هه‌واڵه‌كانی عێراق
تێرۆریزم

ئۆپەراسیۆنە هەواڵگریەکانی عێراق فشارێکی زۆر دەخەنە سەر داعش

خالید تائی

هێزەکانی دەزگای دژەتیرۆریزمی عێراق دوو ئەندامی داعش دەستگیردەکەن لە ناوەندی تەمموزدا. [خاوەنی وێنە: دەزگای دژەتیرۆریزمی عێراق]

هێزەکانی دەزگای دژەتیرۆریزمی عێراق دوو ئەندامی داعش دەستگیردەکەن لە ناوەندی تەمموزدا. [خاوەنی وێنە: دەزگای دژەتیرۆریزمی عێراق]

هێزە ئەمنیەکانی عێراق سەدان ئەندامی رێکخراوی "دەوڵەتی ئیسلامی" (داعش)یان دەستگیركردووه‌ لە سێ مانگی رابردوودا لە چەند ئۆپەراسیۆنێکی پشتبەستوو بە هەواڵگری کە سازکرابوون بۆ زیادکردنی فشار لەسەر ئەو گروپە تیرۆریستیە.

بەگوێرەی بەڕێوەبەری یەکەی هەواڵگری سوقوری وەزارەتی ناوخۆ، ئەبو عەلی بەسری، لە ئایار و حوزەیراندا هێزە ئەمنیەکان 419 چەکداریان دەستگیرکرد كه‌ بە تاوانی تیرۆریستی داواکرابوون.

دەستگیرکردنەکان لە ئەنجامی زنجیرەیەك ئۆپەراسیۆنی ئاستی باڵادا بوون کە لەلایەن یەکەکانی هەواڵگری و دژەتیرۆریزمەوە بەڕێوەبران بە هاریکاری لەگەڵ فەرماندەیی ئۆپەراسیۆنە هاوبەشەکانی وەزارەتی بەرگری لە حەوت پارێزگا، لەنێویاندا ئەنبار، نەینەوا، کەرکوك و بەغدا.

بەگوێرەی راپۆرتە رۆژنامەوانیەکان، لە 22 تەمموزدا بەسری وتی داعش پلانی دانابوو جبەخانەی چەك و تەقەمەنی و حەشارگە بۆ ئەندامانی دروستبکات، لە هەوڵێکدا بۆ پاراستنیان لە چاودێری هەواڵگریی عێراق و ئۆپەراسیۆنەکانی شوێنپێهەڵگرتن.

هێزەکانی هەواڵگریی سوپای عێراق چەندین چەك و تەقەمەنی دەدۆزنەوە لە حەشارگەیەکی داعشدا لە کەنعان، پارێزگای دیالە، لە ناوەندی تەمموزدا. [خاوەنی وێنە: بەڕێوبەرێتی هەواڵگری سەربازی]

هێزەکانی هەواڵگریی سوپای عێراق چەندین چەك و تەقەمەنی دەدۆزنەوە لە حەشارگەیەکی داعشدا لە کەنعان، پارێزگای دیالە، لە ناوەندی تەمموزدا. [خاوەنی وێنە: بەڕێوبەرێتی هەواڵگری سەربازی]

وتی: "بەڵام بەهۆی ئۆپەراسیۆنە ئاستباڵاکانەوە هەموویان لەدەستدا، کە توانای لۆجستی و دروستکردنی بۆمبی ده‌ستكردی گروپەکەی لاوازکردووە."

شانەکانی داعش هەڵوەشێنرانەوە

بەگوێرەی بەڕێوبەرێتی هەواڵگری سەربازی، ئۆپەراسیۆنەکانی هەواڵگری و دژەتیرۆریزم لە تەمموز و ئابدا بەردەوامبوون، بەجۆرێك 28 تیرۆریست لەنێوان 1 و 24 تەمموز دەستگیرکران لە ئەنبار و موسڵ و سەلاحەدین.

بەڕێوبەرێتیەکە رایگەیاند كه‌ پسپۆڕێکی لێدانی تونێلی داعش و ئەندامێکی تایبەتمەند لە دابینکردنی "سەرپەرشتیاری داعش" (موچە و یارمەتی دارایی بۆ ئەندامانی داعش و خێزانەکانیان) لەنێو ئەوانەدا بوو کە دەستگیرکران.

شیکاروانی ئەمنی عێراقی، هەیسەم خەزعەلی بە دیارونای وت دەزگای دژەتیرۆریزمی عێراق دوو ئۆپەراسیۆنی گەورەی جێبەجێکرد لە 21 و 23 تەمموزدا.

وتی یەکەمیان بووە هۆی دەستگیرکردنی شانەیەکی سێ ئەندامیی مەترسیدار کە شوێنەکانیان لە پارێزگاکانی کەرکوك و سەلاحەدین بەدواداچوونی بۆ کرابوو.

ئۆپەراسیۆنی دووەم بووە هۆی دەستگیرکردنی دوو ئەندام، کە یەکێکیان تێوەگلابوو لە رەشەکوژی کامپی سپایکەر (ئەکادیمیای ئاسمانی تکریت) له‌ 2014.

وەزارەتی ناوخۆ لە بەیاننامەیەکدا رایگەیاند كه‌ هێزەکانی عێراق دووشەممە (3 ئاب) حەوت ئەندامی داواکراوی داعشیان لە پارێزگای نەینەوا دەستگیرکرد.

خەزعەلی وتی هەوڵە هەواڵگریەکە پێشڕەوی بەدەستدەهێنێت، بەشێكی بەهۆی ئەو راستیەوه‌ کە هێزەکان پشت بە سەرچاوەی چێنراو و ددانپێدانانی تیرۆریستانی دەستگیرکراو دەبەستن.

وتی هێزەکانی عێراق "پسپۆڕیی ئەمنییان بەدەستهێناوە دەربارەی پلانەکانی دوژمن و خستنه‌گه‌ڕی ئەندامانی".

خەزعەلی وتی ئۆپەراسیۆنە ئەمنیەکان بوونەتە هۆی هەڵوەشاندنەوەی ژمارەیەك شانەی نوستوو، له‌گه‌ڵ چالاکیه‌كانی داعش لە ناوچە گوندنشینەکانی بەشەکانی باکور و خۆرهەڵاتی وڵات و بیابانی خۆرئاوا و ژێرخانی گروپەکەیان تێکشکاندووە و هێڵەکانی دابینکردنیان گرتووە.

وتی لەنێو ئەوانەدا كه‌ تەمموز دەستگیرکران "ئەبو عایشە" بوو کە پسپۆڕێکی تەقەمەنی و ئۆتۆمبیلی بۆمبڕێژکراو بوو، لەگەڵ دووان لە هاوڕێکانی.

داعش لەژێر فشاری گەورەدایە

پەرلەمه‌نتارێكی عێراق، کەتاح نەجمان ریکابی، کە ئەندامی لیژنەی ئاسایش و بەرگریە، وتی پەرلەمانتارانی عێراق لە پەیوەندی بەردەوامدان لەگەڵ فەرماندەکانی سوپا و پۆلیس و هەواڵگری بۆ تاوتوێکردنی ئۆپەراسیۆنە ئەمنیە بەردەوامەکان.

بە دیارونای وت لەڕێی بەردەوامیدان بە هەوڵە ئەمنیەکانەوە، دەستیانکردووە بە تێبینیکردنی بەهێزکردنێكی به‌رچاوی سەربازی لە چەند مانگی رابردوودا بۆ زیادکردنی فشار لەسەر شانەکانی داعش.

وتی ئەوەی ئۆپەراسیۆنە ئەمنیەکەی ئێستا جیادەکاتەوە ئەوەیە کە دوولایه‌نه‌یه‌. لەلایەکەوە، تەرکیزی لەسەر جێبەجێکردنی چەند ئۆپەراسیۆنێکی گەورەیە -- وەك هەڵمەتی "پاڵەوانانی عێراق" بۆ پاککردنەوەی بەشێكی گەورەی ناوچە ئاڵۆزەکان کە چەندین ئەشکەوتی سروشتییان تێدایە.

لەلایەکی دیکەوە، چەند ئۆپەراسیۆنێکی ئەمنی خێرا له‌خۆده‌گرێت کە زیاتر پشت بە هەواڵگری کۆکراوە دەبەستن دەربارەی چەند ئامانجێک كه‌ به‌مدواییانه‌ دەستنیشانکراون.

ریکابی وتی: "ئەم فشارە تیرۆریستانی لاوازکردووە و ئەستەمە بۆیان کۆنترۆڵی هیچ ناوچەیەك بکەن یان هەڕەشەی راستەقینەیان هەبێت. تەنیا تاکتیکیان لێدان و هەڵاتنە."

وتیشی: "تا گروپەکە بە پەرتەوازەیی بمێنێتەوە، ئەو هێرشانەی شانەکان و پێگەکانی دەکەنە ئامانج دەبێت بێوچان بن و پێویستمان بەوەیە داوا لە خەڵکی ناوچەکە بکەین بەردەوامبن لە پشتیوانیکردنی هێزە ئەمنیەکان چونکە ئەوان فاکتەرێکی زۆر گرنگن لە هاوکێشەی پاراستنی سەقامگیریدا."

ئەندامێکی دیکەی لیژنەی ئاسایش و بەرگری پەرلەمان، عەبدولخالق عەزاوی، تەرکیزی خستە سەر گرنگی هەواڵگری لە شەڕی دژ به‌ تیرۆریستاندا.

بە دیارونای وت: "لە هەوڵێکدا بۆ پاراستنی سەرکەوتنە بەدەستهاتووەکان لە شەڕدا، پێویستمان بە پاراستنی متمانەی نێوان خەڵکی ناوچەکە و ئەو هێزانە هەیە کە دەیانپارێزن."

عەزاوی وتی: "[پێویستمان بە] گەڕاندنەوەی خەڵکەکە هەیە بۆ گوندەکان و بنیاتنانەوەی گوندە چۆڵکراوەکان... کە دەکرێت مۆڵگەیەکی ئارام بۆ تیرۆریستان دابینبکەن."

وتی بۆ پاراستنی متمانەی خەڵك بە هێزە ئەمنیەکان، هەواڵگری دەبێت وردبێت و سەرنەکێشێت بۆ دەستگیرکردنی خەڵکی بێتاوان.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500