هه‌واڵه‌كانی عێراق
ئابوری

پێش بنیاتنانەوەی فڕۆکەخانەی موسڵ زەوییەکەی پاکدەکرێتەوە

خالید تائی

تیمەکانی هەڵگرتنەوەی مین فڕۆکەخانەی موسڵ رادەستی حکومەتی خۆجێی نەینەوا دەکەن دوای تەواوکردنی کارەکانیان، لە 7 تشرینی دووەم. [خاوەنی وێنە: باڵیۆزخانەی ئەمریکا لە بەغدا]

تیمەکانی هەڵگرتنەوەی مین فڕۆکەخانەی موسڵ رادەستی حکومەتی خۆجێی نەینەوا دەکەن دوای تەواوکردنی کارەکانیان، لە 7 تشرینی دووەم. [خاوەنی وێنە: باڵیۆزخانەی ئەمریکا لە بەغدا]

ئێستا کاتی دەستپێکردنی بنیاتنانەوەی فڕۆکەخانەی موسڵە دوای ئەوەی بۆمبە دەستکرد و مینە چێنراوەکانی رێکخراوی "دەوڵەتی ئیسلامی" (داعش) لە ناوچەکە هەڵگیراونەتەوە، بەرپرسانی ناوچەکە وتیان.

وتیان چاوەڕواندەکرێت دەستپێکردنەوەی خزمەتگوزاری له‌ فڕۆکەخانەی مەدەنیی شارەکە کاریگەرییەکی بەرچاوی هەبێت له‌ پشتیوانیكردنی هەوڵەکانی بنیاتنانەوەدا لە نەینەوا و ژیاندنەوەی ئابوریی پارێزگاکە.

پسپۆڕانی عێراقی و ئەمریکی زیاد لە 18 مانگە پێکەوە کاردەکەن و زیاد لە 170 بۆمبی دەستپێکرد و تەقەمەنی نەتەقیوەیان هەڵگرتۆتەوە و لەناوبردووە.

ئەلفەهد، کە کۆمپانیایەکی عێراقیە، بەشداریی کرد لە ئۆپەراسیۆنەکانی هەڵگرتنەوەی میندا لە فڕۆکەخانەکە، لەگەڵ کۆمپانیا ئەمریکیەکانی هەڵگرتنەوەی مینی جانوس و تێترا تێك.

پسپۆڕانی هەڵگرتنەوەی مینی عێراقی و ئەمریکی سەردانێکی خاکی فڕۆکەخانەی موسڵ دەکەن لە 15 تەمموز. [خاوەنی وێنە: ماڵپەڕی فڕۆکەخانەی نێودەوڵەتی موسڵ]

پسپۆڕانی هەڵگرتنەوەی مینی عێراقی و ئەمریکی سەردانێکی خاکی فڕۆکەخانەی موسڵ دەکەن لە 15 تەمموز. [خاوەنی وێنە: ماڵپەڕی فڕۆکەخانەی نێودەوڵەتی موسڵ]

بەڕێوەبەری ئەلفەهد، محەمەد عەتیە بە دیارونای وت: "ئۆپەراسیۆنەکانی هەڵگرتنەوەی مین لەگەڵ جانوس لە ئازاری 2018 دەستیانپێکرد. توانیمان له‌سه‌دا 80 پرۆژەکە تەواوبکەین بە لەناوبردنی مینە زەمینیەکان."

دواتر و بەیارمەتی تێترا تێك، کارەکان لە تشرینی دووەم تەواوکران، بە هاوکاریی بەڕێوەبەرایەتی کاروباری مینی عێراق و تیمی ئەندازیاریی سوپا لە وەزارەتی بەرگری عێراق.

وتی ئۆپەراسیۆنەکانی هەڵگرتنەوەی مین لەلایەن وەزارەتی دەرەوەی ئەمریکاوە پشتگیریی دارایی دەکرێن و ئامانجیان "دروستکردنی ژینگەیەکی سەلامەتە بۆ ئەوانەی کاردەکەن لە هەوڵەکانی بنیاتنانەوە و هەوڵەکاندا بۆ ژیاندنەوەی فڕۆکەخانەکە".

وتی ئەلفەهد بەشدارییکردووە لە پرۆژەی دیکەی لەناوبردنی میندا لە نەینەوا، لەنێویاندا به‌درێژایی هێڵێکی کارەبا لەنێوان موسڵ و بەعشیقەدا و لە دەوروبەری وێستگەی کارەبای باکوریش لە موسڵ.

وتی "پێشکەوتنی بەرچاومان بەدەستهێناوە" سەرەڕای زەبەلاحیی کێشەی مین.

بنیاتنانەوە دەکرێت دەستپێبکات

ئێستا کە خاکەکە پاککراوەتەوە، پرۆژەی بنیاتنانەوەی فڕۆکەخانەکە دەکرێت دەستپێبکات و ئەو ژێرخانەی لەلایەن داعشەوە تێکشکێنرابوو چاککبکرێتەوە و بگۆڕدرێت.

لە تەمموزدا، حکومەتی خۆجێیی نەینەوا رایگەیاند کە عێراق گرێبەستی بنیاتنانەوەی فڕۆکەخانەکەی بەخشیوەتە کۆمپانیایەکی فەرەنسی.

سەرۆکی لیژنەی ئاسایش لە ئەنجومەنی پارێزگای نەینەوا، هاشم بریفکانی بە دیارونای وت چاوەڕواندەکرێت کاری بنیاتنانەوە 16 مانگی بوێت تا تەواو دەبێت.

وتی فڕۆکەخانەکە زیانی زۆری بەرکەوتووە، داڵانەکانی، هۆڵەکانی گەیشتن و دەرچوون و بورجەکانی کۆنترۆڵ له‌لایه‌ن داعشەوە زیانیان پێگه‌یه‌ندرابوو یان بۆمبڕێژکرابوون.

ئەو فڕۆکەخانەیە، کە لە 1920 بنیاتنراوە، لە 2008 بۆ گەشتی ئاسمانی کرایەوە و پلانێکی گەورە بۆ فراوانکردنی دانرا، بەڵام دوای داگیرکاریی داعش لە موسڵ وەستێنرا.

ئەندامی ئەنجومەنی پارێزگای نەینەوا حوسامەدین عەبار بە دیارونای وت فڕۆکەخانەی موسڵ "یەکێکە لە کۆنترین فڕۆکەخانە مەدەنیەکان لە وڵاتەکەدا و دادەنرا بە فڕۆکەخانەی سەرەکی لە پارێزگاکەمان پێشئەوەی تیرۆریستانی داعش وێرانی بكه‌ن".

وتی کردنەوەی فڕۆکەخانەکە "سەرکەوتنێکی گەورە دەبێت بۆ پارێزگاکەمان".

وتیشی: "ئەمە كۆمه‌كی ئاسانکاریكردن ده‌كات بۆ هاتوچۆی شاندە فەرمی و وەبەرهێنەکان کە دێن بۆ نەینەوا و دەرهاویشتەی ئابوری و گواستنەوە و هاتوچۆی بازرگانی باشتردەکات."

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500