ئابوری

نەبوونی پشتیوانی دارایی بەربەست دەخاتە بەردەم هەوڵەکانی بنیاتنانەوەی نەینەوا

خالید تائی

image

ئۆتۆمبیلە خزمەتگوزاریەکان لە 21 حوزەیران هەڵمەتێك ئەنجامدەدەن بۆ چاککردنەوەی شەقامەکانی گەڕەکی سەماح لە موسڵ بەپشتیوانی بانکی جیهانی. [خاوەنی وێنە: شارەوانی موسڵ]

پلانەکانی بنیاتنانەوە لە پارێزگای نەینەوا بەربەستیان بۆ دروستبووە بەهۆی نەبوونی پشتیوانی داراییەوە، بەجۆرێك "بەشی پێویست نییە بۆ روماڵکردنی تەواوی پرۆژەکانی نۆژەنکردنەوەی ژێرخان"، بەرپرسێکی عێراق چوارشەممە (24 حوزەیران) وتی.

پەرلەمانتارێكی عێراق، كه‌ نوێنەرایه‌تی نەینەوا ده‌كات، شیروان دووبەردانی وتی لەکاتێکدا نەینەوا یادی 6 ساڵەی داگیرکردنی پارێزگاکە دەکاتەوە لەلایەن رێکخراوی "دەوڵەتی ئیسلامی" (داعش)ەوە، هێشتا بنیاتنانەوەی لەئاستی چاوەڕوانیەکاندا نییە.

بە دیارونای وت بڕی 600 ملیار دینار (نزیکەی 500 ملیۆن دۆلار) تەرخانکراوە بۆ پشتیوانی دارایی پرۆژەکانی بنیاتنانەوە لە پارێزگاکە لەمساڵدا.

وتی بەڵام ئەو پشتیوانیە داراییە "بارتەقای ئاستی گەورەی زیانه‌كان نییە کە بەر پارێزگاکە کەوتوون، کە لە هەندێك ناوچەی وەك موسڵی کۆن، دەگاتە ئاستی له‌سه‌دا 90" و وایکرد لە 2017 پەرلەمان وەك ناوچەی کارەساتباری رابگەیەنێت.

image

ئەندازیارێکی عێراق پردی حوڕییە دەپشکنێت لە موسڵ، کە لە 10 حوزەیران کرایەوە. [خاوەنی وێنە: نوسینگەی راگەیاندنی پارێزگای نەینەوا]

بەگوێرەی خەمڵاندنە فەرمیەکان، پارێزگاکە پێویستی بە لانیکەم 15 ملیار دۆلارە بۆ هەوڵەکانی بنیاتنانەوە.

دووبەردانی وتی نەبوونی پشتیوانی دارایی لەمڕۆدا ئاستەنگی سەرەکییە لەبەردەم پلانەکانی بنیاتنانەوەدا "وه‌ کێشەکە گەورەتر بووە بەهۆی لاوازیی ئێستای داهاتەکانی دەوڵەته‌وه‌ له‌ ئه‌نجامی نزمبوونەوەی نرخی نەوتدا".

وتی هێشتا هەوڵەکان بۆ گەڕاندنەوەی ژیانی ئاسایی بەردەوامن سەرەڕای ئاستەنگە داراییەکان و ئەو سەختیانەی بەهۆی پەتای ڤایرۆسی کۆرۆناوه‌ (کۆڤید-19) تووشمان بووە.

هەوڵەکان لەئێستادا بەشێوەیەکی زیاتر بۆ چاککردنەوەی خزمەتگوزارییەکانی ئاو و کارەبا و شارەوانین.

وتی پرۆژە گەورە و ستراتیژییەکان کە چاککردنەوەی پرد و کارگە و ناوەندە پزیشکی و پەروەردەییەکان له‌خۆده‌گرن، "پێویستی بە پارەی زۆرە".

دووبەردانی وتی رێکخراوە نێودەوڵەتیەکان "رۆڵێکی ئەرێنیان هەبووە لە یارمەتیدانی عێراقدا بۆ چاککردنەوەی زۆر خوێندنگە و نەخۆشخانە و دەزگا خزمەتگوزارییەکان".

وتیشی: "لەڕێی کۆبوونەوە بەردەوامەکانمانەوە لەگەڵ هاوبەشان و هاوڕێ نێودەوڵەتیەکان، دەمانەوێت پشتیوانی زیاتر بەدەستبهێنین بۆ پارێزگاکە تا هەموو پرۆژەکان تەواوبکەین، لەنێویاندا پلانەکانی بنیاتنانەوە و هەڵمەتەکان."

تکاشی کرد کە تەرکیز بخرێتە سەر بنیاتنانەوەی خانووە وێرانبووه‌كان لە شەڕی دژی داعشدا -- کە تەنیا لە موسڵی کۆن زیاد لە 20,000 خانوو بوون -- لەگەڵ هەزارانی دیکە لە شەنگال و تەلەعفەر.

وتی ئەمە کۆتایی بە مەینەتی خەڵکە ئاوارەکە دەهێنێت و ئاماژەیکرد بەوەی نزیکەی 800,000 دانیشتووی نەینەوا هێشتا لە کەمپەکانی هەرێمی کوردستان و دەوروبەری موسڵدا دەژین.

ئایا پشتگیری له‌ هه‌وڵه‌كانی هاوپه‌یمانی نێوده‌وڵه‌تی ده‌كه‌یت له‌ عێراق؟
0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 پیتت ماوە بینووسیت (1500 MAX)