سیاسەت

لە یەکەم سەردانیدا بۆ بەغدا، ماکرۆن پشتیوانیدەکات له‌ سەروەریی عێراق

خالید تائی و ئاژانسی فرانس پرێس

image

سەرۆکی فەرەنسا، ئیمانوێل ماکرۆن (چەپ) و سەرەکوەزیرانی عێراق مستەفا کازمی، کە بەهۆی پەتای ڤایرۆسی کۆرۆناوە (کۆڤید-19) دەمامکیان بەستووە، کۆنفرانسێکی رۆژنامەوانی هاوبەش ئەنجامدەدەن لە بەغدا، لە 2 ئەیلول. [گۆنزالۆ فوێنتێس/ئاژانسی فرانس پرێس]

سەرۆکی فەرەنسا ئیمانوێل ماکرۆن لەگەڵ سەرەکوەزیرانی عێراق مستەفا کازمی کۆبووەوە لەکاتی یەکەم سەردانی فەرمیدا بۆ بەغدا، چوارشەممە (2 ئەیلول) و جەختیکردەوە لە سەروەریی عێراق لەنێو بارگرژییە ناوچەییە پەرەسەندووەکاندا.

ماکرۆن کە دەستبەجێ دوای گەشتێكی دوو رۆژه‌ بۆ لوبنانی پڕ له‌ قەیران، ناودارترین سەرکردەی جیهانە کە سەردانی عێراقی کردبێت لەوکاتەوەی کازمی لە ئایاردا دەسەڵاتی گرتەدەست.

ماکرۆن لە دوایین شەویدا لە بەیروت رایگەیاند كه‌ گەشتەکەی بەمەبەستی "بەگەڕخستنی پرۆژەیەکە شانبەشانی نەتەوە یەکگرتوەکان بۆ پشتیوانیکردنی پرۆسەی سەروەری".

لە بەغدا، پشتیوانیی خۆی بۆ هاوشانە عێراقیەکەی، بەرهەم ساڵح، دووپاتکردەوە بۆ یارمەتیدانی عێراق لە شەڕیدا دژی شانە نوستووەکانی رێکخراوی "دەوڵەتی ئیسلامی" (داعش) و دەستێوەردانی دەرەکی.

image

سەرۆکی عێراق بەرهەم ساڵح لەگەڵ وەزیری هێزە چەکدارەکانی فەرەنسا فلۆرێنس پارلی لە بەغدا، لە 27 ئاب کۆبووەوە. [خاوەنی وێنە: نوسینگەی سەرۆکایەتی عێراق]

ماکرۆن وتی: "عێراق ماوەی چەندین ساڵە بە دۆخێکی ئاستەنگئامێزدا تێپەڕدەبێت، بەهۆی جەنگ و تیرۆریزمەوە."

وتیشی: "تۆ قۆناغێكی گواستنەوەت له‌به‌رده‌مدایه‌ كه‌ رێبەریی بكه‌یت. فەرەنسا شانبەشانت دەوەستێت تا کۆمەڵگەی نێودەوڵەتی یارمەتیت بدات."

بەهێزکردنی سەروەریی عێراق

فەرەنسا پشتیوانیی خۆی دووپاتکردۆتەوە لەم چەند مانگە قەیراناوییەی دواییدا.

وەزیری هێزە چەکدارەکانی فەرەنسا، فلۆرێنس پارلی چەند گفتوگۆیەکی لە بەغدا بەست لە 27 ئاب و بەڵێنی پشتیوانی بەردەوامی دا بۆ عێراق لە شەڕیدا دژی پاشماوەکانی داعش.

دبلۆماتکاری باڵا، ژان-یڤس لۆ دریان کە تەنیا وەزیر بوو یاوەریی ماکرۆنی دەکرد بۆ لوبنان، لە تەمموزدا سەردانی عێراقی کرد و داوای لە بەغدا کرد "خۆی لە بارگرژییە ناوچەییەکان بپارێزێت".

هەفتەی رابردوو ماکرۆن جەختیکردەوە لەوەی "شەڕی عێراق بۆ سەروەری زۆر پێویستە".

وتی عێراقیەکان کە "زۆریان چەشتووە"، پێویستیان بە چەند بژاردەیەکە جیا لە ژێردەستەبوونی هێزە ناوچەییەکان یان تووندڕەوەکان.

سەرۆکی ده‌سته‌ی راوێژکاری لە نوسینگەی سەرۆکایەتی عێراق، عەلی شوکری سێشەممە وتی سەردانەکەی ماکرۆن جەخت لەسەر بەهێزکردنی هاریکاری ئابوری و کلتوری و ئەمنی ده‌كات لەنێوان عێراق و فەرەنسادا.

وتیشی فەرەنسا "یارمەتی هەموو هەوڵە فەرمیەکان دەدات بۆ بەهێزکردنی سەروەریی عێراق و وەك وڵاتێکی خاوەن سەروەریی تەواو مامەڵە لەگەڵ عێراق دەکات".

پشتیوانی بەردەوام دژی داعش

وانەبێژێكی زانسته‌ سیاسییه‌كان لە زانکۆی موستەنسریە، عیسام فەیلی بە دیارونای وت سەردانەکەی ماکرۆن بۆ عێراق "مێژووییە" و خزمەت بە گەشەدان بە پەیوەندییەکانی نێوان هەردوو وڵات دەكات، بەتایبەتی لە شەڕدا دژی پاشماوەکانی داعش.

وتی فەرەنسا، وەك ناسراوە، رۆڵێکی پێشەنگی هەبوو لە شه‌ڕی دژ به‌ داعشدا و بەردەوامە لە دابینکردنی پشتیوانی بۆ هێزەکانی عێراق.

وتیشی بەهۆی مەترسی بەردەوامی پاشماوەکانی ئەو گروپەوە، بەهێزکردنی هاریکاریی ئەمنی لەگەڵ فەرەنسا بۆتە پێویستییەکی هەنوکەیی تا دڵنیایی بدرێت لەوەی چەکدارەکان دووباره‌ جێپێی خۆیان ناکەنەوە.

فەیلی وتی ئەم سەردانە ئەگەری زۆرە ببێتە هۆی هەماهەنگی بەردەوام بۆ بەدواکەوتنی تۆڕە جیهانییه‌كان و پشتیوانکارانی دارایی داعش و ئاماژەیکرد بەوەی لەئێستادا عێراق داتابەیسێکی زەبەلاحی شانەکانی داعشی هەیە.

جەختیشیکردەوە لەوه‌ی عێراق پێویستی بە پسپۆڕیی فەرەنسایە تا ئەدای هێزە ئەمنیەکان باشتربکات.

وتی سەردانەکە ئاماژەیە بەوەی فەرەنسا پشتیوانی له‌ هەوڵەکانی حکومەتی عێراق ده‌كات بۆ پاراستنی سەروەری و جەختکردنەوەیه‌ لە پێگە و رۆڵی عێراق لە بەدەستهێنانی سەقامگیریی ناوچەییدا.

فەیلی وتی فەرەنسا هەوڵی فراوانکردنی پەیوەندیە ئابوریەکانی دەدات لەگەڵ عێراق، لەڕێی برەوسەندنی وەبەرهێنانه‌وه‌ لە کەرتەکانی وزە و ژێرخانی وڵاتەکەدا.

وتی فەرەنسا بەنیازی بەستنی پەیوەندیەکی ستراتیژییە لەگەڵ عێراق کە "ئامادەیی کۆمپانیاکانی وەبەرهێنان و بەشدارییان لە پرۆسەی بنیاتنانەوەدا بەهێزدەکات".

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500