بەرپرسان بە دیارونایان وت هێزە عێراقیەکان هەینی (10 ئازار) شەڕی "دەوڵەتی ئیسلامی لە عێراق و شام" (داعش) یان کردوە لە رۆژئاوای موسڵ و فڕۆکە جەنگیەکانی هاوپەیمانانیش 3 سەرکردەی بیانی گروپەکەیان کوشتوە.
فەرماندەی ئۆپەراسیۆنەکانی موسڵ، فەریق عەبدولئەمیر یارەڵا، رایگەیاند هێزەکان هێرشیانکردۆتە سەر گەڕەکەکانی نەبی شیت و عوگەیدات و دوای شەڕێکی زەمینی "توندوتیژ" بە پاڵپشتی هێزەکانی هاوپەیمانان لە چنگی داعشیان دەرهێناون.
وتی هێزەکان ئێستا بەردەوامن لە پێشڕەویکردن بۆ گەڕەکەکانی دیکە، ئەمەش دوای ئۆپەراسیۆنێکی گەورە کە ئامانجی گەڕان و پاککردنەوەی ناوچە ڕزگارکراوەکان بووە.
وتی: "هێزە عێراقیەکان بەرەو گەڕەکەکانی سیحە و مەتاحین پێشڕەوی دەکەن"، باسی لەوەش کرد داعش زیانی مادی و گیانی زۆری بەرکەوتووە.
لەلایەکی دیکەوە، وەزارەتی بەرگری لە بەیاننامەیەکدا رایگەیاند فڕۆکە جەنگیەکانی هاوپەیمانان حەشارگەی 3 سەرکردەی بیانی داعشیان لە گەڕەکی تەمموزی رۆژئاوای موسڵ بە ئامانج گرتووە و هەر سێکیان کوشتوون.
بەیاننامەنەکە وتی یەکێك لە کوژراوەکانی داعش ئەبو عائیشەی خەڵكی تاجیکستانە، کە شارەزای چەك و پێوەلکاندنی تەقەمەنیەکان بووە بە ئوتومبیلەوە، هەروەها ئەبو عائیشە ئەو کەسە بووە چەکی بەستووە لە فڕؤکە بێفڕۆکەوانەکان (درۆن) ی چاودێری.
بەیاننامەکە وتی: "سەرکردەی دووەم، وەزیرۆڤ ، پێشتر ئەندازیاری فرۆکەوانی روسی بووە [لەناو داعش] و بە ئەبو موحەمەدی روسی ناسراوە."
وتیشی: "سەرکردەی سێهەم ئەبو عومەر فەرەنسی، فەرەنسیەکی لەدایکبوی تونس بووە و پێشتر بەرێوەبەر بووە لە [کۆمپانیای] مارسیدس."
