هێزەکانی عێراق رێگای سەرەکیی نێوان گەڕەکی نور و روباری دیجلەیان گرتەوە لە ناوەندی موسڵ، بەرپرسی ئۆپەراسیۆنەکانی نەینەوا نەجمەدین کەریم جەبوری سێشەممە (20 کانونی یەکەم) وتی.
جەبوری بە دیارونای وت: "کۆنترۆڵکردنی رێگای سەرەکی کە دەچێتە سەر روباری دیجلە درزێکی گەورەیە لە ریزەکانی 'دەوڵەتی ئیسلامی لە عێراق و شام' (داعش) دا و گروپەکە لە جیهانی دەرەوە دادەبڕێت."
وتی هێزەکانی عێراق ئاڵای عێراقیان لەسەر شەش بینای حکومی بەرزکردۆتەوە لە گەڕەکەکانی ئەعلام، تەمیم و بەلەدیەت لە خۆرهەڵاتی موسڵ، لەکاتێكدا شەڕ لە هەموو بەرەکانەوە بەردەوامە.
وتیشی: "هێزەکانمان زیانی قورسیان گەیاندووە بە داعش لەڕوی جەستەیی و ماددیەوە ."
وەزارەتی ناوخۆ رایگەیاند لە گۆگجەلی، باشوری موسڵ، هێزەکانی پۆلیسی نەینەوا ئێوارەی دووشەممە سێ ئەندامی "هەواڵگریی داعش"یان دەستگیرکرد.
وتەبێژی وەزارەت عەمید سەعد مەعەن لە بەیاننامەیەکی کورتدا وتی: "قارەمانەکانمان لە فەوجی 1ی لە پۆلیسی نەینەوا سێ ئەندامی داعشیان دەستگیرکرد کە کاریان دەکرد وەك بەشێك لە هەواڵگریی داعش لە خۆرهەڵاتی موسڵ."
وتی: "ئەوان لە ماڵێکدا لە گۆگجەلی دەستگیرکران."