هه‌واڵه‌كانی عێراق
میدیا

دانیشتوانی کەمپی روکبان دەنگۆکانی روسیا و رژێمی سوریا به‌درۆده‌خه‌نه‌وه‌

وەلید ئەبولخەیر لە قاهیرە

چەکدارێكی جەیشی مغاویری سەورە کە گروپێكی سوپای ئازادی سوریایە و لەلایەن هاوپەیمانی نێودەوڵەتییەوە پشتیوانی لێدەکرێت ناوچەی دەوروبەری کەمپی روکبان دەپشکنێت بۆ دۆزینەوەی ئەو مینانەی داعش دایناون. [وێنەکە لە تۆڕە کۆمەڵایتەییەکاندا بڵاوبۆتەوە]

چەکدارێكی جەیشی مغاویری سەورە کە گروپێكی سوپای ئازادی سوریایە و لەلایەن هاوپەیمانی نێودەوڵەتییەوە پشتیوانی لێدەکرێت ناوچەی دەوروبەری کەمپی روکبان دەپشکنێت بۆ دۆزینەوەی ئەو مینانەی داعش دایناون. [وێنەکە لە تۆڕە کۆمەڵایتەییەکاندا بڵاوبۆتەوە]

لەبری کاركردن بۆ دڵنیابوونەوە لە رەوشێکی ژیانی شایستە بۆ دانیشتوانی کەمپی روکبان لە سوریا، روسیا و رژێمی سوریا دەستیانکردووە بە بڵاوکردنەوەی زانیاری هەڵە بۆ ناشرینکردنی ئەو هێزانەی هاوپەیمانی نێودەوڵەتی پشتیوانیانە.

میدیای سوریا زنجیرەیەك چیرۆکی پڕ لە بوختانیان بڵاوکردۆتەوە دەڵێن گوایە هێزەکانی هاوپەیمانی نێودەوڵەتی "کۆمەڵکوژییان" ئەنجامداوە لە کەمپی روکبان نزیك لە بنکەی سەربازی تەنەفی هاوپەیمانان و گوایە دانیشتوانەکە بەزۆر لە کەمپەکەدا هێڵراونەتەوە دژی ویستی خۆیان.

سەرۆکی ئەنجومەنی ناوخۆیی کەمپی روکبان محەمەد ئەحمەد دەرباس و دانیشتوانی کەمپەکە و چالاکوانان بە دیارونایان وت ئەو دەنگۆیانە "به‌ئاشكرا ساخته‌ن".

ده‌نگۆكانیان به‌درۆخسته‌وه‌ و وتیان کەمپی روکبان لەڕاستیدا لەلایەن هێزەکانی رژێمی سوریاوە گەمارۆدراوە و ناهێڵن خواردن و کەلوپەلی پزیشکی بۆ بچێت.

کەمپی روکبان له‌ سوریا کە نزیكە لە سنووری ئوردن و عێراق له‌م وێنەیەدا ده‌رده‌كه‌وێت كه‌ لەکاتی لمبارینێکی بەهێزدا گیراوە کە ئەم دواییانە ناوچەکەی گرتبۆوە. [وێنەکە لە تۆڕە کۆمەڵایتەییەکاندا بڵاوبۆتەوە]

کەمپی روکبان له‌ سوریا کە نزیكە لە سنووری ئوردن و عێراق له‌م وێنەیەدا ده‌رده‌كه‌وێت كه‌ لەکاتی لمبارینێکی بەهێزدا گیراوە کە ئەم دواییانە ناوچەکەی گرتبۆوە. [وێنەکە لە تۆڕە کۆمەڵایتەییەکاندا بڵاوبۆتەوە]

وتیشیان جەیشی مغاویری سەورە گروپێكی سوپای ئازادی سوریایە و هاوپەیمانی نێودەوڵەتی پشتگیری دەکات و هاوکارە لە پاراستنی مەدەنییەکان لە کەمپە فەرمییەکەی ئاوارەکان و چواردەوری.

جەیشی مغاویری سەورە پشتیوانی دانیشتوانی کەمپەکە و ئاوارەکانی دیکەیان کردووە بۆئەوەی پارێزراوبن لەو شوێنانەی بەدەستی رێکخراوی "دەوڵەتی ئیسلامی" (داعش)ەوەن و هێشتا مەترسین بۆ سەر ناوچەکە.

لە بەیاننامەیەکدا وتەبێژ کاپتن بیل ئوربان وتی: "فەرماندەیی ناوەندی ئەمریکا بەردەوامە لەوەی لە ئامادەباشیدا بێت بۆ هاوکاریکردنی هاوپەیمانەکانمان لە سوریا وەك ئەوەی کردوومانە پێشتریش بۆ دابینکردنی ئەمنییەتی ناوچەی هێوركردنه‌وه‌ لە تەنەف بۆ قافڵەکانی کۆمەکی مرۆیی نەتەوە یەکگرتووەکانیش کە دەدرێن بە 40,000 ئاوارە لە روکبان."

وتی: "سەرباری پروپاگەندەکانی روسیا و سوریا، بە پێچەوانەوە، ئەمریکا رێگەی نەگرتووە لە جوڵەی ئاوارەکانی دێن و دەرۆن لە کەمپی روکبان.

وتیشی: "ئەمریکا بە تەواوەتی پشتیوانی ده‌كات له‌ پرۆسەی ئازادیی هاتۆچۆی ئاوارەکان بەبێ ئەوەی زۆر لە کەس بکرێت، بۆئەوەی رێگای پارێزراو و خۆبەخشانە و سەربەرزانە بکرێتەوە بۆ ئەوانەی دەخوازن روکبان به‌جێبهێڵن."

دەنگۆ و زانیاری هەڵە

دەرباس بە دیارونای وت: "دەنگۆیەکی زۆر بڵاوکراوەتەوە لەسەر کەمپەکە بەمدواییانە لەلایەن چەند دەزگایه‌كی میدیاوە."

وتی یەکێك لەوانە ئەوەیە کە گوایە "گۆڕستانێکی بەکۆمەڵ" هەیە نزیك لە کەمپەکە و تەرمی ئەو مەدەنییانەی تیادایە کە لەلایەن سوپای ئازادی سوریاوە کوژراون، ئەمەش "به‌ئاشكرا ساخته‌یه‌".

وتی: "وەڵامدانەوەی ئەو دەنگۆیانە ئاسانە. بەڵێ گۆڕستانێك هەیە بەڵام گۆڕستانێکی ئاساییە وەك ئەو گۆڕستانانەی لە شارۆچکەکانی دیکە هەن."

وتی زیاتر لە 40,000 کەس لە کەمپەکە دەژین و کاتێك کەسێك بە هۆکاری سروشتی دەمرێت بەهۆی نەخۆشییەوە یان تەمەنی زۆر، ئەوە لەو شوێنە دەنێژرێت.

لەسەر بابەتی هاتنە ناو کەمپەکەوە، دەرباس وتی رژێمی سوریا رایگەیاندووە كه‌ تەنیا دوو خاڵی هاتن و چوون دەکاتەوە.

وتی: "هەندێك لە دانیشتوانی ناو کەمپەکە هەوڵیاندا بڕۆن بەڵام لەلایەن هێزە ئەمنییەکانی رژێمه‌وه‌ رێگرییان لێکرا بە بەهانەی ئەوەی دەبێت فایلە ئەمنییەکانی ئەو کەسانە پێداچوونەوەیان بۆ بکرێت بەر لە پێدانی مۆڵەتی رۆشتن."

وتی ئەو دانیشتوانە "گەڕانەوە کەمپەکە و رەتیانکردەوە جارێکی دیکە بڕۆنە ئەو ناوچانەی هێزە ئەمنییەکانی لێن".

پاراستنی دانیشتوانی روکبان

دەرباس وتی گروپە چەکدارەکانی لەناو کەمپەکەدان، بەتایبەتی جەیشی مغاویری سەورە، "بەڕاستی رێگەیان لە کەس نەگرتووە بڕۆن".

وتی: "هەرچی لەدەستیان بێت دەیکەن بۆئەوەی کەمپەکە و ژیانی مەدەنییەکان بپارێزن." وتیشی ئەوەش چەند کارێك لەخۆدەگرێت "وەك دوورخستنەوەی چەکدارانی داعش، کە پێدادان لەگەڵیان درووستبوو [7 ئازار] لە چواردەوری کەمپەکە."

هه‌روه‌ها وتی ژمارەیەك چەکدارانی داعش لە پێکدادانەکاندا کوژران و چواریشیان دەستگیرکران، لەهەمانکاتدا عەقید موهەنەد تەلاع لە جەیشی مغاویری سەورە برینداربوو.

كارمه‌ندێكی دابنکردنی هاوکاری لە کەمپی روکبان، تاریق نوعەیمی بە دیارونای وت رەوشەکە لەناو کەمپەکەدا تراژیدییە "بەڵام ئەمە بەهۆی گەمارۆی سەر کەمپەکەوەیە لەلایەن رژێمی سوریاوە".

وتی رژێم ناهێڵێت هاوکارییەکانی وەك خواردن و دەرمان و ئاو بێنە ناو کەمپەکەوە، چەند مانگ جارێك رێگە دەکاتەوە ئەویش دوای ئەوەی دەکەوێتە ژێر فشاری نێودەوڵەتییەوە.

نوعەیمی جەختیکردەوە كه‌ جەیشی مغاویری سەورە، کە بەرپرسیارە لە ئەمنییەتی کەمپەکە، "رێگە ناگرێت لە هاتنی کۆمەك".

وتی بە پێچەوانەوە، گروپەکانی سوپای ئازادی سوریا "بەشێك لە کەلوپەلەکانیان کە دراون بۆ چەکدارەکانیان دەیدەنە ئاوارەکان" و توانیویانە "پشتیوانی تەواوی دانیشتوانی کەمپەکە بەدەستبهێنن".

ئاوارەکان وەك کارتی سیاسی بەکاردەهێنرێن

نوعەیمی وتی: "ئەو هەواڵە ساختانه‌ی بڵاوکراونەتەوە ئامانجیان بەکارهێنانی مەدەنییەکانی ناو کەمپەکەیە وەك کارتی سیاسی لەلایەن رژێمەکانی روسیا و سوریاوه‌."

کۆنترۆڵکردنی خاڵی سنووری نێوان تەنەف و عێراق کە بنکەیەکی هاوپەیمانی نێودەوڵەتی لێیە بۆ هاوئاهەنگیکردن لەسەر هێرشە ئاسمانییەکان و راهێنانی هێزە ناوخۆییەکان لە شەڕی دژی داعشدا، پێدەچێتئامانجێکی تایبەتی سوپای پاسدارانی ئێران و هەوادارەکانی بێت.

نوعەیمی وتی دەیانەوێت بە دەنگۆکان "وێنەی ئەمریکا و گروپە ئۆپۆزسیۆنەکانی پشتگیرییان دەکرێت بشێوێنن لەکاتێكدا دەکرێت کاربکەن بۆئەوەی دڵنیابنەوە لە ژیانێکی شایستە بۆ دانیشتوانی کەمپەکە".

وتیشی دانیشتووانی روکبان لە رەوشێکی زۆر سەختدا ژیان دەکەن "بەتایبەتی لە کاتی رەوشی خراپی کەش و هەوا و سەرمای زۆر و خۆڵباریندا".

دانیشتوویه‌كی کەمپی روکبان راهیف خالیدی بە دیارونای وت رۆیشتن لە کەمپەکە بژاردەیەك نییە ئێستا بۆ زۆربەی دانیشتوانەکە، چونکە ئەمە مانای گەڕانەوەیە بۆ ناوچەکانی ژێردەستی رژێم کە لێی هەڵهاتوون.

وتی زۆربەی دانیشتوانی روکبان لە تەدمور و دێهاتەکانی پارێزگای حومس هەڵهاتوون، "ئەوانەش ئێستا لەژێر دەستی سوپای پاسداران و میلیشیاکانیدان".

خالیدی وتی ناوچەکانی دیکەش کە ئاوارەکان لێوه‌یان هەڵهاتوون ئێستا لەژێر کۆنترۆڵی رژێمی سوریا و روسیادان و "هیچ خزمەتگوزارییەکی سەرەتاییان لێ نییە".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500