ماڵپەری رۆژنامەی ئەهرامی میسری لە راپۆرتێکدا رایگەیاند بلۆکی ئۆپۆزسیۆنەکانی سوریا لە کۆبوونەوەیەکیان لە قاهیرە رۆژی سێشەممە ( 16 ئاب) داوای دەستپێکردنەوەی دانوستانەکانیان کردووە لەنێوان گروپە سیاسیەکانی ئەو وڵاتە بۆ گەشتن بە چارەسەرێکی دیپلۆماسیانە.
وتەبێژی گروپی ئەلغەد ئەلسوری (سبەینێی سوریا) عەلی عاسی وتی ئەوان و لیژنەی تەنسیق بۆ گۆرانکاری دیموکراتی لە کۆبونەوەیەکی هاوبەشدا داوای دووبارە دەستپێکردنەوەی دانوستانەکانیان کردوە.
عاسی وتی هەردوو بلۆکەکەی ئۆپۆزسیۆن ئاماژەیان داوە کە پرۆسە دیپلۆماسیەکە دەستپێبکەنەوە "بەبێ هیچ پێشمەرجێك" لەلایەن بەشداربووەکانەوە و بەپێی بەندەکانی کۆنفرانسی جنێف و بریارە جیهانیە پەیوەندیدارەکان.
لیژنەی تەنسیق بۆ گۆڕانکاری دیموکراتی بەسەرکردایەتی ئیسماعیل عەبدالعەزیم و ئەلغەد ئەلسوری بە سەرکردایەتی ئەحمد جەربا، کە پێشتر سەرۆکی هاوپەیمانی نیشتمانی سوریا بوو، تاوتوێی "سەرکێشیەکانیان کرد کە مەترسین بۆ سەر یەکێتی سوریا و شکۆمەندی خاکەکەی".
هەردوو نوێنەرایەتیەکە داوایان لە دەوڵەتانی عەرەب کرد پشتگیری گۆڕانکاری دیموکراتی بکەن لە سوریا "بۆ بەدەستهێنانی ئازادی و کەرامەت و عەدالەتی کۆمەڵایەتی بۆ خەڵکی سوریا."
هەردوو نوێنەرایەتیەکە وتیشیان شەڕ دژی "تیرۆریزم و دەمارگیری" و "پابەندبوون بە پرۆسەی سیاسی" دوانەیەکی "پێویستن کە لێکجوداناکرێنەوە"، داواشیان لە لایەنەکان کرد "کاربکەن بۆ یەکخستنی دنیابینی و هەوڵەکانیان".
