پۆلیسی فیدراڵی رۆژی پێنجشەممە (1 ئەیلول) رایگەیاند هێزەکانی ئاسایشی عێراق 2 سەرکردەی "دەوڵەتی ئیسلامی لە عێراق و شام" (داعش)یان لە دوو هەڵمەتی جیاوازدا هەمان رۆژ دەستگیرکردوە لە باکور و رۆژئاوای پارێزگای بەغدا.
سەرۆکی پۆلیسی فیدڕاڵ لیوا راید شاکر جەودەت لە کۆنفرانسێکی هەواڵدا لە بەغدا وتی:" هێزێکی هەواڵگری پۆلیسی فیدڕالی عێراق ئەم بەیانیە لە ئۆپەراسیۆنێکی گەڕان و پشکنیندا لە تەرمیەی باکوری بەغدا ئەبو عەبدوڵا مەشهەدانی دەستگیرکردوە، ئەو کەسەی کە بەرپرسی چاودێری داعش بووە لە باکوری بەناو ویلایەی بەغدا."
جەودەت وتیشی: "هاوکات هێزیکی فەوجی 8ی هەواڵگری لە ئۆپەراسیۆنێکدا لە ناوچەی زەیدانی ئەبوغرێب بەیانی پێنجشەممە خەڵەف زوبی دەستگیرکردوە، ئەو کەسەی بەرپرسی کارە ئیداریەکانی داعش بووە لە کەتیبەی حەمزە لە بەناو 'باشوری ویلایەتەکە'."