پێویستە عێراق کاری زیاتر بکات بۆ دڵنیابوون لەوەی ئەو هەزاران ژن و کچەی رزگاریان بووە لە توندوتیژی سێکسی له‌لایه‌ن ئەندامانی رێکخراوی "دەوڵەتی ئیسلامی" (داعش)ه‌وه، چاودێری و پاراستن و دادپەروەرییان پێبگات، نەتەوە یەکگرتووەکان سێشەممە (22 ئاب) رایگەیاند.
لە راپۆرتێکی نوێدا، نێردەی نەتەوەیەکگرتووەکان بۆ هاریکاریکردنی عێراق (یونامی) و ئۆفیسی مافەکانی مرۆڤی نەتەوەیەکگرتووەکان هۆشدارییاندا ئەو منداڵانەی لە ئەنجامی دەستدرێژی سێکسی لەدایكبوون، بۆ هه‌میشه روبه‌ڕووی مەترسی رەگەزپەرستی و دەستدرێژی ده‌بنه‌وه، ئاژانسی فرانس پرێس رایگەیاند.
کۆمسیاری باڵای نەتەوەیەکگرتووەکان بۆ مافی مرۆڤ، زەید رەعد حسێن، لە راگەیەندراوێکدا وتی: "ئه‌و زامه جەستەیی و عەقڵی و سۆزداریانه‌ی لەلایەن داعشەوە ئەنجامدراون لەدەرەوەی تێگەیشتنن."
وتیشی: "بۆ ئه‌وه‌ی قوربانیەکان ژیانیان بنیاتبنێنەوە، لەگەڵ ژیانی منداڵەکانیان، پێویستیان بە دادپەروەری و پێویستیان بە قەرەبووکردنەوەیە."
ئەو راپۆرتەی سێشەممە ئاماژە بوو بۆ ئەو دەستدرێژیە قێزەونەی دژی ژنان و کچان ئەنجامدرا، بەتایبەتی لەدژی ئێزیدیەکان لە ناوچەکانی ژێردەستی داعشدا، لەنێویاندا دەستدرێژی سێکسی، رفاندن، بە کۆیلەکردن و مامەڵەی دڕندانە و نامرۆڤانە و شەرمەزارانە.
هەروەها هۆشداریشیدا كه ئەو ژنانەی شویان بە شەڕکەرانی داعش کردووە، بە ئارەزوو یان بەبێ ئارەزووی خۆیان، روبه‌ڕووی مەترسی "رەگەزپەرستی و شێوازی سزای بەکۆمەڵ" ده‌بنه‌وه لەسەر بنەمای گومانی ئەوەی هەماهەنگییان لەگەڵ گروپەکە کردووە.
راپۆرتەکە نیگەرانییه‌كی تایبه‌تی دەربڕی سەبارەت بە بارودۆخی سەدان منداڵ کە لە ژنانی ناوچەکانی ژێردەستی داعشدا لەدایكبوون بەبێ به‌ڵگه‌نامه‌ی لەدایك بوون یان به بەڵگەنامەكانی داعشه‌وه کە لەلایەن بەغداوه په‌سه‌ندناكرێن.
کۆمسیاری باڵای نەتەوەیەکگرتووەکان بۆ مافی مرۆڤ وتی: "پێویستە حکومەت ئه‌وه مسۆگه‌ربكات كه (ئەو منداڵانە) پارێزراون لە پەراوێزخستن و دەستدرێژی."
داواشی لە بەغدا کرد دڵنیایبدات ئەو منداڵانە "نە روبەڕووی رەگەزپەرستی دەبنەوه لەڕێگەی ئاماژه‌دانه‌وه له به‌ڵگه‌نامه‌كانی له‌دایكبوونیاندا به‌وه‌ی كه له‌ده‌ره‌وه‌ی هاوسەرگیری لەدایكبوون یان باوکێکی سەر بەداعشیان هەیە و نە بیانهێڵنه‌وه بەبێ تۆمارکردنیان و بکەونەبەر مەترسیی بێوڵاتی و چەوساندنەوە و بازرگانیپێوەکردن".
