فەرماندەیی ئۆپەراسیۆنەکانی فەلوجە رۆژی هەینی (17 حوزەیران) رایگەیاند کە هێزەکانی عێراق گەیشتونەتە ناوەندی فەلوجە و 75%یان ئازادکردووە و ئاڵای عێراقیان لەسەر بینا حکومیەکانی ناوەندی شارەکە هەڵکردوە.
فەرماندەی ئۆپەراسیۆنەکانی فەلوجە فەریق عەبدولوەهاب ئەلساعدی بە مەوتنی راگەیاند: "هێزەکانی عێراق بینا حکومیەکانی ناوەندی فەلوجە و نەخۆشخانەی شارەکەیان کۆنترڵکردووە و 75%ی شارەکەیان گرتۆتەوە."
وتی هێشتا شەڕ دەکرێت بۆ لەناوبردنی ئەو گروپانەی "دەوڵەتی ئیسلامیی لە عێراق و شام" (داعش) کە لە ناوچەکدا ماون.
وتی: " شارەکە لەژێر کۆنترۆڵی سەربازیی ئێمەدایە و لە چەند کاتژمێری داهاتووشدا رووبەڕووی ئەو گروپە تیرۆرستیانە دەبینەوە کە ماونەتەوە."
وتی هێزە ئەمنییەکان بەردەوامن لە پێشڕەوی لەو ناوچانەی ناوەندی فەلوجەدا کە هێشتا رزگارنەکراون و ئاماژەی بەوەش کرد کە خەریکی پاککردنەوەی شەقام و بیناکانن لەو بۆمبە دەسکردانەی داعش چاندوونی بۆ دواخستنی پێشڕەویی هێزە عێراقییەکان.
