تێرۆریزم

میلیشیاکان نرخی موڵكوماڵ لە بەغدا دادەبەزێنن

حەسەن عوبێدی لە بەغدا

image

پیاوێكی عێراقی لەبەردەم هێزە ئەمنیەکاندا دەوەستێت لەکاتی خۆپیشاندانی 12 تەمموزدا لە دەرەوەی ناوچەی سەوز تا داوای جڵەوکردنی گروپە میلیشیاکان بکات. [ئەحمەد روبەیعی/ئاژانسی فرانس پرێس]

نرخی موڵكوماڵ لە گەڕەکە گرنگەکانی بەغدا بەشێوەیەکی بەرچاو دابەزیوە لە چەند مانگی رابردوودا چونکە ئەوانەی ئەگەری کڕینی خانوویان هەیە لەو ناوچانە دووردەکەونەوە کە میلیشیاکانی سەربە ئێران خۆیان لێدامەزراندووە، مامەڵەکارانی موڵكوماڵ لە ناوچەکە بە دیارونایان وت.

مامەڵەکارانی موڵكوماڵ وتیان نرخی موڵك بەڕێژەی زیاد لەسەدا 40 دابەزیوە لە گەڕەکەکانی بەغدا، وەك کەڕادە، جادریە، عەرەسات، شەقامی فەلەستین و ساڵحییە، کە دەرخستەیەکی بەرفراوانیان هەیە و داخوازی لەسەریان کەمە.

وتیان ئەمە دەکرێت بەشێكی لەبەر بوونی بنکەی میلیشیاکان بێت لەو ناوچانە.

بەڕێوبەری کۆمپانیایەکی زەویوزار لە کەڕادە، عەهد غەدیر وتی میلیشیاکانی سەربە ئێران نزیکەی 30 پێگەیان لەو ناوچانە دامەزراندووە، لەنێویاندا بنکە و رەبیە و جبەخانەکانی چەکیش.

بە دیارونای وت دانیشتوان بەهۆی بوونی میلیشیاکانەوە دوورکەوتوونەتەوە.

وتی پیاوانی میلیشیا لە ئۆتۆمبیلە بێ تابلۆکانیاندا تەقە بەهەوادا دەکەن، نمایش و گردبوونەوە رێکدەخەن، هەڕەمەکیانە رێگەکان دادەخەن و بەشێوەی دیکەش ئارامی تێکدەدەن و ئاماژەشیکرد بە بەردەوام هاویشتنی موشەکەکانی کاتیوشا بەرەو ناوچەی سەوز.

غەدیر وتی: "هەر گەڕەکێك ببینێت میلیشیا دێت و بنکە دەکاتەوە، نرخی موڵكوماڵ تیایدا دادەبەزێت چونکە دانیشتوانەکەی بیر لە جێهێشتنی دەکەنەوە."

نرخی مامناوەندی خانوو لە کەڕادە پێشتر نزیکەی 300 ملیۆن دینار (250,000 دۆلار) بوو، لەمڕۆدا نرخی مامناوەندی نزیکەی 180 ملیۆن دینار (152,000 دۆلار) یان کەمترە.

نرخی کرێش نزمبۆتەوە و زۆرێك لە خاوەن دوکانەکان چیتر حەزیان بە مانەوە نییە.

گۆڕانکاری دیمۆگرافی

خەمڵێنەرێكی موڵك، سەلام جاسم لە بەڕێوبەرێتی باجی روسافە بە دیارونای وت بنکەی میلیشیاکان "شێرپەنجەن بۆ کەرتی موڵكوماڵ و زەویوزار".

بە دیارونای وت گەڕەکە گرنگەکان، کە پێشتر تێكەڵەیەکی مەسیحی، موسڵمان، عەرەب، ئاشوری، ئەرمەنی و کوردی لێبوو، پێکهاتەی دیمۆگرافییان گۆڕاوە چونکە دانیشتوانی بەرەو ناوچە ئه‌مینتره‌كان دەڕۆن.

جاسم وتی ئەمە دۆخه‌كه‌یه‌ له‌ کەڕادە مەریەم، عەره‌سات عەلەویە، شەقامی مونتاد، ئەبو قەلام و کەڕادە داخل.

وتی حکومەتی عێراق هەنگاوی ناوە بۆ چارەسەرکردنی دۆخەکە وەك داواکردنی مۆڵەت لە کاربەدەستانی ئەمنییەوە کاتێك میلیشیاکان دەیانەوێت بنکە دابمەزرێنن لە گەڕەکەکاندا.

وتی: "بەڵام بەداخەوە ژمارەیەکی زۆر لە بنکە دامەزرێنراون لەکاتی فەرمانڕەوایی سەرەکوەزیرانی پیشوودا عادل عەبدولمەهدی."

هەواڵسازێك له‌ تەلەفزیۆنێکی خۆجێی، هانا بەتروس بە دیاورنای وت شوقه‌كه‌ی خۆی لە کەڕادە خستۆتە بازاڕەوە چونکە منداڵەکانی لە موشەکی کاتیوشای میلیشیاکان دەترسن کە دەیگرنە ناوچەی سەوز و هه‌روه‌ها له‌ هەراسانکاریشیان.

وتی بەڵام دەیتوانی تەنیا بە نیوەی بەهای خۆی بیفرۆشێت، بۆیە رۆیشتە گەڕەکی یەرموك و لەجیاتی ئەوە خانویەکی بەکرێ گرت.

وتیشی: "ئەمە سەلامەتترە. بەیانیان کە دەچیتە دەرەوە سڵاو لە دراوسێیەك یان هاوڕێیەك بکەیت باشترە لەوەی بچیتە درەوە و دەموچاوی داپۆشراو ببینیت بە روپۆشی تۆقێنەری رەشەوە."

هێرشکردنە سەر ئاسایشی عێراق

قوسەی مەلوکی، کە دوکانێکی هەیە لە جادریە، بە دیارونای وت بەشێوەیەکی کاتی لە ماڵەکەی خۆی دەرچووە تا گەڕەکەکە خه‌سڵه‌تی مەدەنی خۆی بۆ دەگەڕێتەوە.

بە دیارونای وت: "ئەندامانی حیزبوڵڵای لوبنانی و تەنانەت ئێرانیەکانیانش دێنە ئەو بنکانە. ئێمه‌ مافی ئەوەمان هەیە ژیانێکی ئارام و بێ هەراسانکاریمان هەبێت."

وتی موشەکەکانی کاتیوشا سەرچاوەی سەرەکی ترسن چونکە ئاستەنگ بۆ یاسا و په‌یڕه‌وه‌كانی عێراق دروستدەکەن و ئاماژەیکرد بەوەی "ئەوانه‌ هێندەی هێرشدەکەنە سەر ئاسایشی عێراق و هەڕەشە لە عێراقیەکان دەکەن، هێندە هێرش بۆ باڵیۆزخانەی ئەمریکا ناکەن".

وتی زۆربەی موشەکەکان دەکەونە ئەو باڵەخانانەی هاوسێی ناوچەی سەوزن.

پسپۆڕێكی سیاسەتی عێراق، محەمەد تەمیمی بە دیارونای وت رووداوەکانی ئەمساڵ روونیانکردۆتەوە کە میلیشیاکان و خەڵکی عێراق لە دوو بەرەی جیاوازی ئاوێزەی سیاسین.

بە دیارونای وت میلیشیاکان بە کۆمەڵگا نامۆن بوون و بەردەوامن لە تیرۆرکردنی کەسایەتیە گشتی و چالاکوانەکان و تێوەگلاون لە شەڕی سوریاوه‌، بە ئاشکرا دژایەتی دەوڵەتی عێراق دەکەن و موشەك دەهاوێژن بە فەرمانی ئێران.

وتیشی: "پیاوانی میلیشیا چیتر پێشوازییان لێناکرێت."

تەمیمی وتی: "خەڵك چیتر حەزناکات لەو ناوچانە بژی کە ئەم میلیشیانە بوونیان لێی هەیە، نەك تەنیا لەبەرئەوەی دەیانەوێت بە ئارامی و ئاسایش بژین، بەڵکو لەبەرئەوەش کە نایانەوێت بەهیچ جۆرێك لەگەڵ ئەوانه‌دا پێکەوە بژین."

هه‌ستده‌كه‌یت كۆمه‌ڵگه‌كه‌ت رێكخراوه‌ تێرۆریستییه‌كان ره‌تده‌كاته‌وه‌؟
0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 پیتت ماوە بینووسیت (1500 MAX)