http://diyaruna.com/ckb/articles/cnmi_di/features/2019/03/27/feature-02

×
×
پەنابەران |

عێراق هەموو ئەو هاوڵاتیانە دەگەڕێنێتەوە کە هەڵاتن بۆ سوریا

خالید تائی

خێزانە عێراقیەکانی کەمپی هۆلی سوریا خۆیان ئامادەدەکەن بۆ پەڕینەوە بۆ پارێزگای نەینەوای عێراق لە 30 ئاب. [خاوەنی وێنە: وەزارەتی کۆچ و کۆچبەران]

بەرپرسانی عێراق ئامادەکاری دەکەن بۆ گەڕاندنەوەی هەموو عێراقیەکانی دانیشتووی کەمپی هۆلی ئاوارەکانی پارێزگای حەسەکەی سوریا، لەنێویاندا ژن و منداڵانی ئەندامانی رێکخراوی "دەوڵەتی ئیسلامی" (داعش).

یاریدەدەری بەڕێوبەر لە بەڕێوبەرێتی کاروباری ئاوارەکانی وەزارەتی کۆچ و کۆچبەران، عەلی عەباس جەهانگیر وتی حکومەت "تەرکیز دەخاتە سەر گەڕاندنەوەی هەموو ئەو عێراقیانەی لە کەمپی حۆلی سوریا دەژین".

وتی: "دەستمانکردووە بە ئامادەکردنی کەمپێك بۆ وەرگرتنەوەیان لە ناوچەی کەسك، خۆرئاوای پارێزگای نەینەوا، بە توانای گشتیی 4,000 خێمە و ئەگەری زیاترەوە، بەگوێرەی داواکارییەکان."

لە دوو ساڵی رابردوودا وەزارەت 16,000 عێراقی لە کەمپی هۆله‌وه‌ گەڕاندۆتەوە، وەریگرتوونه‌ته‌وه‌ لە هێزەکانی سوریای دیموکرات (هەسەدە) و گواستونیەتەوە بۆ عێراق لەڕێگەی قەزای شەنگالی نەینەواوە.

خێزانە عێراقیەکان لە کەمپی هۆلی سوریاوە دەگەنە عێراق لە 1 تشرینی یەکەم. [خاوەنی وێنە: وەزارەتی کۆچ و کۆچبەران]

جەهانگیر وتی: "هێشتا زیاد لە 30,000 عێراقی لە کەمپەکەن." روونیکردەوە کە ئەو خەڵکە هەڵاتن و لە سنووره‌كه‌ په‌ڕینه‌وه‌ کاتێك داعش بەشێکی عێراقی گرت لە 2014.

وتی لەم ساڵانەدا هۆل ژمارەیەکی هاوشێوەی سورییەکانیشی گرتۆتەخۆ.

وتیشی بەمدواییانە، خێزانی هەزاران چەکداری عێراقی کە خۆیان رادەستی هەسەدە کرد لە باغوز گوێزراونه‌ته‌وه‌ بۆ کەمپەکە، لەنێویاندا عێراقیەکان.

جەهانگیر وتی هێزەکانی عێراق پشکنینی ئەمنیی ورد ئەنجامدەدەن بۆ ئەو تاکانەی لەلایەن هەسەدەوە رادەستدەکرێن و دڵنیایی دەدەن لەوەی ئەوانەی لە کردەی تیرۆریستیەوە تێوەگلاون دەدرێنە دادگا.

ژنانی داعش کێشە دەخولقێنن لە هۆل

بەمدواییانە شەڕی توندوتیژ هەڵگیرساوە لە هۆل لەنێوان ئەو ژنانەی بەمدواییانە گەیشتوون و هێشتا ئایدۆلۆژیای گروپەکەیان هەڵگرتووە و ئەوانیدی کە هاتنە کەمپەکە بە خێزانەوە بۆ هەڵاتن لە توندڕەوان.

چەندین دیمەنی ژنان کە دروشمی لایەنگرانەی داعشیان دەوتەوە کاتێك هەسەدە لە ناوچەی پێکدادان دەیگواستنەوە لە باغوز لە تۆڕە کۆمەڵایەتیەکان بڵاوبۆتەوە.

بەگوێرەی راپۆرتە رۆژنامەوانییەکان، لەوکاتەوەی گەیشتونەتە کەمپی هۆل ژنانی داعش کێشە دروستدەکەن، کە لەوێ ژنانی دیکە تۆمەتبار دەکەن بەوەی بێباوەڕن و دەڵێن گوایە شەریعە پەیڕەو ناکەن.

ئەم کارانە وایکرد لە بەڕێوەبەرانی کەمپ کە ژنەکان جیابکەنەوە.

پسپۆڕی ئەمنی، سەعید جەیاشی وتی بەرپرسانی عێراقی لەنزیکەوە دەڕواننە دوایین رووداوەکانی هۆل و تۆماری ڤیدیۆیی ئەو ژنانەی داعشیان لایە کە پەشیمانی نیشان نادەن و لەجیاتی ئەوە "بەڵینی دڵسۆزی تەواو بە گروپەکە دەدەن".

بە دیارونای وت: "ئەمە حسابی بۆ دەکرێت کاتێك هەموو عێراقیەکان لەلایەن به‌ڕێوبه‌رێتی کەمپەکەوە رادەستدەکرێن."

وتی پێش گەڕانەوەیان بۆ وڵات، ئەندامانی خێزانی داعشی عێراقی "چەند رێکارێکی ئەمنییان بەسەردا جێبەجێدەکرێت تا دڵنیایی بدرێت لەوەی کاریگەریی ئایدۆلۆژیای توندڕەوییان بەسەرەوە نیە یان تێوەنەگلاون لە کردەی توندوتیژی".

خێزانە لە پشکنین دەرچووەکان تێکەڵدەکرێنەوە

جەیاشی وتی ئەو خێزانانەی لەلایەن هێزە ئەمنیەکانه‌وه‌ مۆڵەتی دەرچوونیان پێدەدرێت بە بەرنامەی چاکسازیدا تێده‌په‌ڕن "بۆ یارمەتیدانیان بۆ تێکەڵبوونەوە و خۆسازاندنەوە لەگه‌ڵ کۆمەڵگە".

عێراق تائێستا 382 ئەندامی داعشی عێراقی بەدەستگەیشتووە، لەو سەدان کەسەی خۆیان رادەستی هەسەدە کرد یان دەستبەسەرکران کاتێك شەڕ لە باغوزی سوریا دەستیپێکرد لە چەند هەفتەی رابردوودا.

وتی ئەم پیاوانە لەلایەن هێزە ئەمنیەکانی عێراقەوە لێکۆڵینەوەیان لێدەکرێت.

ئەندامی ئەنجومەنی پارێزگای نەینەوا، عەلی لوەیزی وتی کەمپەکانی نەینەوا لە ناوچەکانی خازه‌ر، حەسەن شامی، جەدعە و مودەرەج هەزاران ئاوارەیان لەخۆگرتووە.

وتیشی: "گەر پلانێك هەبێت بۆ لەخۆگرتنی ژمارەیەکی زۆری ئاوارەکان لە کەمپی هۆلەوە، حکومەت دەبێت پاڵپشتی خۆی [بۆ نەینەوا] بەهێزبکات، لەبەرئەوەی سەرچاوەکانی حکومەتی خۆجێی سنووردارن و بارەکە زۆر قورسە."

ئەم بابەتەت بەدڵە؟
5

0 كۆمێنت

رێوشوێنەکانی کۆمێنت نوسین
Captcha