هه‌واڵه‌كانی عێراق

هێزەکانی عێراق دەستدەکەن بە ئۆپەراسیۆنی گرتنەوەی ناوچەکانی رۆژئاوا

هێزەکانی عێراق رۆژی پێنجشەممە (5 تشرینی دووەم) دەستیانکرد بە هێرشێك بە ئامانجی گرتنەوەی ئەو شارۆچکانەی هێشتا لە ژێر دەستی "دەوڵەتی ئیسلامی لە عێراق و شام" (داعش)دان لە ناوچەکانی رۆژئاوای نزیك سنوری سوریا، ئاژانسی فرانس پرێس رایگەیاند.

فەرماندەی فەرماندەیی ئۆپەراسیۆنەکانی جەزیرە، فەریق قاسم محەمەد، وتی: "ئۆپەراسیۆنێکی سەربازی دەستیپێکردووە لە ناوچەکانی رۆژئاوای ئەنبار بۆ ئازادکردنیان لە دەستی داعش."

محەمەد رایگەیاند کە ئۆپەراسیۆنەکە بە رابەرایەتی فیرقەی حەوتی سوپاو پۆلیس و شەڕکەری خێڵەکانی ناوچەکە کە دژی ئەندامانی داعش وەستاونەتەوە ئەنجامدەدرێت، بەپاڵپشتی هێزی ئاسمانی هاوپەیمانی نێودەوڵەتی.

ئامانجە سەرەکیەکانی ئۆپەراسیۆنەکە ناوچەی عانە و راوە و قایمن لە شارۆچەکەکانی ئەوپەڕی رۆژئاوا بە درێژایی دۆڵی فورات، لەگەڵ بەئامانجگرتنی شارۆچکەی عانە لەسەرەتادا.

محەمەد وتی: "هێزەکانمان دەستیان بە پێشڕەوی کردووە لە حەدیسەوە بۆ عانە لە چەند ئاراستەیەکەوە."

حەدیسە هەرگیز نەکەوتە دەستی داعش کاتێك گروپەکە ناوچەیەکی زۆری عێراقی داگیرکرد لە 2014دا و جێگەی هۆزێکە کە دژی ئەندامانی داعش جەنگاوە لە ناوچەکەدا.

فەرماندەیەك لە شەڕکەرانی حەدیسە، نازم جوغەیفی، وتی: "سەعاتی سفر راگەیەندراوە بۆ ئازادکردنی ناوچەکانی رۆژئاوا."

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500