ئاساییش

پۆلیسی ئەنبار سەرلەنوێ بنکەی قەزای روتبە دەکاتەوە

خالید تائی

image

پیاوانی پۆلیس ئاهەنگی کردنەوەی بنکەی پۆلیسی روتبە دەگێڕن لەم ناوچە سنوریەی ئەنبار. [خاوەنی وێنە: بەڕێوبەرایەتی پۆلیسی ئەنبار]

فەرماندەیی پۆلیسی ئەنبار سەرلەنوێ بنکەیەکی خۆی کردەوە لە قەزای روتبەی سەرسنور کە هێزەکانی عێراق لە 19 ئایار لەدەست "دەوڵەتی ئیسلامی لە عێراق و شام" (داعش)یان سەندەوە، بەرپرسانی ناوخۆیی بە دیارونایان وت.

بنکەکە دوای دوو ساڵ داخستن دەستیکردەوە بە چالاکی، لە هەنگاوێکدا کە بەگوێرەی بەرپرسان یارمەتیی سەپاندنی سەقامگیری دەدات لە قەزاکە و سنوری رۆژئاوای عێراقیش ئەمینتر دەکات.

فەرماندەی بنکەکە، موقەدەم عامر عەلاوی محەمەد، وتی بنکەی پۆلیسی روتبە "بنکەیەکی گرنگە لە بەشی خۆرئاوای پارێزگای ئەنباردا".

محەمەد بە دیارونای وت: "بنکەکەمان بەرپرسە لە پاراستنی ئاسایش و ماف و ماڵوموڵکی هاوڵاتیان لە سنورەکانی قەزای روتبەدا کە خاڵی پەڕینەوەی ترێبیل لەسەر سنوری ئەردەن و خاڵی پەڕینەوەی وەلید لەسەر سنوری سوریا و رێگای نێودەوڵەتییش بەرەو بەغدا لەخۆدەگرێت."

وتیشی: "پاش رزگارکردنی روتبە و پاکردنەوەی لە بۆمبی دەسکرد و مینەکان، پۆلیسی ئەنبار دەستیکردەوە بە کارکردن لە بنکەکەدا و ئێستا توانیویەتی دووبارە بیکاتەوە تا ئەرکەکانی پاراستنی ئاسایش جێبەجێبکات."

هەروەها وتی: "ژماریەکی پێویست لە پۆلیسمان هەیە کە پڕچەكکراون و ئۆتۆمبیلیان بۆ دابینکراوە تا بەتەواوی ئەرکەکانیان جێبەجێبکەن. یەکەیەکی پۆلیسی فریاگوزاری ئەنباریش، فەوجی 20، پشتگیری لە هەوڵەکانمان دەکات بۆ سەپاندنی ئاسایش و سەقامگیری لە روتبە شانبەشانی هێزەکانی سوپا."

محەمەد وتی ئەم هێزانە بارودۆخی ئەمنییان "بەتەواوی کۆنترۆڵکردووە" و ئاماژەی بەوەش دا کە "هیچ دزەکردنێکی تێرۆریستان" روینەداوە.

وتیشی ئاسایش بەرقەرارکراوە لەڕێی خاڵی پشکنینی جێگیر و گەڕۆکەوە و و لە ڕێی دەوریەی پیادەش بۆ رێگرتن لە دزەکردن و هێرشی داعش.

'ستراتیژێکی نوێی سەقامگیری'

قایمقامی قەزاکە، عیماد مەشعەل، بە دیارونای وت دووبارە کردنەوەی بنکەی پۆلیسی روتبە "سەرەتای قۆناغێکی نوێی سەقامگیرییە".

وتی: "بنکەکە ئەڵقەیەکە لەنێوان هاوڵاتیان و سیستمی ئاسایشی دەوڵەتدا و سەرلەنوێ کردنەوەشی هەنگاوێکی پێویست و پڕمانایە بۆ شارۆچکەکەمان."

هەروەها وتی ئێستا دانیشتوان دەتوانن پەیوەندیبکەن لەگەڵ هێزە ئەمنیەکان لەڕێی ئەم بنکەی پۆلیسەوە کە لەوێ دەتوانن گوزارشبدەن لە هەڕەشەکانی تێرۆر و تاوانکاری و سکاڵا تۆماربکەن لەسەر هەر پێشێلکارییەك دژ بە مافەکانیان.

مەشعەل وتی: "بنکەکە دەستیکردۆتەوە بە کار و دەرگای کراوەیە بۆ هەموو هاوڵاتیان." هەروەها وتی کاریش دەکرێت بۆ دەستبەکاربوونەوە و خستنەوەگەڕی خزمەتگوزاریەکان لە هەموو دامودەزگاکانی تری روتبەدا.

وتی بەتایبەتی دەزگا دادوەریەکان کە بەناچاری گوازرابوونەوە بۆ عامریەی فەلوجە کاتێك داعش دەستیگرت بەسەر ناوچەکەدا.

وتیشی: "ئێستا روتبە ئەمینە و ژمارەیەکی پێویست لە هێزەکانی فەوجی پۆلیسی فریاگوزاریی ئەنبار و لیوای 18 ی پۆلیسی فیدراڵی و فیرقەی 16 ی سوپای عێراقی لێیە، لەپاڵ دەوریەکانی سەرسنور و پیاوانی هۆزەکانیش."

هەروەها وتی هێزە ئەمنیەکان خەندەقێکی 15 کیلۆمەترییان لێداوە بەدەوری شارۆچکەکەدا بۆ رێگرتن لە هێرش بە ئۆتۆمبیلی بۆمبڕێژکراو و دزەکردنی گروپە توندڕەوە چەکدارەکان و لەئێستادا نیوەی کارەکەیان بەئەنجامگەیاندووە.

مەشعەل وتی: "بەوهیوایەین لە مانگێکدا تەواوی بکەین." ئاماژەی بەوەش دا کە خەندەقەکە دوو مەتر قوڵ و سێ مەتر پانە.

حوکمی یاسا دەگەڕێتەوە بۆ روتبە

ئەندامی ئەنجومەنی پارێزگای ئەنبار، عەزال فەهداوی، بە دیارونای وت: "دەستپێکردنەوەی دەوام لە بنکەی پۆلیسی روتبە ئاماژەیەکە بە گەڕانەوەی یاسا و دەسەڵاتی دەوڵەت و ژیانی ئاسایی."

فەهداوی وتی: "سەرلەنوێ کردنەوەی بنکەکە ئاسایش و ئارامی لە قەزاکە پتەوتردەکات کە ناوچەیەکی بیابانیی بەرینە و دەکەوێتە سەر هێڵی سنوری لەگەڵ سوریا و ئەردەن و سعودیە."

وتیشی: "فەرماندەیی پۆلیسی ئەنبار پلانێکی ئەمنیی سەرانسەریی ئامادەکردووە بۆ پاراستنی روتبە و شارەکانی تری پارێزگاکە."

وتی پلانەکە تەرکیز دەکاتەسەر "خێراکردنی کردنەوەی بنکە داخراوەکانی پۆلیس لە ناوچە رزگارکراوەکاندا و باشترکردنی رۆڵ و بەرپرسیارێتیە ئەمنیەکانیان و هەروەها دابینکردنی ئەندامان و چەکی پێشکەوتوو بۆیان."

فەهداوی وتیشی پلانەکە پشتدەبەستێت بە "هەماهەنگیی هاوبەش لەنێوان هەموو یەکە ئەمنی و سەربازیەکاندا، سەرلەنوێ بڵاوەپێکردنیان، زیادکردنی بەشداریکردنی دانیشتوان لە چالاکیە ئەمنیەکاندا و پاراستنی رێگا نێودەوڵەتیەکە و هەموو دەزگا گشتیەکانیش".

ئەم بابەتەت بەدڵە؟
6
0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 پیتت ماوە بینووسیت (1500 MAX)