وەزارەتی بەرگری عێراق دووشەممە (1 ئاب) رایگەیاند کە هێرشێکی ئاسمانی هاوپەیمانانی نێودەوڵەتی شەوی یەکشەممە کارگەیەکی ئامادەکردنی ئوتومبیلی بۆمبڕێژکراوی لە پارێزگای ئەنبار خاپورکردوە.
وتەبێژی وەزارەتەکە یەحیا رەسوڵ وتی:"کارگەکە باڵەخانەیەکی گەورە بوو، تەقەمەنیەکی زۆر و زەخیرەی سەربازی و مەکینەی لەحیمکردن و چەندین پارچەی سپێری ئوتومبیلی لەخۆگرتبوون و یەکێك بوو لە گەورەترین کارگەکانی بۆمب دروستکردن."
ناوبراو وتی:"داعش دەمێکە بەکاریدەهێنا بۆیە ئۆپەراسیۆنێکی مەزنی ئەمنی لە چواردەوریدا ئەنجامدەدا."
هەروەها وتی:"کارگەکە بەتەواوەتی خاپورکرا و نزیکەی 10 تیرۆریست لەناویدا کوژران."
وتیشی هێرشە ئاسمانیەکە بەهاوکاری هێزە زەمینیەکانی عێراق و ئاژانسی هەواڵگری نیشتمانی ئەنجامدرا.