https://diyaruna.com/ckb/articles/cnmi_di/features/2019/07/31/feature-01

×
×
ئابوری |

عێراق هەوڵی کەمکردنەوەی پشتبەستن دەدات بە وزەی هاورده‌

خالید تائی

image

نوێنەرانی حکومی و کەرتی تایبەت بەشداریده‌كه‌ن لە کۆنفرانسی "وزه‌دان به‌ عێراق"دا کە لە 10 و 11 تەمموز لە بەغدا بەسترا. [خاوەنی وێنە: وەزارەتی کارەبای عێراق]

حکومەتی عێراق ماوەیەکە کاردەکات بەرەو زیادکردنی توانای تۆڕەکانی بەرهەمهێنان و دابەشکردنی کارەبا و گازی سروشتی وەك بەشێك لە ستراتیژی خۆی بۆ باشترکردنی کەرتەکە و جوڵاندنی بەرەو سەربەخۆیی له‌ وزەدا.

بەشدارانی کۆنفرانسێكی ئەمدواییە له‌ژێر ناونیشانی "وزه‌دان به‌ عێراق"دا گوێبیستی ئەوە بوون کە دوا ئامانج بەهێزکردنی سەروەریی عێراقە بە کەمکردنەوەی پشتبەستنی بە وزەی هاورده‌، لەگەڵ هەمەجۆرکردن و بەهێزکردنی ئابورییەکەی.

نوێنەرانی حکومی و کەرتی تایبەت بەشدارییانكرد لە کۆنفرانسی "بەهێزکردنی عێراق"دا کە لە 10 و 11 تەمموز لە بەغدا بەسترا، بە سەرپەرشتی وەزارەتی کارەبا.

وەزیری نەوت، سامر غەزبان باسی لە پلانە ستراتیژییەکەی عێراق کرد بۆ گەشەدان بە پرۆژەكانی وزه‌ و پیشەسازییەکانی بەرهەهێنان و وتی ئه‌مه‌ "راکێشانی وەبەرهێنان و سوودوەرگرتن لە بەکارهێنانی تەکنەلۆژیای پێشکەوتوو" لەخۆدەگرێت.

image

یاسادانەرانی عێراق لەگەڵ نوێنەرانی کۆمپانیا ناوخۆیی و نێودەوڵەتییەکان بەشداریدەکەن لە کۆنفرانسی "وزه‌دان به‌ عێراق"دا کە لە 10 و 11 تەمموز لە بەغدا بەسترا. [خاوەنی وێنە: وەزارەتی پیشەسازی و کانزاکان]

بەگوێرەی وەزیری کارەبا، لوئەی خەتیب، نەخشەڕێگەیەك ئامادەکراوە بۆ دڵنیاییدان بە دابینکردنی کارەبا، زیادکردنی بەرهەمهێنانی وزە و باشترکردنی سیستمەکانی گواستنەوە و دابینكردنی وزه‌.

وتی ئەمە بە یارمەتی گرێبەستکارە نێودەوڵەتییەکان دەکرێت و ئاماژەیکرد بەوەی پلانەکە تەرکیزیش دەخاتە سەر "کردنەوەی دەرگای وەبەرهێنان بۆ وزەی ژینگەدۆست و نوێوه‌بوو".

ئاڵوگۆڕی بیرۆکەکان

وتەبێژی وەزارەتی کارەبا، موسعەب مودەریس وتی نوێنەرانی حکومی و نێودەوڵەتی بیرۆکەكانیان ئاڵوگۆڕکرد و تاوتوێی چەند میکانیزمێکیان کرد بۆ هاریکاری "تا داهاتوویەکی روون دابینبکەن بۆ کەرتی پیشەسازی لە عێراق".

بە دیارونای وت: "لەکاتی کۆنفرانسەکەدا، وەزارەت پلانەکان و دیدگاکانی داهاتووی خۆی خستەڕوو بۆ زیادکردنی توانای بەرهەمهێنانی کارەبا و گەشەدان بە هێڵەکان و سیستمەکانی دابینکردن و دابەشکردن."

مودەریس وتی: "دەرخستەیەکی تەواوی تواناکانی خۆمان بە یارمەتی کۆمپانیا نێودەوڵەتییەکان نیشاندا، کە 3,500 مێگاوات کارەبایە و بەرهەمی گشتیی نیشتمانیمان بەرزکردەوە بۆ 18,500 مێگاوات."

وتیشی: "پلانی زیادکردنی 11,000 مێگاواتمان هەیە بۆ تۆڕی کارەبای نیشتمانی لە ماوەی چوار ساڵی داهاتوودا بە دروستکردنی وێستگەی بەرهەمهێنانی نوێ و به‌كارهێنانی تۆڕی زیرەك."

وتی وەزارەت دەستیشیکردووە بە ئامادەکاری بۆ یەکەم گەڕی مۆڵەتی وەبەرهێنان بۆ پرۆژەکانی وزەی خۆر.

مودەریس وتی بەڵام کەرتی کارەبا "هێشتا رووبەڕووی ئاستەنگ دەبێتەوە وەك ئه‌و پێشێلکارییانه‌ی گوشاری زیاد ده‌خه‌نه‌سه‌ر تۆڕەکان و دەبنە هۆی لەدەستچوونی وزە بەڕادەیەك كه‌ دەگاتە له‌سه‌دا 60 ئاستی بەرهەمهێنان".

وتیشی: "هەوڵدەدەین ئەم پێشێلکارییانە سنوورداربکەین بە خستنەگەڕی ئۆپەراسیۆنەکانی چاودێری و بڵاوکردنەوەی هۆشیاری و کلتوری پاراستنی وزەی بەکارهێنراو."

'وزه‌دان به‌ عێراق'

ماڵپەڕی وزه‌دان به‌ عێراق [ https://poweringiraq.com/] باس لە ئامانج و بەرنامەکانی کۆنفراسەکە دەکات، لەگەڵ شێوازەکانی زاڵبوون بەسەر ئاستەنگەکاندا بۆ باشترکردنی دابه‌شكردنی کارەبا.

مودەریس وتی: "ماڵپەڕە نوێیەکە رێگەمان پێدەدات راستەوخۆ و بەخێرایی پەیوەندی لەگەڵ کۆمپانیا ناوخۆیی و نێودەوڵەتییەکان ببەستین و بانگهێشتی نوێنەرانیان بکەین بۆ ۆرکشۆپ و کۆبوونەوەکان."

ئاماژەیکرد بەوەش كه‌ ماڵپەڕەکە "پێگەیەکی گرنگە بۆ خستنەڕووی دەرفەتەکانی وەبەرهێنان و دەستڕاگەیشتن بە پێشنیار و داواکارییەکان لە نوێنەرانی کۆمپانیاکانەوە بۆ بەشداریكردن لە دەرفەتەکانی وەبەرهێنانی وزەدا."

کۆنفرانسی وزه‌دان به‌ عێراق هەوڵیدا تاوتوێی کورتهێنانی سوتەمەنی بکات، کە یەکێك لە کێشە گەورەکانی بەرهەمهێنانی کارەبایە، لەکاتێکدا حکومەت ئێستا پشتدەبەستێت بە هاوردەکردنی گازی سروشتی له‌ ئێرانه‌وه‌ بەڕادەی 28 ملیۆن مەتر سێجا له‌ مانگێكدا.

حکومەت راستەوخۆش 1,300 مێگاوات کارەبا له‌ ئێران دەکڕێت.

باڵیۆزی ئەمریکا، ماتیو تویڵەر لە وتەیەکدا لە کۆنفرانسەکە وتی: "هەبوونی کارەبای 24 کاتژمێر لە رۆژێکدا، هەموو رۆژێك، هەمەجۆریی ئابووریی عێراق زیاددەکات و دۆخی گەشەپێدانی دوورمەودا دێنێته‌ ئاراوه‌."

وتی وزه‌دان به‌ عێراق پابەندێتیی سەرەکوەزیرانی عێراق عادل عەبدولمەهدی دەردەخات بۆ زیادکردنی بەرهەمهێنانی گازی سروشتی و کارەبا، وتیشی ئەمە شیاوی تێگەیشتنە لەڕووی ئابووری و دیدگای جیۆپۆلیتیکییەوە.

هه‌روه‌ها وتی: "عێراق و خەڵکەکەی رەحمەتی سەرچاوەی زۆری سروشتییان پێبەخشراوە. گەر عێراق بەتەواوی لەڕووی وزەوە سەربەخۆ بێت، ئەمە سەروەریی عێراق بەهێزدەکات."

'قەیرانی سیاسی'

ئابووریناس سەلامە سمه‌یسم بە دیارونای وت وەزیری کارەبای عێراق ئاماژەی بەوە کردووە کە کێشەی کورتهێنانی کارەبا زیاتر قەیرانێکی سیاسیە.

وتی قەیرانەکە لەئێستادا "تێکەڵە بە کێشەی گازی سروشتی ئێران و ئەو سزایانەی بەسەر ئەو وڵاتەدا سەپێنراوە."

سمه‌یسم وتی چارەسەرەکان دەبێت باس لە گرنگیی "دروستکردنی ناوەندێك [بکەن] بۆ راکێشانی وەبەرهێنان بۆ کەرتی کارەبا و کەرتەکانی دیکەی وزە".

وتیشی دروستکردنی کەشێکی دروست بۆ وەربەهێنان، لەناوبردنی بەربەستەکان لەبەردەم گەشەپێداندا لەخۆدەگرێت، له‌وانه‌ گەڕان بەدوای رێگاكانی چارەسەرکردنی پرۆسەی كه‌ڵه‌كه‌بووی بیرۆکراسی و زاڵبوون بەسەر کێشەکانی وەك گەندەڵی و بەرتیلدا.

پسپۆڕی نەوتی عێراقی، حەمزە جەواهیری بە دیارونای وت وەزارەتەکانی کارەبا و نەوت "بەردەوامن لە پلانەکانیان بۆ وەبەرهێنان".

وتی: "دروستکردنی پێنج پاڵاوتگە لەئێستادا له‌ئارادایه‌ بۆ بەرهەمهێنانی گازی سروشتی کە له‌كاتی دەرهێنانی نەوتی خاوه‌دا دێته‌ده‌ره‌وه‌."

جەواهیری وتیشی هیوامان وایە لە 2021، عێراق بتوانێت پێداویستیی خۆی لە گاز دابینبکات بۆ بەرهەمهێنانی کارەبا نەك پشت بە هاوردە ببەستێت.

باسی لە هەوڵەکانی حکومەتی عێراقیش کرد بۆ کەمکردنەوەی لەدەستچوونی وزە تا ئەوپەڕی بە دانانی هێڵی ژێرزەمینی بۆ دابه‌شكردنی کارەبا و باشترکردنی سیستمی پارەدان بۆ رەچەتەی بەکارهێنانی کارەبا.

ئەم بابەتەت بەدڵە؟
3
نەخێر
0 كۆمێنت
رێوشوێنەکانی کۆمێنت نوسین
Captcha