فەرماندەیی ئۆپەراسیۆنەکانی دیجلەی سوپای عێراق رۆژی دوشەممە (20 حوزەیران) رایگەیاند لە ئۆپەراسیۆنێکی ئەمنیدا چوار مۆڵگەی "دەوڵەتی ئیسلامیی لە عێراق و شام" (داعش)ی لە ناوچەی حەمرینی باشوری خۆرئاوای کەرکوك تێکشکاندووە.
فەرماندەی ئۆپەراسیۆنەکانی دیجلە فەریق مەزهەر ئەلعەزاوی لە لێدوانێکدا وتی کە هێزە هاوبەشەکانی عێراق، "چەند ئۆپەراسیۆنێکی دەستپێشخەرانەیان ئەنجامداوە لە زۆرێك لە ناوچەکانی پارێزگاکەدا و بونەتە هۆی تێکشکاندنی چوار مۆڵگەی داعش لە حەمرین."
وتی لەسەر سنوری پارێزگاکانی دیالە و سەلاحەدین لە ناوچەی عوزەیم 13 بۆمبی دەستکردیشیان پوچەڵکردۆتەوە.
عەزاوی وتی، "هێزە ئەمنییەکان پشتبەستوو بە زانیاریی هەواڵگریی، بەردەوام دەبن لە ئۆپەراسیۆنی دەستپێشخەرانە بۆ راوکردنی شانە نوستووەکانی داعش."