شاری روتبە له‌ ئەنبار "پارێزراوە" لە دزەکردنی پاشماوەکانی رێکخراوی "دەوڵەتی ئیسلامی لە عێراق و شام" (داعش) و "لە ماوەی دوو ساڵدا هیچ دزەکردنێکی گەورەی ئەمنیی بەخۆیەوە نەبینیوە"، قائیمقام عیماد دولێمی دووشەممە (13 ئاب) بە دیارونای وت.

وتی: "هێزەکانی فیرقەی یه‌كی سوپا، هاوشان بە فەرماندەیی پۆلیسی پارێزگای ئەنبار و خێڵەکیەکان، بەرپرسن لە پاراستنی ئەمنیەتی شارەکە."

وتیشی ئەم هێزانە "بە هەماهەنگیی نزیكی یەکتر کاردەکەن بۆ پاراستنی شارەکە و شاڕێگە نێودەوڵەتیەکە کە درێژدەبێتەوە بە ئاراستەی دەروازەی ترێبڵ لەگەڵ ئەردەن و دەروازەی وەلید لەگەڵ سوریا".

دولێمی وتی: "پەرژینێکی ئەمنی هەیە بەدەوری شارەکەماندا." ئاماژەی کرد بەوەش كه‌ یەکە سەربازییەکان ئۆپەراسیۆنی رۆژانەی گەڕان ئەنجامدەدەن بەدوای پاشماوەکانی داعشدا لە بیابانی روتبە.

هه‌روه‌ها وتی: "شارەکە پارێزراوە لە هەوڵی دزەکردن و سەقامگیریی تەواوی هەیە." وتیشی هاتوچۆی هاوڵاتیان و شمەك لەسەر رێگە نێودەوڵەتیەکە "سەلامەت و ئاساییە".

وتی هەوڵە هەواڵگرییەکان دەستگیرکردنی تێرۆریستانی مەترسیداری ئاسانکردووە کە شانەی نوستوویان پێكده‌هێنا.

وتیشی: "سێ هەفتە لەمەوبەر، تیرۆریستێك کە داواکرابوو لە دادگا دەستگیرکرا دوای چاودێریکردنی وردی بە فڕۆکەی چاودێری لەوکاتەوەی لە بیابان دەرچوو تا گەیشتە شارەکە."

دولێمی وتی هێزە ئەمنیەکان چەندین هێرشیشیان ئەنجامداوە لەدژی بنکە و حەشارگەکانی داعش لە ناوچەی زەبه‌ع له‌ باشوری روتبە.

وتیشی لە 6 ئاب، کۆگایەکی تەقەمەنییان تێكشکاند لەو ناوچەیە کە "65 گوللەتۆپ، 35 گوللەهاوەن، ژمارەیەك بۆمبی دەستکرد بە قەبارەی جیاواز و چەکی یەك مەخزەن و چەند پشتێنێکی بۆمبڕێژکراو"ی تێدابوو.

سوپای عێراق پشتگیریی بنیاتنانەوە دەکات

سوپا پشتگیریی کەرتە مەدەنی و خزمەتگوزارییەکانیش دەکات وەك بەشێك لە هەڵمەتی "عێراقمان مەزنە، پێکەوە بنیاتی دەنێین"، کە لە 1 ئابەوە لە روتبە دەستیپێکردووە.

دولێمی وتی هەڵمەتەکە "بەشداریی فیرقەی یه‌كی پیادەیە بۆ پشتگیریکردنی ئیداره‌ی شارەکە لە پەیداکردنی خزمەتگوزاری گشتیدا بۆ خەڵك و چاککردنەوەی ئەو پرۆژانەی لەلایەن تیرۆریزمەوە تێكدراون".

وتیشی: "لەئێستادا سوپا یارمەتیمان دەدات مۆلیدە و تۆڕەکانی ئاوی خواردنەوە چاکبکەینەوە و ئۆتۆمبیلە تایبەتمەندەکان (شۆفڵ و تەنکەر و کرێن) بەشداریدەکەن لە پاککردنەوە و پێشکەشکردنی خزمەتگوزاریی شارەوانیدا."