هه‌واڵه‌كانی عێراق

هێزەکانی عێراق ئیمام غەربی لەدەست داعش رزگاردەکەن

ئیمام غەربی، گوندێک 60 کیلۆمەتر باشوری موسڵ، بەتەواوی لەدەستی رێکخراوی "دەوڵەتی ئیسلامی" (داعش) رزگارکرا، فەرماندەیی ئۆپەراسیۆنە هاوبەشەکان پێنجشەممە (20 تەمموز) رایگەیاند.

داعش لە 5 تەمموزدا دزەیکردە نێو ئیمام غەربییەوە لە گەیارە، هەندێك خاکی گرت و خۆی لەنێو بیناکانیدا جێگیرکرد.

وتەبێژی فەرماندەییەکە، عەمید یەحیا رەسوڵ، وتی: "هێزەکانی عێراق بەتەواوی گوندەکەیان رزگارکرد و ئاڵای عێراقیان لەسەر بیناکانی هەڵکرد."

ره‌سوڵ بە دیارونای وت رێگای شەرگات-موسڵیش کە بەنێو گوندەکەدا دەڕوات ئێستا کراوەتەوە.

وتی نزیکەی 30 چەکداری داعش کوژران لە شەڕەکاندا، کە وایکرد ئەوانیدیکە لە ناوچەکانی تەنیشتیان هەڵبێن.

وتیشی: "چەکدارە هەڵاتووەکان ئێستا لەلایەن کۆپتەرەکانمانەوە راوەدوودەنرێن."

لە شارۆچکەی تەلەعفەری خۆرئاوای موسڵ، فڕۆکە جەنگییەکانی عێراق لە پێگە و زەخیرە سەربازییەکانی داعش دەدەن.

وەزارەتی بەرگری پێنجشەممە رایگەیاند: "ئێف 16کانی عێراق چەندین هێرشی ئاسمانییان ئەنجامداوە، چەك و زەخیرە سەربازییەکانی داعشیان کردۆتە ئامانج کە بڕێکی زۆر لە چەك و بۆمبیان تێدابووە."

وەزارەتەکە رایگەیاند: "دوو بنکەی داعش تێکشکێنران و نزیکەی شەش تیرۆریست کوژران لە عەیازیە، باکوری تەلەعفەر."

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500