هێزەکانی عێراق ئۆپەراسیۆنێکی ئەمنییان دەستپێکرد رۆژی شەممە (14 تەمموز) بۆ پاککردنەوەی ناوچەکانی فوراتی باڵا لە پاشماوەکانی رێکخراوی "دەوڵەتی ئیسلامی لە عێراق و شام" (داعش).

ئۆپەراسیۆنەکە لەژێرناوی "ئوسود جەزیرە" (شێرەکانی دوورگە)دا ئامانجێتی بگەڕێت بەدوای پاشماوەکانی داعشدا لەو ناوچانە کە لە شاڕێگەی حەدیسە-بێجییەوە درێژدەبنەوە تا سەر سنووری سوریا و بەنێو ئەنبار و نەینەوادا تێده‌په‌ڕن.

قائیمقامی قائیم، ئەحمەد دوله‌یمی، چوارشەممە (18 تەمموز) بە دیارونای وت یەکە گەورەکانی فەرماندەیی ئۆپەراسیۆنەکانی جەزیرە، یەکەکانی فریاگوزاری و خێڵەکیەکان، بەپشتگیریی هێزی ئاسمانی هاوپەیمانان، بەشداریده‌كه‌ن لە ئۆپەراسیۆنەکەدا.

وتی تائێستا ئۆپەراسیۆنەکە بۆتە هۆی دۆزینەوەی کەمپێکی داعش کە چەند عەرەبانەیەکی تێدابووە و بەتەواوی تێکشکێنراون.

"هێزەکانمان بەردەوامن لە گەڕان لە ناوچەکەدا بۆ بنکەکانی دوژمن و شوێنکەوتنی پاشماوەکانیان."

ئۆپەراسیۆنەکە بەشێكە لە هەوڵی پاراستنی سنوور لەگەڵ سوریا، کە هێزەکانی عیراق ئەمنیەتیان بەهێزکردووە بۆ رێگرتن لە دزەکردنی ئەندامانی داعش بۆ نێو خاکی عێراق.

ده‌وریه‌كانی چاودێری و روماڵکردن بەدرێژایی سنوورەکە زیادکراون.

دوله‌یمی وتی: "هەوڵێکی گەورە دراوە بۆ پاراستنی سنوورەکانی خۆرئاوای وڵات و ناوچە بیابانیەکان."

دەربارەی دۆخی ئەمنیی قائیم، دوله‌یمی وتی لەئێستادا دۆخەکە سەقامگیرە و "هەموو شتێك کۆنترۆڵکراوە".

وتی سەقامگیریی ئەمنی و خزمەتگوزاری پەرەپێدراو ئاسانکاریی كردووه‌ بۆ گەڕانەوەی خێزانی ئاوارەی زیاتر و ئاماژەیکرد بەوەی 23 خێزان لەم هەفتەیەدا گەڕاونەتەوە بۆ شارەکە.

وتیشی: "گەڕانەوەی خۆبەخشانەی خێزانە ئاوارەکان زیاددەکات چونکە لە چەند مانگی رابردوودا بەهەزاران خەڵکی ئاوارە گەڕاونەتەوە لە کەمپ و پەناگەکانەوە لە رەمادی و فەلوجە و حەبانیەوە."