چەندبارەبووه‌نه‌وه‌ی هێرشه‌كانی ئه‌و میلیشیانه‌ی هاوپەیمانی سوپای پاسدارانی شۆڕشی ئیسلامی ئێرانن بۆسەر ناوچەی سەوز تەنیا رەوایی هەڵمەتەکانی فشاری باڵا ده‌خه‌نه‌ڕوو کە ئەمریکا سەپاندووێتی به‌سه‌ر رژێمی ئێراندا، پسپۆڕان وتیان.

لە سەرەتای ئابەوە، نزیکەی 40 هێرشی موشەکی بەرژەوەندیەکانی ئەمریکایان لە عێراق کردۆتە ئامانج. دەزگای دژە-تیرۆریزمی هەرێمی کوردستان رایگەیاند كه‌ لە 30 ئەیلول، شەش موشەك لە پارێزگای نەینەواوە نران بە فڕۆکەخانەی هەولێرەوە کە هێزەکانی ئەمریکای لێن.

دەزگای دژە-تیرۆریزم هێزەکانی حەشدی شەعبی تۆمەتبارکرد بە بەرپرسیارێتی، کە تۆڕێکی میلیشیایه‌ و لایەنەکانی هاوپەیمانی ئێران تێیدا زاڵن.

لە 28 ئەیلول، چەند موشەکێك لە گوندێکی نزیك بە فڕۆکەخانەی بەغدایان دا، کە هێزەکانی ئەمریکای لێن، پێنج منداڵ و دوو ژنیان کوشت کە سەر بە هەمان خێزان بوون.

وەزارەتی دەرەوەی ئەمریکا پەنجەی تۆمەتی بۆ میلیشیاکانی سەر بە ئێران راکێشا کە لە عێراق چالاكن و رایگەیاند كه‌ ئەوانه‌ "هەڕەشەیەکی په‌سه‌ندنه‌کراون".

پسپۆڕی سیاسی و ئەمنی، ئەحمەد حەمدانی بە دیارونای وت هێرشە موشەکیەکان بۆسەر فڕۆکەخانەی بەغدا و ناوچەی سەوز، کە نێردەكانی ئەوروپا و ئەمریكا و بەریتانیایان لێ نیشتەجێن، تەنیا دەکرێت لەلایەن سوپای پاسدارانەوە فەرمانیان پێدرابێت.

میلیشیاکانی سەر بە سوپای پاسداران لە عێراق کەتائیب حیزبوڵڵا، حەرەکات نوجەبا و عەسائیب ئەهل حەقیان تێدایە.

حەمدانی وتی هێرشەکان پشتڕاستی دەکەنەوە بۆ عێراقیەکان کە لەبەردەم هەڕەشەدان بەهۆی خواستی پاسدارانەوە بۆ "کردنی وڵاتەکە بە مەیدانی شەڕی بەوەکالەت".

وتی بۆ کۆمەڵگەی نێودەوڵەتیش رەوایی هەڵمەتی فشاری باڵای ئەمریکا رووندەکەنەوە، کە مەبەست لێی "قایلکردنی رژێمی ئێرانە بە گۆڕانکاری له‌ كرده‌وه‌كانیدا و راوەستان لە دەستێوەردان لە عێراق، سوریا، یەمەن و لوبناندا".

وتی کاتی هێرشەکان و سروشتی رێکخراویان "پشتڕاستیدەکەنەوە کە کردەی هەڕەمەکی و بێسەروبەری میلیشیاکان نین، بەڵکو کارێکی بەرنامە و پلان بۆ داڕێژراون لەلایەن سوپای پاسدارانەوە".

فەرمانڕەوایی یاسا جێگرەوەی نییە

پسپۆڕی کاروباری سیاسی له‌ عێراق، محەمەد تەمیمی بە دیارونای وت زیانێکی گەورە دەبێت بۆ عێراقیەکان گەر ئەمریکا هەڕەشەکەی جێبەجێبکات بۆ داخستنی باڵیۆزخانەکەی لە بەغدا به‌هۆی هێرشەکانی سەر ناوچەی سەوزه‌وه‌.

وتی ئەمە عێراق گۆشەگیردەکات و وتیشی عێراقیەکان چەندین دەرفەتی پشتیوانی مرۆیی، کلتوری، پەروەردەیی و ئابوری لەدەستدەدەن.

هه‌روه‌ها وتی: "لە هەمووی گرنگتر، هاوپەیمانێك له‌ده‌ستده‌ده‌ن كه‌ هۆکاری سەرەکی بوو بۆ رزگاربوون له‌ رێکخراوی 'دەوڵەتی ئیسلامی' (داعش)" -- هەمووی بەهۆی میلیشیاکانی سەر بە ئێرانەوە.

وتەبێژی فەرماندەیی ئۆپەراسیۆنە هاوبەشەکان، لیوا تەحسین خەفاجی بە دیارونای وت هێزەکانی عێراق بەردەوامدەبن لە دواکەوتنی ئەوانەی هێرشەکانیان ئەنجامداوە بە موشەکی کاتیوشا و بۆمبی دەستکرد.

وتی: "هیچ جێگرەوەیەك بۆ ئه‌منییه‌ت، نیزام و فەرمانڕەوایی یاسا نییە."

مامۆستایه‌كی پەیوەندیە نێودەوڵەتیەکان لە زانکۆی سەلاحەدین، محەمەد ئەعرەجی بە دیارونای وت خۆرهەڵاتی ناوەڕاست رووبەڕووی دۆخێکی نوێی پشێوی دەبێتەوە کە لەلایەن رژێمی ئێران و بیركاره‌كانیه‌وه‌ سازکراوە.

وتی سزاکانی ئەمریکا بۆسەر رژێمی ئێران بەشێوەیەکی بەرفراوان دەستێوەردانی ئێرانی سنووردارکردووە لە کاروباری وڵاتانی دراوسێ، هەرچەندە خەڵکی ئێران بەشێوەیەکی نەشیاو باجی قورسی كرده‌كانی سوپای پاسداران دەدەن.

'یاریکردن بە ژیانی ئێرانیەکان'

نه‌یارێكی ئێران و چالاکوانی سیاسی، موسا ئەفشەر بە دیارونای وت: "خەڵکی ئێران لەئێستادا پرسیار لەخۆیان دەکەن ئاخۆ تا چه‌ند خەڵك دەبێت برسی بێت بەهۆی خەون و خه‌وشه‌كانی رژێمەوە لە وڵاتانی دیکە."

وتی سوپای پاسداران یاری بە چارەنوسی ملیۆنان ئێرانی دەکات، کە دەناڵێنن بەدەست لەدەستدانی بەردەوامی بەهای دراوی نیشتمانی و لاوازبوونی پێوەرەکانی ژیانیانه‌وه‌، کە رەنگدانەوەی هەیە لە بەرزبوونەوەی بێوێنەی رێژه‌ی هەژاریدا.

وتی ژمارەی بێکاران لە ئێران گەیشتۆتە 30 ملیۆن و نزیکەی 40 ملیۆن ئێرانی لەئێستادا لەژێر هێڵی هەژارییەوە دەژین.

ئەفشار وتی هەندێك خێزان ئیستا مانگانە بە کەمتر لە 50 دۆلار دەژین و بەدخۆراکیی منداڵان بەربڵاوە.

ئەمە وایکردووە خەڵك پرسیاربکەن دەربارەی "بڕی ئەو پارەیەی لە موشەکی میلیشیاکاندا خەرجدەکرێت" و دەڵێن بۆچی ئەم پارانە ئاراستەی خەڵكی ئێران ناکرێن.