https://diyaruna.com/kmr/articles/cnmi_di/features/2020/02/26/feature-03

×
×
Ewlehî |

Hêzên Îraqî 39 endamên DAIŞê li girên Şerqatê dikujin

Xalid Taî

image

Du endamên hêzên elîte yên Îraqê di operasyoneke ku veşartgeheke DAIŞê li bakurê welat armanc dike cih digirin, wêne di 14ê Sibata 2020an de hatiye belavkirin. [Wêne ji Ajansa Dijî Terorîzmê ya Îraqî hatiye wergirtin]

Hêzên Ajansa Dijî Terorîzmê ya Îraqî Sêşemê (25ê Sibatê) 39 endamên "Dewleta Îslamî" (DAIŞ) ên xwe li girên navçeya Şirqatê, li parêzgeha Selahedînê, kuştin, li gorî berpirsên deverê.

"Şervanên Ajansa Dijî Terorîzmê êrîşên nişkayî Sêşemê dora demjimêr 5ê sibehê li girên di navbera Şirqatê û Bêcîyê de pêk anîn," Circis Hîcab, şaredarê Aşûrê li navçeya Şirqatê, ji Diyaruna re ragihand.

Wî got ku operasyonan "paşmahîyên DAIŞê yên li deverên Zawiya, Meşeq, Namil û Mekhûl û girên Xanûqayê armanc kirin, hêzên êrîşker bi terorîstan re ketibûn pevçûnan".

"Pevçûn, ku çend demjimêran dijêr kirin, bûn encama kuştina 39 terorîstan, di nav de serkêşên xuyayî, ku du ji wan di postên muftîyên şerîetê û serbazî cih digirtin," Hîcab got.

image

Hêzên ewlekarîyê yên Îraqî têkilîyên xwe bi şênîyên navçeya Şerqatê re xurt dikin bo alîkarîya hev di nehiştina paşmahîyên DAIŞê de bikin, wêne di 30ê Kanûna Duyema 2020an de hatiye belavkirin. [Wêne ji Wezareta Berevanîyê ya Îraqî hatiye wergirtin]

"Du veşartgeh di êrîşeke asmanî ya Hevpeymanîya Navdewletî de hatine wêrankirin," Şana Ragihandina Cengê di daxuyanîyekê de ragihand.

Daxuyanîyê dîyar kir ku veşartgehan "qasên mezin ên çek û cebilxaneyan, û herwiha belgeh, alav û kompyûter, ên ku agahîyên li dor darayîya DAIŞê dihundirandin, dihewandin".

Daxuyanîyê eşkere kir ku çar endamên hêzên Ajansa Dijî Terorîzmê di operasyonê de birîndar bûne.

"Êrîş bi baldarî hat plankirin, li ser bingeha xebateke hewalgirî ya mezin, piştî ku dronan deverên hatin armanckirin bê navber bi dirêjahîya du heftîyan şopandin," Hîcab got, û da zanîn ku desthilatdarîyên deverê "pêşwext agahdar bû ku dê operasyoneke serbazî li ser asteke bilind were pêkanîn".

Gurzeke mezin bo terorîstan

"Terorîstên li çiyayan mane rastî gurzeke dijwar li ser destê hêzên elîte hatin, û ev dever, tevî kendûkozên wê yên zehmet, êdî nema ji terorîstan re penageheke ewleh e," Hîcab got.

Operasyona Sêşemê "şopeke xerab li ser dijmin hişt û ew bi hemû pîvanan serketî bû," wî got. "[Operasyon] ew berdewama operasyonên ewlehî û êrîşên asmanî bû, yên ku penagehên terorîstan di van mehên borî de armanc kirin."

"Di encama van operasyonan de, deveraZor Kanûs, ku mîna asêgeha serekî ya endamên DAIŞê dihat naskirin, hatiye paqijkirin," wî got.

"Herwiha, hejmara terorîstên li deverên çiyayî û gundan kêm bûye û çalakîyên wan lawaz in, û êdî ew bi tenê bi şevan tev digerin, ew jî bo peydakirina pêdivîyên lojistî," Hîcab teqez kir.

"Artêşê û hêzên polîs li quntarên çiyayan bi awayekî himbiz cih girtine, û bi hevkarîyê ligel êlên Şerqatê, karîn ku hêlên îmdadê yên terorîstan li biyabana rojavayî ya welat bibirin," wî teqez kir.

"Kamîrayên bi germê kar dikin ên li ser berava çemê Diclayê hatine danîn çavdêrîya deverên çiyayê bi berdewamî dikin û gundan û navenda navçeya Şerqatê bi awayekî baş ewle dihêlin," wî got.

"Endamên DAIŞê yên li deverên çiyayî mane hatine dorpêçkirin û nikarin tu êrîşên yan çalakîyên mezin ên ku xeterîyê li ser jîyana xelkê çêbikin pê bînin," Hîcab got.

Tu vê mijarê diecibînî?
0
Na
0 KOMÊNT
Rêbazên Komentan