕ بۆئەوەی بەرپرسیارێتی تایبەت بدرێتە هەر یەك لە دەزگا ئەمنیەکان.

وتەبێژی پۆلیسی دیالە عەقید غالیب عەتیە وتی ئامادەکاریەکان زوو لە دیالە دەستیانپێکرد بۆ پاراستنی بنکەکانی دەنگدان و ناوچەکانی ده‌وروبه‌ریان.

عەتیە بە دیارونای وت ئەوان لە "پەیوەندی بەردەوامدان" لەگەڵ وەزارەتی ناوخۆ و کۆمسیۆنی هەڵبژرادنەکان و دەزگا ئەمنیەکاندا بۆ جێبەجێکردنی پلانەکە.

وتی: "پۆلیسه‌کان بەرپرسیاردەبن لە پاراستنی بنکەکانی دەنگدان و ناوچە و رێگاکانی بۆیان دەچن."

وتی سوپا و دەزگاکانی هەواڵگریش پشتگیری پۆلیس دەکەن بە ناردنی هێز بۆ ناوچەکانی ده‌وروبه‌ری ئەو 460 بنکەی دەنگدانەی لە پارێزگاکەن بۆئەوەی رووبەڕووی هەر مەترسیەك ببنەوە و پشتگیری ئاسمانی و بەرپەچدانەوەی خێرا بۆ رووداوەکان دابینبکەن.

ئۆپەراسیۆنەكانی پێشگیری

عەتیە وتی هێزەکانی عێراق هێرشە ئاسمانیه‌ پێشگیریه‌كانیان دژی پاشماوەکانی داعش زیادکردووە لەم چەند هەفتەیەی پێشوودا بۆئەوەی هەر پلانێك بۆ هێرشکردن و کردنەئامانجی هەڵبژاردنەکە پوچەڵبکەنەوە.

وتیشی: "لە چەند هەفتەی رابردوودا چەندین ئۆپەراسیۆنی بەرفراوانی پشکنینمان ئەنجامداوە لە ناوچە جیاجیاکان و توانیمان لانیکەم 30 کەس ده‌ستگیربكه‌ین به‌ تۆمه‌تی تیرۆریزم و تاوانکاری."

حەشارگەی چەك و تفاقیش لەناوبران لە هەڵمەتەکاندا.

وتەبێژی وەزارەتی بەرگری عێراق، لیوا تەحسین خەڵەف، وتی یەکشەممە (6 ئایار) هێزەکانی عێراق دوو "تیرۆریستی گەورەیان" لە پارێزگای دیالە ده‌ستگیركرد، كه‌ یەکێکیان "بەرپرسی ئیداری ویلایەتی دیالە" بوو.

خەڵەف بە دیارونای وت هێزەکانی سەربە هەواڵگری لە دوای ئەوەی ئەو کەسەیان ده‌ستگیركرد، حەشارگەیەکی شاراوەشیان دۆزیەوە کە چەك و ئامێرێکی زۆری لێ هەڵگیرابوو.

عەتیە وتی هێزە ئەمنیەکان چەندین راهێنانیان بینیوە بۆ بەرزكردنه‌وه‌ی ئاستی ئامادەکاری و تواناکانیان بۆئەوەی پارێزگاری لە هەڵبژاردنەکە بکەن.

وتیشی هەڕەشەکانی ئەمدواییەی داعش بۆ کردنە ئامانجی هەڵبژاردنەکە تەنیا "بۆ بڵاوکردنەوەی ترسە" و هیچیتر.

وتی: "چەکدارە تیرۆریستەکان ئێستا زۆر بێتوانان بۆ ئه‌نجامدانی هێرشی گەورە و کاریگەر." باسی لەوەش کرد كه‌ "هێزە ئەمنیەکان کارەکانیان بەباشی بەڕێوەدەبەن و هەل نادەنە دەستی هیچ ترۆریستێك بە ئامانجەکانی بگات."

ئەندامێكی ئەنجومەنی پارێزگای نەینەوا، خەڵەف حەدیدی، وتی هەڕەشەکانی داعش هیچ نین جگە لە "کارێك کە لە تەنگەتاویدا" دەیکەن و ئاماژەی بۆ ئەوەش کرد كه‌ گروپەکە ئێستا "بەشێکە لە رابردوو" هەربۆیە تەنیا پروپاگەندەی بۆ ماوەتەوە.

حەدیدی بە دیارونای وت: "هێزەکانمان به‌باشی ئامادەن بۆ پاراستنی هەڵبژاردنەکە بەپێی ئەو پلانە تۆکمەیەی دانراوە و وتی "دوو پشتێنه‌ی ئەمنی" دەوری 125 ناوەندی دەنگدانی سەرەکی دەدەن لە نەینەوا.

وتی: "یەکەمیان لەلایەن پۆلیسەوە دەبێت و دووەمیشیان لەلایەن سوپاوە."

وتیشی رێگا کراوەتەوە بۆ گەیشتن بە ناوەندەکانی دەنگدان و بازگەکانیش دانراون بۆئەوەی رێگربن لە هەر پێشێلکارییەکی ئەمنی و ئاماژەی بۆ ئەوەش کرد كه‌ هێزە ئەمنیەکان لە دەرەوەی بنکەکان دەمێننەوە بەدرێژایی پرۆسەی دەنگدانەکە.

'داهاتویەکی روناکتر' بۆ عێراق

ئەندامێكی ئەنجومه‌نی پارێزگای ئەنبار نەعیم كه‌عود بە دیارونای وت پارێزگاکە "بەتەواوەتی ئامادەیە" بۆ ئه‌نجامدانی هەڵبژاردنە پەرلەمانیەکە.

وتی پلانە ئەمنەیەکەی پارێزگاکە بریتیە لە ئۆپەراسیۆنی پلانبۆکراو بۆ پاکردنەوەی بیابانی ئەنبار لە شانەکانی داعش لەوێ لەگەڵ باشکردنی ئەمنیەتی سنوورەکە بۆئەوەی رێگربن لە دزەکردن لە سوریاوە.

وتیشی هێزە ئەمنیەکان خراونەتە حاڵەتی ئامادەباشیەوە لە شار و شارۆچکەکانی ئەنبار و "دەوریه‌ و بازگەش دانراون لەگەڵ ئۆپەراسیۆنەکانی چاودێریکردن و لێکۆڵینەوە بۆ دۆزینەوەی شانە نووستووەکان".

هه‌روه‌ها وتی: "ئامادەباشی ئەمنی بۆ هەڵبژاردنەکە لەلایەنی هێز و دابینکردنی ئامێرەکانەوه‌ ئامانجەکانی به‌ده‌ستهێناوه‌." ئاماژەی بۆ ئەوەش کرد كه‌ هێزە ئەمنیەکان راهێنانیان وەرگرتووە لەسەر ئەوەی چۆن بەرپەچی خێرای هەڕەشە و رووداوە لەناکاوەکان بدەنەوە.

كه‌عود وتی: "ئەم هەڵبژاردنە داهاتویەکی روناكتر بۆ وڵات ده‌نه‌خشێنێت." جەختیشیکردەوە له‌وه‌ی داعش رێگای پێنادرێت کات بگەڕێنێتەوە دواوە و "عێراقیەکان بەرەو پێشەوە دەڕۆن بەرەو بنیاتنانی دیموکراسی."