چاودێران دەڵێن ئامادەباشی هێزە ئەمنییەکانی عێراق بەردەوام لە پتەوبووندایە، وەك ئۆپەراسیۆنەکانی ئەمدواییانە بۆ کردنە ئامانجی شانە نوستووەکانی رێکخراوی "دەوڵەتی ئیسلامی" (داعش) دەریانخست لە چیاکانی حەمرین.

لە سەرەتای ئەمساڵەوە، هێزە ئەمنییەکان زنجیرەیەك ئۆپەراسیۆنیان ئەنجامداوە بۆ کردنە ئامانجی ئەندامانی داعش، کە دەستکەوتی مەزنیان لێکەوتنەوە دژ بە گروپە تیرۆریستییەکە.

ئۆپەراسیۆنی سەربازیی "پاڵەوانانی عێراق" لە 12 بۆ 14 شوبات ئەنجامدرا و داعشی کردە ئامانج لە پارێزگای ئەنبار. ئەو ئۆپەراسیۆنە کە لە "له‌سه‌دا 100عێراقی" بوو، وەك تاقیکردنەوەیەکی گرنگ بینرا کە تیایدا هێزە عێراقییەکان تواناکانی شەڕیان نیشاندا.

به‌دوای ئەوەشدا ئۆپەراسیۆنی "شمشێری تیژ" لە 2 ئازار دەستیپێکرد دژ بە پاشماوەکانی داعش لە ناوچەی رۆژئاوا لە جەزیرە، کە دەکەوێتە نێوان ئەنبار و سەڵاحەدین و نەینەوا.

ئەندامانی هێزە دەستەبژێرەکانی یەکەی ئاسمانی چەندین ئەرکی چڕیان لە زنجیرە چیاکانی حەمرین ئەنجامداوە کە لە پارێزگای دیالەوە درێژدەبنەوە بە سنووری ئێرانەوە تا باشوری موسڵ.

پتەوبوونی کارامەیی هێزە ئەمنییەکان

وتەبێژی دەزگای دژە تیرۆریزم، سەباح نوعمان بە دیارونای وت هێزەکانی دەزگاکە ئۆپەراسۆنیان لەسەر زانیاری هەواڵگری ئەنجامداوە لەسەر حەشارگەکانی دوژمن لە ناوەڕاستی شوباتەوە.

وتی هێزەکانی دەزگاکە دەیان تیرۆریستیان کوشتووە کە لە گردەکانی حەمرین و خانوکە و مەحکول و عەتشانە و مەخمور خۆیان حەشاردابوو، چەندین تونێل و کۆگای هەڵگرتنی چەك و تفاق و کەلوپەلیشیان لەناوبرد.

نوعمان وتی ئەو ئۆپەراسیۆنە پلانبۆکراوانە چالاکی چەکدارانی داعشیان کەمکردووە و بەرنامە تیرۆریستییەکانیان پوچەڵکردۆتەوە و بەڕەكه‌ی لەژێر پێیان دەرهێناوه‌.

وتیشی تیرۆریستەکان لە شوێنی سەختدا خۆیان شاردۆتەوە وایانزانی پارێزراون و ناکرێنە ئامانج. "هێزەکانمان توانیویانە هێرشی لەناکاو ئەنجامبدەن بۆ پوچەڵکردنەوەی پلانەکانیان بۆ گۆڕینی گرد و شاخەکان بۆ پەناگەی ئارام."

هه‌روه‌ها وتی: "ئۆپەراسیۆنەکانمان بەگوێره‌ی راپۆرتە هەواڵگرییە ورده‌کان ئەنجامدەدرێن و بەردەوام دەبین لە سنووردارکردنی جموجۆڵکردنیان و گەمارۆدانی چەکدارانی دوژمن، تا نەتوانن فراوان ببن و دواتر ببنە هەڕەشە بۆسەر ئەمنییەتی شارە رزگارکراوەکان."

شرۆڤەکاری ئەمنی، هەیسەم خەزعەلی وتی کارامەیی هێزە ئەمنییەکان بەردەوام لە پتەوبووندایە.

بە دیارونای وت ئەم شێوازە لە پێشکەوتن "تەنیا بە ئامادەباشی سەربازی پێوەرناکرێت بەڵكو توانای هێزەکانیش بەرامبەر دوژمن لە جوگرافیا و کەشێكی نالەباردا بۆ هێشتنەوەی کۆنتڕۆڵیان بەسەر ناوچەکەدا دەبێت لەبەرچاو بگیرێت".

چیاکانی حەمرین لەڕووی ئەمنییەوە نائاسایین چونکە بەستراونەتەوە بە کوێستانەکانی باکوره‌وه‌ کە بەسەر سێ پارێزگادا درێژبوونەتەوە -- سەڵاحەدین و کەرکوك و نەینەوا.

خەزعەلی وتی لە رۆژئاواوە دەگەنە بیابانی ئەنبار و وادی حوران، قەسف و بادیە تا سنووری رۆژئاوای وڵات.

وتی: " تیرۆریستەکان، بەتایبەتی ئەوانەی لە سوریاوە دێن، ئەو کوێستانانە وەك راڕەوی ستراتیژی و پەناگەی ئارام دەبینن بۆ خۆپاراستنیان لە چاودێریکردنیان و ئۆپەراسیۆنە ئەمنییەکان ... چونکە ئەو ناوچانە حەشارگەی سروشتیiان تیادان."

وتیشی ئەندامانی داعش لە ناوچەیەکی بەرفراواندا جموجۆڵدەکەن "بە شەو تا نەبینرێن و بە شێوه‌ی ئه‌و گروپانه‌ی لە 25 کەس زیاتر نیین".

سەرکەوتنه‌ بەرجەستەكان

خەزعەلی هۆشداریدا کە شکستپیهێنانی تیرۆریستان لەو ناوچانە "ئاله‌نگارییه‌كی گەورەیە".

وتی: "هێزەکانمان سەرباری سەختییەکان توانیویانە لە شەڕەکانی پێشوودا ئەزموون پەیدابکەن کە سەرکەوتنی بەرجەستەیان تێدا بەدەستهاتن و ئەوەش ئەو پێشکەوتنە دەردەخات کە تا ئێستا بەدەستهاتووە."

وتیشی هێزە ئەمنییەکان ئێستا زۆر بەتوانان لە رووبەڕووبوونەوەی ئەم ئاله‌نگارییه‌ و گورزی جەرگبڕی یەك لە دوای یەك لە دوژمن دەوەشێنن "بەڵام هێشتا پێویستی زۆریان بە پشتیوانی ئاسمانی و ناردنی هێزی زیاتر و راهێنان و چەك هەیە".

شارەزای بواری ستراتیژی ئەحمەد شەریفی هەمان لێکدانەوەی هەبوو.

بە دیارونای وت: "هێزەكانی عێراق ئێستا توانای پیشکەوتووی شەڕیان هەیە کە لە چەند ساڵی رابردوودا به‌ده‌ستیانهێناوه‌."

وتی: "ئه‌و ئەرکە ئەمنییانه‌ی پێشتر مەحاڵ بوون یان سەخت بوون بەدەستبهێنرێن لە هەرێمە شاخاوی و بیابانەکاندا، ئێستا هێزەکانمان دەتوانن بەسەرکەوتوویی ئەنجامیانبدەن."

"ئەوە سەلمێنرا لەو زنجیرە سەرکەوتنە ئەمنییانەی لەمدواییانەدا لە چیاکانی حەمرین و شەرگات و نەینەوا و بیابانی ئەنبار بەدەستهاتن."

وتی: "شانازیدەکەین بەم پێشکەوتنەوه‌. هەرچەندە مانای ئەوە نییە کە چیدی پێویستیان بە هێزەکانی هاوپەیمانی نێودەەوڵەتی نەماوە چونکە بوون و رۆڵی ئەوان هێشتا گرنگە."

"پێویستمان بە هاوکاری ئەوانە کە دێتە سەر پشتیوانی ئاسمانی و لۆجستی و دەستگەیشتن بە روومالی رادار و سەتەلایت لەگەڵ راهێنان و چەك و شارەزایی تەکنیکی بۆ ئۆپەراسیۆنەکان."

شەریفی داوای کرد پشتیوانی هەبێت بۆ سەربەخۆبوونی هێزە ئەمنییەکان و دەزگا سەربازییەکان و "بەدوورگرتنیان لە جیاوزاییه‌ سیاسییه‌كان و دەستوەردان تا ئەرك و بەرپرسیارێتییەکانیان جێبەجێبکەن بۆ پاراستنی وڵات".