هه‌واڵه‌كانی عێراق
تێرۆریزم

هێزەکانی عێراق و خێڵەکیەکان ئەمنیەتی بەعاج بەهێزدەکەن له‌ نەینەوا

خالید تائی

image

لەم وێنەیەدا کە 18 ئاب لەسەر ئینتەرنێت بڵاوکرایەوە، هێزە ئەمنی و خێلەکیەکان لە بەعاج تاوتوێی چەند شێوازێك دەکەن بۆ پاراستنی قەزاکە لە پاشماوەکانی داعش. [خاوەنی وێنە: بەڕێوبه‌رێتی پۆلیسی بەعاج]

ئەندامی ئەنجومەنی پارێزگای نەینەوا خەڵەف حەدیدی سێشەممە (21 ئاب) بە دیارونای وت هێزە ئەمنی و خێڵەکیەکان هەنگاوی ئەمنی توندیان ناوە لە قەزای بەعاج، باشوری خۆرئاوای موسڵ، دوای چەند هێرشێکی ئەمدواییەی رێکخراوی "دەوڵەتی ئیسلامی لە عێراق و شام" (داعش).

وتی: "هێزە هاوبەشەکانی سوپا و پۆلیس جێگیرکردنی چەکدارییان زیاترکردووە بۆ زامنکردنی قەزاکە بە هەماهەنگی لەگەڵ هێزی حەشدی خێڵەکی نەوادر شەممەرو خێڵەکیەکانی جوغایفی."

حەدیدی وتی چەکدارانی داعش هەوڵیاندا یەکشەممە هێرشبکەنە سەر گوندی بەسیسیە، بەڵام هێرشەکە لەلایەن هێزە ئەمنیەکان و خێڵەکیەکانەوە تێکشکێنرا، توندڕەوان ناچارکران بکشێنەوە.

وتی قەزای بەعاج یەکێکە لە گرنگترین ناوچە کارگێڕییەکانی پارێزگای نەینەوا. لە خۆرئاواوە هاوسنوورە لەگەڵ سوریا و لە باشوریشەوە، هاوسنوورە لەگەڵ ناوچەی بیابانیی باکوری خۆرئاوای ئەنبار کە ناسراوە بە فوراتی باڵا.

image

هێزەکانی پۆلیسی عێراق ئۆپەراسیۆنێکی ئەمنی لە قەزای بەعاجی پارێزگای نەینەوا ئەنجامدەدەن بۆ هەڵکوتانە سەر پاشماوەکانی رێکخراوی "دەوڵەتی ئیسلامی لە عێراق و شام" (داعش)، لەم وێنەیەدا کە 19 تەمموز لەسەر ئینتەرنێت بڵاوکرایەوە. [خاوەنی وێنە: بەڕێوبه‌رێتی پۆلیسی بەعاج]

وتیشی پاشماوەکانی داعش زۆرجار هێرشدەکەنە سەر گوندەکانی بەعاج و قەزای حەزەری هاوسێیان لە ناوچە فراوانەکانی بیابان کە خۆیان تێداشاردۆتەوە.

حەدیدی وتی: "لە دوو مانگی رابردوودا تیرۆریستان ماڵی گوندییەکانیان کردۆتە ئامانج و پێنجیان لە بەعاج کوشتووە، لەنێویاندا کوڕێکی شەش ساڵان و دایکی، لەکاتێکدا باوکی بریندار بوو."

وتیشی چوار گوندنشینیشیان لە تەل عەبتە کوشت لە حەزەر و پێش ئەوانیش حەوت شوان و جوتیاریان لە هەمان قەزا کوشت.

وتی: "لە [قەزای تەل حەزەر] خێڵەکیەکان پێداگریده‌كه‌ن لەسەر مانەوە و هێزە ئەمنیەکان بەچڕی جێگیربوون." ئاماژەیکرد بەوەش كه‌ "هێشتا پێویستی هەیە بە هێز و ئۆپەراسیۆنی سەربازیی زیاتر لە بیابان و بەدرێژایی هێڵی سنوریی سوریا لەنێو پارێزگای نەینەوا".

وتی: "ئەم ناوچە سنورییانە کە لە تەریفاوییەوە درێژدەبنەوە تا رەبیعە و چیای شەنگال پێویستیان بە ئەمنیەت و روماڵی فڕۆکەوانی زیاتر هەیە بۆ لێدان لە حەشارگەی تیرۆریستان و جێنەهێشتنی بۆشایی کە بتوانن لێیەوە دزەبکەن."

هێزە ئەمنیەکانی عێراق لە 4 حوزەیران 2017 بەعاجیان له‌ده‌ست داعش سه‌نده‌وه‌، کە گەورەترین قەزای نەینەوایه‌.

لەوکاتەوەی گیراوەتەوە، ژمارەیەکی زۆر لە خەڵکی ئاوارە گەڕاونەتەوە شوێنی خۆیان لە قەزاکە، بەجۆرێك تەنیا لەم هەفتەیەدا 500 خێزان گەڕاونەتەوە بۆ جوغایفی.

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500