هه‌واڵه‌كانی عێراق
ئاساییش

هێزەکانی عێراق 113 کەس دەستگیردەکەن لە ئۆپەراسیۆنە ئەمنییەکاندا له‌ سەڵاحەدین

خالید تائی

image

فەرماندەیی ئۆپەراسیۆنەکانی سامەڕا، لیوا عیماد زوهەیری لە فڕۆکەیەکەوە دەڕوانێت تا هێرشبکەنە سەر ناوچەکانی ژێردەستی پاشماوەکانی داعش لە باشوری پارێزگای سەڵاحەدین، 20 تەمموز 2019. [خاوەنی وێنە: وەزارەتی بەرگری عێراق]

دەیان پیاوی داواکراو دەستگیرکران لە میانه‌ی ئۆپەراسیۆنە ئەمنییەکاندا، کە بۆ لەناوبردنی پاشماوەکانی "دەوڵەتی ئیسلامی" (داعش) لە باشوری پارێزگای سەڵاحەدین ئەنجامدران، فەرماندەیی ئۆپەراسیۆنەکانی سامەڕا رایگەیاند.

لیوا عیماد زوهەیری سێشەممە (25 شوبات) بە دیارونای وت لە دوو هەفتەی رابردوودا، هێزەکانی فەرماندەییەکە "چەند ئۆپەراسیۆنێکی ئەمنیی تایبەت"یان ئەنجامدا.

وتی ئەو ئۆپەراسیۆنانە "چەند ناوچەیەکی ژێر بەرپرسیارێتی فەرماندەیی ئۆپەراسیۆنەکانی سامەڕا" دەگرنەوە "لە باشوری پارێزگای سەڵاحەدین، کە 13,000 کیلۆمەتر دووجا و چوار قەزا ده‌گرێته‌وه‌."

بەگوێرەی زوهەیری، ئۆپەراسیۆنەکان پێکدێن لە ئەنجامدانی هێرشی کتوپڕ و خاڵی پشکنینی چاوەڕواننەکراو، هەڵکوتانە سەر چەندین شوێن و حەشارگەی دیاریکراو و ئەنجامدانی ئۆپەراسیۆنی گەڕان و پشکنین، بەتایبەتی لە ناوچەکانی سەر سنووری پارێزگاکانی دیالە و ئەنبار.

image

سەربازانی عێراق لە فەرماندەیی ئۆپەراسیۆنەکانی سامەڕا لە ناوچە کشتوکاڵییە دوورەدەستەکان بەدوای پاشماوەکانی داعشدا دەگەڕێن، 9 کانونی دووەم. [خاوەنی وێنە: وەزارەتی بەرگری عێراق]

113 داواکراو دەستگیرکران

زوهەیری وتی: "ئەو چالاکیانە بوونە هۆی دەستگیرکردنی 113 داواکراو کە تۆمەتبارن بە تاوانی پەیوەندیدار بە تیرۆریزم و کردەوەی تاوانکاری و پێشێلکردنی یاسا."

وتی هێزەکانی عێراق دەستیشیانگرت بەسەر بڕێک تەقەمەنیدا کە لە داعش بەجێمابوون و چەند شوێنێکی حەوانەوەیان له‌ناوبرد کە خواردن و کەرەستەی لۆجستییان لەنێودابوو.

وتیشی: "گروپە تیرۆریستییەکان هەوڵدەدەن هەر دۆخێکی شڵەژان لە وڵاتەکەدا بقۆزنەوە بۆ بەردەوامیدان بە چالاکییەکانیان. دۆخێکی ناجێگیری سیاسی و ناوچەیی دەچێتە خزمەتی مانەوەی ئەوانه‌وه‌."

ناوبراو وتی: "سەرباری ئەوەش، چاودێریی ئەو گروپانە دەکەین و بەردەوام پلانەکانیان هەڵدەوەشێنینەوە و بە مشتی پۆڵایین هێرشیان دەکەینە سەر بۆئەوەی به‌ پارچه‌پارچه‌یی بیانهێڵینەوە."

یەکشەممە، هێرشێک لە شارۆچکەی ئیشاقی لە قەزای بەلەدی سەر بە پارێزگای سەڵاحەدین بووە هۆی کوشتنی کەسێک و بریندارکردنی کەسێکی دیکە.

زوهەیری وتی زۆر پێده‌چێت هێرشەکە سروشتێكی تاوانکارانەی هه‌بووبێت نه‌ك كرده‌وه‌یه‌كی تیرۆریستی.

وتیشی: "دوو چەکدار، كه‌ یه‌كێكیان تفەنگی پێبوو، ئەوی تریشیان کەرەستەیەکی هێرشکردنی دیکەی پێبوو، ئێوارەی یەکشەممە هێرشیانکردە سەر کافیتریایەکی بەناوبانگ لە ئیشاقی."

هه‌روه‌ها وتی: "ئۆپەراسیۆنەکە هێشتا لەژێر لێکۆڵینەوەدایە و هەوڵەکانمان بەردەوامن بۆ دەستگیرکردنی ئەنجامدەران و رادەستکردنیان بە دادگا."

زوهەیری ئەو راپۆرتانەی رەتكردەوە کە باس له‌ هێرشێکی تر ده‌کەن بۆسەر یاریگایەکی وەرزشی لە قەزای بەلەد و وتی "ئەو هەواڵە ساخته‌یه‌".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500