هه‌واڵه‌كانی عێراق
ئابوری

میلیشیاکان وەبەرهێنان و گه‌شه‌ی ئابوری لە نەینەوا پەکدەخەن

حەسەن عوبه‌یدی لە بەغدا

image

هێزەکانی عێراق لە پارێزگای نەینەوا دوای ئازادکردنی 16 گوند لە باشوری موسڵ لەدەست داعش. [وێنەکە لە Entekhab.ir وەرگیراوە]

بەرپرسانی نەینەوا میلیشیاکانی هاوپەیمانی سوپای پاسدارانی شۆڕشی ئیسلامی ئێران تۆمەتباردەکەن بە چەقبەستنی وەبەرهێنان و چالاکیەکانی کەرتی تایبەت لە پارێزگاکە.

سەرەڕای ئەو راستیەی نەینەوا نزیکەی سێ ساڵ لەمەوبەر لەدەست رێکخراوی "دەوڵەتی ئیسلامی" (داعش) ئازادکرا، وەبەرهێنان و پرۆژەسازی هێشتا سەرپێ نەکەوتوونەتەوە.

بەرپرسان دەڵێن ئەو وەبەرهێنەرانەی پرۆژەیەك لەخۆده‌گرن لە پارێزگاکە، بەتایبەتی لە دەشتی نەینەوا، رووبەڕووی چەندین ئاستەنگ لەلایەن ئه‌و میلیشیانەوە دەبنەوە کە لە ناوچەکە زاڵن.

گروپەکانی وەك کەتائیب حیزبوڵڵا، نوجەبا، بزوتنەوەی بابلیون، عەسائیب ئەهل حەق، سەرایا خوراسانی و حەشدی شەبەك، لەلایەن ئەمریکاوە خراونه‌ته‌ لیستی سزاكانه‌وه‌ بەهۆی تێوەگلانیان لە مامەڵەی خراپ دژی مافی مرۆڤ و گەندەڵیەوە لە نەینەوا.

ئەندامی پێشووی ئەنجومەنی نەینەوا، محەمەد جەبوری بە دیارونای وت وەبەرهێنان و چالاکیەکانی کەرتی تایبەت لە نەینەوا لەمڕۆدا دەناڵێنن بەدەست هەمان ئەو ئاستەنگە ئەمنیانەوە کە ژیانیان پەکخست لە پارێزگاکە لەژێردەستی داعشدا.

وتی به‌پێچه‌وانه‌ی پارێزگای ئەنباره‌وه‌، چالاکی دارایی هێشتا بەشێوەیەکی تەواو نەگەڕاوەتەوە بۆ نەینەوا.

میلیشیاکان وەبەرهێنەران لە نەینەوا دووردەخەنەوە

جەبوری وتی پرۆژەسازان و وەبەرهێنه‌ران خۆیان لە کارکردن لەو ناوچانە لادەدەن کە میلیشیاکان تێیاندا چالاکن، لەبەرئەوەی نایانەوێت مەترسی بخەنە سەر سەرمایەکەیان یان سەرکێشی ئەوە بکەن كه‌ میلیشیاکان پرۆژەکانیان پەکبخەن.

وتی بەمدواییانە، پرۆژەسازێك ناچاربوو کارەکەی لە نیوەدا بوەستێنێت کە بیناسازی بوو لە نەینەوا بەهۆی پەکخستنی لەلایەن چەکدارانی کەتائیب حیزبوڵڵا و نوجەباوە کە هەوڵیاندەدا پارە و ماددەی بیناسازیی لێ بسەنن.

بەگوێرەی جەبوری، بوونی میلیشیا کاریگەرییەکی ئیفلیجکەری هەیە لەسەر پرۆژە مامناوەند و بچووکەکان.

دوای ئەوەی ئەندامانی شەبەك هەوڵیاندا پارەی لێبکێشنەوە، مەحمود عیزەت شەنگالی، پرۆژەسازێکی پارێزگای نەینەوا کە کۆمەڵێك دوکانی وردەفرۆشیی هەیە، بڕیاریدا دوو دوکانی لە حەمدانیەی خۆرهەڵاتی موسڵ بە داخراوی بهێڵێتەوە.

شەنگالی بە دیارونای وت چەکداران مەرجیان بۆ چالاکیەکانی دانا لەو ناوچەیە و ناچاریانکرد گرێبەستکاری سەربە میلیشیاکان بەکرێ بگرێت و داوای شمەکی خۆڕایی و بەرتیلیان لێکرد لە بەرامبەر سەلامەتیی خۆیدا.

وتی هێزە ئەمنیەکانی عێراق وادەردەکەوێت له‌دوای بوونە سەرەکوەزیرانی مستەفا کازمییەوە بوێرتر بووبن، بەڵام میلیشیاکان هه‌رچی زیاتر سوودوەردەگرن لە رووکاریان لەژێر چەتری هێزەکانی حەشدی شەعبیدا بۆ ئەنجامدانی دزی و تاوانەکانی دیکە.

ئاسایشی کەمتر، کاری کەمتر، ئاوارەی کەمتر

پسپۆڕی کاروباری نەینەوا، عەلی حەدیدی بە دیارونای وت ژیان لە پارێزگاکانی دیکەی عێراق کە رزگارکران لەدەستی داعش وادیارە باشتربێت لەوەی نەینەوا، بەتایبەتی لە دەشتی نەینەوا و تەلەعفەر. وتی میلیشیای کەمتر مانای ئاسایشی زیاترە لە پارێزگاکانی دیکە و هۆکاری كواڵیتییه‌كی باشتری ژیانە.

وتی "لەئێستادا حەوت بۆ 10 گروپی میلیشیای چالاك هەن لە نەینەوا" کە ئەندامانیان هەوڵدەدەن کارنامەی خۆیان بەسەر خەڵکی ناوچەکەدا بسەپێنن.

وتی ئامادەییان ئاستەنگیشە بۆ بازاڕی موڵكوماڵ و کاری پشکداریی کشتیاریش، هەربۆیە زۆرێك لە بزنسەکانی موڵکداری و جوتیارانی ئاژەڵدار رۆیشتوون بۆ شوێنە ئه‌مینتره‌كان.

وتیشی هاوکات، هەندێك ئاوارە دوودڵن لە گەڕانەوە بۆ نەینەوا بەهۆی ئامادەیی گروپەکانی سەربە سوپای پاسدارانەوە.

حەدیدی وتی کارنامەی میلیشیاکان لە نەینەوا پێده‌چێت هاوشێوەی ئەوانە بێت کە چالاکن لە ناوچەی ئەلبوکەمالی هاوسێ لە دێرەزوور، کە له‌وێ گروپە چەکدارەکانی سەربە سوپای پاسداران ده‌بنه‌ هۆی گۆڕانکاریی دیمۆگرافی.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500