https://diyaruna.com/ckb/articles/cnmi_di/features/2019/10/25/feature-02

ئاساییش |

هێزه‌كانی عێراق هه‌ڵده‌كوتنه‌ سه‌ر پاشماوه‌كانی داعش له‌ باخه‌كانی دیاله‌

خالید تائی

image

ئۆتۆمبیله‌ سه‌ربازییه‌كان له‌ گونده‌ كوشتوكاڵییه‌كانی پارێزگای دیاله‌ له‌ 26 ئاب جێگیركران بۆ له‌ناوبردنی پاشماوه‌كانی داعش [خاوه‌نی وێنه‌: وه‌زاره‌تی به‌رگری عێراق]

هێزه‌كانی عێراق پێنجشه‌ممه‌ (24 تشرینی یه‌كه‌م) ئۆپه‌راسیۆنێكی ئه‌منییان ده‌ستپێكرد بۆ كردنه‌ ئامانجی پاشماوه‌كانی "ده‌وڵه‌تی ئیسلامی" (داعش) كه‌ له‌ باخه‌كانی پارێزگای دیاله‌ خۆیان حه‌شارداوه‌.

ئۆپه‌راسیۆنه‌كه‌، كه‌ له‌ سێ لاوه‌ ده‌ستیپێكرد، چه‌ندین یه‌كه‌ی پۆلیسی دیاله‌ و فیرقه‌ی 5ی سوپای عێراق له‌خۆده‌گرێت، له‌گه‌ڵ ئاژانسه‌ ئه‌منی و هه‌واڵگرییه‌كان.

ئۆپه‌راسیۆنه‌كه‌ باخه‌كان و زه‌وییه‌ كشتوكاڵییه‌كان ده‌گرێته‌وه‌ به‌ مه‌ودای نزیكه‌ی یه‌ك كیلۆمه‌تر دووجا له‌ گونده‌كانی ئه‌بو خه‌نازیر، عه‌بدول حه‌مید، كاسیبه‌، ئه‌بو كه‌رمه‌، موخه‌یسه‌ و بوده‌جه‌ له‌ هه‌وزی وه‌قف، 30 كیلۆمه‌تر له‌ باكوری خۆرهه‌ڵاتی به‌عقوبه‌.

به‌ڕێوبه‌ری راگه‌یاندنی پۆلیسی دیاله‌، عه‌قید نیهاد محه‌مه‌د حه‌سه‌ن وتی: "ئۆپه‌راسیۆنه‌كه‌ به‌شێكه‌ له‌ پلانێكی ئه‌منی كه‌ هه‌فته‌یه‌ك پێش ئێستا ده‌ستمانپێكرد و پێكدێت له‌ زنجیره‌یه‌ك رێوشوێنی تووند بۆ له‌ناوبردنی پاشماوه‌كانی تیرۆریزم و وێرانكردنی حه‌شارگه‌ نهێنییه‌كانیان له‌ ناوچه‌ی باخه‌كان."

image

هێزه‌كانی پۆلیسی دیاله‌ هه‌ڵمه‌تێكی گه‌ڕان و پشكنینیان ئه‌نجامدا بۆ حه‌شارگه‌كانی داعش له‌ ناوچه‌ كشتوكاڵییه‌كانی قه‌زای موقدادیه‌ له‌ 17 تشرینی دووه‌م 2017. [خاوه‌نی وێنه‌: وه‌زاره‌تی به‌رگری عێراق]

ناوبراو به‌ دیارونای وت ئۆپه‌راسیۆنه‌كه‌ پێش جێگیربوونی یه‌كه‌كانی فه‌وجی 9ی فریاگوزاریی دیاله‌ و فیرقه‌ی 5ی پیاده‌ له‌ ده‌وروبه‌ر و ناوه‌وه‌ی گونده‌ كشتوكاڵییه‌كان ده‌ستپێكرا.

وتی خاڵه‌كانی پشكنین و به‌ربه‌سته‌كان زیادكراون "بۆ دابینكردنی پاراستنی ته‌واو بۆ دانیشتوانان له‌ ئه‌گه‌ری هه‌ر هێرشێكی له‌ناكاو یان دزه‌كردنێك له‌لایه‌ن دوژمنه‌وه‌".

حه‌سه‌ن وتی هێزه‌كانی عێراق پێنجشه‌ممه‌ پێنج شوێنی حه‌وانه‌وه‌ی داعشیان له‌ناوبرد كه‌ چه‌ندین چه‌ك، ته‌قه‌مه‌نی ده‌ستكرد، خواردن، جلوبه‌رگ و رایه‌خیان له‌نێودابوو.

چاوه‌ڕوانده‌كرێت ئۆپه‌راسیۆنه‌كه‌ به‌ چه‌ند قۆناغێكی جیاواز به‌رده‌وامبێت بۆ گه‌یشتن به‌ ناوچه‌ كشتوكاڵییه‌ گه‌وره‌كان كه‌ ده‌كه‌ونه‌ سه‌ر كه‌ناراوه‌كانی روباری دیاله‌ له‌ ده‌وروبه‌ری ناوچه‌ی ئه‌بو سه‌یدا.

پۆلیسی دیاله‌ شه‌ڕ دژی بێیاسایی ده‌كات

هاوكات، پێنجشه‌ممه‌ هه‌واڵی چه‌ندین رووداوی كوشتن له‌ ئه‌بو سه‌یدا له‌ ناحیه‌ی موقدادییه‌ بڵاوبووه‌وه‌.

حه‌سه‌ن وتی: "به‌ڕێوبه‌ری ئه‌بو سه‌یدا، حارس روبه‌یعی به‌ره‌به‌یانی دوێنێ كوژرا له‌لایه‌ن كه‌سێكی نزیك له‌ خۆیه‌وه‌."

ناوبراو وتی: "دوای رووداوه‌كه‌، چه‌ند دژه‌ هێرشێك بوونه‌ هۆی كوشتنی چه‌ندین كه‌س، له‌نێویاندا سه‌رۆكی ئه‌نجومه‌نی شاره‌وانی ناحیه‌كه‌، سه‌عد سه‌ریاوی و كوڕه‌كه‌ی و یه‌كێك له‌ پاسه‌وانه‌كانی."

چه‌ند راپۆرتێكیش هه‌بوون كه‌ عه‌قید محه‌مه‌د حومه‌یری، به‌ڕێوبه‌ری نشینگه‌ی ناحیه‌كه‌، كوژرا، به‌ڵام حه‌سه‌ن پشتڕاستیكرده‌وه‌ كه‌ حومه‌یری "له‌ هێرشێكی چه‌كداریدا برینداركرا و گوێزرایه‌وه‌ بۆ نه‌خۆشخانه‌ و ئێستا له‌ دۆخێكی باشدایه‌."

حه‌سه‌ن وتی فه‌رمانده‌یی پۆلیس "به‌دواداچوون بۆ ئه‌و رووداوه‌نه‌ ده‌كات و ده‌ستبه‌جێ لیژنه‌ی لێكۆڵینه‌وه‌شی بۆ روودوه‌كان پێكهێناوه‌". وتیشی ئه‌نجامه‌ سه‌ره‌تاییه‌كان ئه‌وه‌ ده‌رده‌خه‌ن كه‌ ئه‌و رووداوانه‌ له‌ ئه‌نجامی كرده‌وه‌ی تاوانكارییه‌وه‌ بوون و په‌یوه‌ندییان به‌ تیرۆریزمه‌وه‌ نییه‌.

هه‌روه‌ها وتی: "لێكۆڵینه‌وه‌كه‌مان به‌رده‌وامه‌ بۆئه‌وه‌ی ته‌واوی ورده‌كارییه‌كان ئاشكرابكه‌ین، له‌ دوو رۆژی داهاتووشدا ئه‌نجامی ته‌واوتی لێكۆڵینه‌وه‌كان راده‌گه‌یه‌نین."

ئاماژه‌ی بۆ ئه‌وه‌ش كرد كه‌ فه‌رمانده‌یی پۆلیسی دیاله‌ "رێگه‌ به‌ بێیاسایی و پێشێلكردنی یاسا یان تێكدانی سه‌قامگیری نادات له‌ پارێزگاكه‌".

حه‌سه‌ن وتی قه‌ده‌غه‌كردنی هاتوچۆ له‌ ئه‌بو سه‌یدا راگه‌یه‌نرا له‌ ته‌واوی قه‌زای موقدادییه‌دا بۆ گه‌ڕان به‌دوای ئه‌نجامده‌راندا. داواشی له‌ دانیشتوانی ناوچه‌كه‌ كرد خۆیان به‌دوور بگرن له‌ قسه‌وباس و هه‌واڵی ساخته‌ كه‌ له‌ سه‌رچاوی فه‌رمییه‌وه‌ نه‌بن.

ئەم بابەتەت بەدڵە؟
0
نەخێر
0 كۆمێنت
رێوشوێنەکانی کۆمێنت نوسین