بارگرژیەکان لە کەمپی ئاوارەکانی هول زیادیانکردووە، کە چەندین ژنی رێکخراوی "دەوڵەتی ئیسلامی" (داعش) گروپێکی پاسەوانی خۆیان دامەزراندووە و بەردەوامن لە دروستکردنی کێشە، چالاکوانێك وتی.

چالاکوانێكی بواری میدیا و کۆمەڵایەتی، عەمار ساڵح بە دیارونای وت ژنانی حیسبە ("پۆلیسی ئایینی") تێوەگلاون لە چەند كرده‌وه‌یه‌كی دڵڕەقانەی سەرکوتکردنه‌وه‌، لەنێویاندا سوتاندنی چەندین خێمە و چەقۆلێدان کە هەندێکجار کوشندە بوون.

ساڵح وتی ئامانجەکەیان ئەوەیە دەسەڵاتی خۆیان بەسەر تەواوی خێزانەکانی نێو ئەو کەمپە قەرەباڵغ و بەرفراوانەی پارێزگای حەسەکەدا بسەپێنن.

وتی كرده‌وه‌كانی ژنانی حیسبە بوونه‌ته‌ هۆی دووبەرەکی قووڵ لەنێو ژنانی داعشدا لەنێو کەمپەکە، بەجۆرێك پێکدادانه‌كانی ئەمدواییانە بارگرژیەکانیان برەوپێداوە.

دواجار ناکۆکیەکە خرایەڕوو، دوای ئەوەی چەند نامیلکەیەکی بەدەست نوسراو لەنێو کەمپەکەدا بڵاوکرانەوە کە چەند سکاڵایەکیان تێدابوو دژی كرده‌وه‌كانی حیسبە و داوای کۆتایی پێهێنانیان دەکرد.

بەگوێرەی ساڵح، ژنانی حیسبە "بەوجۆرە مامەڵەدەکەن تا دەسەڵاتی خۆیان بەسەر دانیشتوانی کەمپەکەدا بسەپێنن".

وتی هەوڵدەدەن دڵنیابن لەوەی دەتوانن بەردەوامبن لە مێشكشۆردنەوە و راکێشانی منداڵان بۆ پشتیوانی داعش و هەوڵیشدەدەن کۆنترۆڵی حەواڵە داراییەکان بکەن کە دەگەنە کەمپەکە لەگەڵ هەر کۆمەکێك و دابەشکردنیشی، کە ئه‌وله‌ویه‌تی یەکەم دەدەنە خۆیان.

کارگێڕیی کەمپەکە، بە هاریکاری له‌گه‌ڵ رێکخراوە هاریکاری و فریاگوزاریەکان، هەوڵیانداوە دژی ئەو هەوڵانەی مێشكشۆردنەوە تووندڕەوانەیە بوەستنەوە بە دابینکردنی چەند خولێك بۆ ئەو منداڵانەی ماوەیەکی زۆرە نەچوونەتە بەر خوێندن.

ساڵح وتی: "خولەکانی خوێندەواری و پیشەگەری بۆ کچان و ژنانیش دابیندەکرێن، کە بەگوێرەی تەمەن دەخرێنە پۆلەکانەوە."

وتی سەرەڕای ئەوەش، رێکخراوێکی کۆمەڵایەتی خولێکی پشتیوانی دەروونی سازده‌دات بە هاریکاری لەگەڵ کارگێڕیی کەمپەکە، تا ژنان دووربخاتەوە لە ئایدۆلۆژیای تووندڕەویی و یارمەتییان بدات بەرگەی مانەوەیان لەنێو کەمپەکەدا بگرن.