هه‌واڵه‌كانی عێراق
سیاسەت

لیژنەیه‌كی باڵا له‌ عێراق لێکۆڵینەوە ده‌كات لە گەندەڵیی گەورە و کەیسەكانی تاوانکاری

خالید تائی

image

سەرەکوەزیرانی عێراق مستەفا کازمی لە کۆبونەیەکی دووشەممەدا (31 ئاب) لەگەڵ بەرپرسانی ئەمنی و سەربازیی باڵا. [خاوەنی وێنە: نوسینگەی میدیای سەرەکوەزیران]

سەرەکوەزیرانی عێراق مستەفا کازمی یەکشەممە (30 ئاب) پێکهێنانی لیژنەیەکی باڵای لێکۆڵینەوەی راگەیاند کە لێکۆڵینەوە لە گەندەڵی گەورە و کەیسە تاوانکارییەکان دەکات لە وڵاتەکەدا.

کازمی لە وتەیەکی ته‌له‌فزیۆنیدا وتی لیژنەکە دەسەڵاتی دەبێت بۆ "گەڕاندنەوەی دەسەڵاتی دەوڵەت و مافەکانی هاوڵاتیان لەدەستی پێشێلکار و گەندەڵەکان".

وتی: "هێزە ئەمنیەکان بەتەواوی دەسەڵاتیانەوە کاریانکردووە دژی ئەو گروپانەی رفاندن و تیرۆرکردن ئەنجامدەدەن و چەکی نایاسایی هه‌لده‌گرن." وتیشی ئەنجامی لێکۆڵینەوە چڕوپڕەکان بۆ ئەم بابەتانە بەمزوانە رادەگەیەنرێت.

سەرچاوەیەکی مافی مرۆڤ سێشەممە بە دیارونای وت سەرەکوەزیرانەکانی پێشووش لیژنەی باڵایان پێکهێناوە بۆ دەرخستنی کەیسە گەورەکانی گەندەڵی، بەڵام هیچ ئەنجامێکی نەبووە بەهۆی ئەو فشارەی لەلایەن لایەنە سیاسییە گەندەڵەکانەوە خراوەتەگەڕ.

image

خۆپیشاندەرانی عێراق لە مەیدانی تەحریری بەغدا لە 9 تشرینی دووەم دەڕواننە ئەو کاریکاتێرە سیاسیانەی داواکانیان بۆ شەڕکردن دژی گەندەڵی و ئەنجامدانی چاکسازی پیشانده‌ده‌ن. [دیارونا]

سەرچاوەکە، کە داوایکرد ناوی نەهێنرێت، وتی: "بەڵام لەمڕۆدا ئاماژەی گەورە هەن بەوەی هیوا هەیە لیژنەکەی حکومەتە نوێکە ئەنجامی راستەقینە و بەرچاوی هه‌بێت."

وتی هەنگاوەکە لەکاتێکدایه‌ کە "هەنگاوی جددی نراوە لەلایەن حکومەتەوە بۆ سەپاندنی فەرمانڕەوایی یاسا"، وەك هەڵمەتە ئەمنیەکان بۆ بەهێزکردنی دەسەڵات بەسەر دەروازە سنورییەکاندا و رووبەوڕوبوونەوەی گەندەڵی و قاچاخ لە دەروازەکانی هاتنەناوەوەدا.

وتی حکومەت لێکۆڵینەوەیەکیشی خستۆتەگەڕ دەربارەی کوشتنی چالاکوانان و خۆپیشاندەران.

سەرچاوەکە وتی کازمی بەڕێوبەری نوسینگەکەی، رەعد جەوحی، دیاریکرد بۆ سەرپەرشتیکردنی ئەو لیژنە باڵایەی لێکۆڵینەوە و ئاماژەیکرد بەوەی جەوحی دادوەرێکی بەئەزمونە کە سەرۆکی تیمێك بوو بۆ لێکۆڵینەوە لە سەرۆکی پێشووی لەکارخراو سەدام حسێن.

وتیشی ئەمە ئاماژەیە بە "سووربوونی ئاشکرا له‌سه‌ر گەڕاندنەوەی دەسەڵاتی دەوڵەت و جێبەجێکردنی چاکسازی جەماوەریی پێویست".

عێراقیەکان پشتیوانی له‌ چاکسازییەکان ده‌كه‌ن

شەڕی دژ به‌ گەندەڵی لە پێشەوەی ئەو داواکارییانەوە بوو کە لەلایەن خۆپیشاندەرانەوە بەرزکرانەوە لەوکاتەوەی خۆپیشاندانەکان لە کۆتایی تشرینی یەکەمی ساڵی رابردوو دەستیانپێکرد.

دوای ئەوەی لە مانگی ئایاردا دەسەڵاتی گرتەدەست، کازمی بەڵێنی دادگاییکردنی هەموو کەسە گەندەڵەکانی دا، جا پێگەیان لە وڵاتەکەدا هەرچیەك بێت.

سەرچاوەکە وتی: "ئەم کارە بەدڵنیاییەوە ئاسان نییە و ئاستەنگی گەورە دروستدەبێت کە وادەکات حکومەتی ئێستا رووبەڕووی تاقیکردنەوەیەکی زۆر سەخت ببێتەوە."

وتی بەڵام داواکاری جەماوەریی گەورە هەیە بۆ پشتیوانیكردن له‌ چاکسازی و گەر حکومەت لە هەوڵەکەیدا سەرکەوتووبێت، "گۆڕانکاریی ئەرێنی دەبینین لە هەڵوێستی جەماوەردا کە دەبێتە هۆی بەشداریكردنی زیاتر لە هەڵبژاردنە پێشوەختەکاندا کە بۆ [ناوەندی 2021] دانراون".

وتیشی ئەنجامدانی چاکسازی دەبێتە هۆی لاوازبوونی تائیفیەت، کە کەسایەتیە گەندەڵەکان هەمیشە قۆستویانەتەوە تا لەدەسەڵاتدا بمێننەوە و هاوڵاتیان گردبکەنەوە بۆ زیانگەیاندن بە پرۆسه‌ی دیموکراسی.

سەرچاوەکە وتی بەرپرسە ئەمنیەکان هەندێك سەرەداویان بەدەستگەیشتووە دەربارەی تیرۆرکردنی ئەمدواییەی چالاکوانەکان لە بەسرە و بەغدا و ئەنجامەکانی لێکۆڵینەوەکان لەکاتی تەواوبوونیاندا رادەگەیەنرێن، وەك کازمی یەکشەممە وتی.

سەرچاوەکە وتیشی: "زۆر گرنگە کە تاوانباران بدۆزرێنەوە و سزابدرێن و هەموو جۆرێك لە چەکی نایاسایی بنەبڕبکرێن، چونکە هەستی دڵنیایی دەداتە هاوڵاتیان بۆ هەڵبژاردنەکانی داهاتوو."

هه‌روه‌ها وتی دۆخی ئەمنی لە بەسرە باشتربووە دوای جێگیرکردنی هێزە ئەمنیەکان و گۆڕینی سەرکردە ئەمنییە باڵاکان.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500