هه‌واڵه‌كانی عێراق

پلانی ناوچه‌ ئه‌مینه‌كان له‌ سوریا به‌ گه‌شبینییه‌كی وریاوە پێشوازیده‌كرێت

سكرتێری گشتیی نه‌ته‌وه‌ یه‌كگرتووه‌كان، ئه‌نتۆنیۆ گوتێرێس، وتی هه‌ست به‌ هاندان ده‌كات به‌هۆی ئه‌و رێككه‌وتنه‌وه‌ كه‌ پێنجشه‌ممه‌ (4 ئایار) ئیمزاكرا له‌نێوان توركیا و روسیا و ئێراندا بۆ دیاریكردنی چه‌ند ناوچه‌یه‌كی هێور له‌ سوریا و نه‌هێشتنی ئه‌گه‌ره‌كانی شه‌ڕكردن، ئاژانسی فرانس پرێس هه‌ینی رایگه‌یاند.

روسیا و ئێران و توركیا رێككه‌وتنێكیان ئیمزاكرد بۆ دیاریكردنی چوار ناوچه‌ی ئه‌مین له‌دوای گفتوگۆكانی ئه‌ستانه‌ی پایته‌ختی كازاخستان بۆ پته‌وكردنی ئه‌و ئاگربه‌سته‌ی له‌ كانونی یه‌كه‌مدا بڕیاری له‌سه‌ر درا.

رێككه‌وتنه‌كه‌ ده‌سته‌به‌ری ئاگربه‌ستێك و رێگرتن له‌ هه‌موو جۆره‌ فڕینێك ده‌كات و هه‌روه‌ها گه‌یاندنی خێرای كۆمه‌كی مرۆیی بۆ ئه‌و ناوچه‌ دیاریكراوانه‌ و گه‌ڕانه‌وه‌ی په‌ناباران بۆیان.

وته‌بێژی نه‌ته‌وه‌ یه‌كگرتووه‌كان، ستێفان دوجاریك، له‌ به‌یاننامه‌یه‌كدا وتی گوتێرێس "پێشوازییكرد له‌ پابه‌ستبوون به‌ راگرتنی به‌كارهێنانی هه‌موو جۆره‌ چه‌كێك، به‌تایبه‌تی هێزی ئاسمانی" و گه‌یاندنی خێرای كۆمه‌كی پزیشكی و پێداویستییه‌ سه‌ره‌كییه‌كان.

وتیشی نه‌ته‌وه‌ یه‌كگرتووه‌كان پشتگیریده‌كات له‌ راوه‌ستاندنی روبه‌ڕوبوونه‌وه‌كان، به‌ڵام رونینه‌كرده‌وه‌ چ رۆڵێك ده‌بینێت.

نێردراوی نه‌ته‌وه‌ یه‌كگرتووه‌كان، ستافان دی میستورا، كه‌ وه‌ك چاودێریكه‌ر له‌ ئه‌ستانه‌ بوو، رێككه‌وتنه‌كه‌ی له‌قه‌ڵه‌مدا به‌ "هه‌نگاوێكی گرنگی ئومێدبه‌خش به‌ ئاراسته‌یه‌كی درووست".

به‌ڵام ئه‌مریكا به‌ وریاییه‌وه‌ پێشوازیی لێكرد و نیگه‌رانیی پیشاندا به‌رامبه‌ر رۆڵی ئێران وه‌ك كه‌فیل، هه‌رچه‌نده‌ ئومێده‌واریی ده‌ربڕی له‌وه‌ی كه‌ ئه‌م ته‌بابوونه‌ ده‌شێت بتوانێت رێخۆشبكات بۆ رێككه‌وتن.

له‌ماوه‌ی دوو هه‌فته‌دا گروپێكی كارا پێكده‌هێنرێت بۆ چاره‌سه‌ركردنی بابه‌ته‌ ته‌كنیكیه‌كان و هه‌ر سێ وڵاته‌كه‌ له‌سه‌ر ئه‌وه‌ رێككه‌وتن تا 4 حوزه‌یران چوار ناوچه‌كه‌ دیاریبكه‌ن.

یه‌كه‌م ناوچه‌ی هێور سه‌رجه‌می پارێزگای ئیدلیب له‌خۆده‌گرێت له‌گه‌ڵ چه‌ند به‌شێكی دیاریكراوی پارێزگاكانی لازقیه‌ و حه‌له‌ب و حه‌ما، كه‌ له‌نزیكیه‌وه‌ن.

دووه‌م ناوچه‌ چه‌ند به‌شێكی دیاریكراوی باكوری پارێزگای حومس له‌خۆده‌گرێت و سێیه‌میش هه‌ندێك له‌ ناوچه‌كانی غوته‌ی خۆرهه‌ڵات، له‌ده‌ره‌وه‌ی دیمه‌شق.

ناوچه‌ی چواره‌م هه‌ندێك به‌شی پارێزگاكانی ده‌رعه‌ و قونه‌یته‌ره‌ له‌ باشوری سوریا له‌خۆده‌گرێت، به‌گوێره‌ی یاداشتنامه‌كه‌.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500