ژمارەیەك بەربژێری گەنجتر هەوڵی دەسەڵات دەدەن لە نەینەوا لە هەڵبژاردنە گشتیەکانی داهاتوودا وەك دەرچوون لە كلتووری باو و هەندێكیش پێیانوایە ئەمە وزە بە پرۆسەی سیاسی و پارێزگاکە دەبەخشێت.

ئەو بەربژێرانەی ئامادەکاری دەکەن بۆ چوونە ناو پرۆسەی سیاسیەوە ویستی بەهێزی خۆیان بۆ پارێزگاکە پیشاندا تا لەسه‌روو وێرانکاریەکانی رێکخراوی "دەوڵەتی ئیسلامی" (داعش)ه‌وه‌ کاربکەن و داهاتوویەك بنیاتبنێن کە تێیدا ئاسایش و خۆشنودی باڵاده‌ستبێت.

بەگوێرەی چالاکوان، فەهد یوسف، کە یەکێکە لەو دەیان گەنجەی دانیشتوی نەینەوا کە بڕیاریانداوە خۆیان بەربژێربکەن، قۆناغی داهاتووی مێژووی پارێزگاکە پێویستی بە خوێن و چالاکی نوێ هەیە.

یوسف، 38 ساڵ، کە بڕوانامەی بەکالۆریۆسی هەیە لە زانسته‌ سیاسیەكاندا بە دیارونای وت هیواخوازە ئەو هەلەی پێبدرێت بۆئەوەی خزمەتی خەڵكی پارێزگاکە بکات.

بەربژێرانی گەنج بەزۆری نائامادەبوون لە هەڵبژاردنکانی پێشوودا لە نەینەوا.

یوسف وتی: "ئەو ئامادەنەبوونەی خەڵکی گەنج لە مەیدانی سیاسیدا کاریگەری خراپی لەسەر بارودۆخەکە هەبووە بەگشتی لە نەینەوا و دەرەنجامی سەختی هەبووە لەرووی سیاسی و ئەمنی و کۆمەڵایەتییەوە."

وتیشی ئەو زیانەی لەلایەن داعشەوە به‌ نەینەوا گه‌یه‌ندراوه‌ هانی بەربژێرە گەنجەکانی داوە لە پارێزگاکەدا بۆ ئەوەی بە هەڵوێستیاندا بچنەوە و بچنە کێبڕکێی سیاسیەوە.

رێبازی كرده‌وه‌

یوسف لیستێکی بەڵێنەکانی هەڵمەتی هەڵبژاردنی هەیە کە هیواخوازە به‌جێیانبهێنێت ئەگەر دەربچێت، لەنێویاندا "تەرکیزکردنە سەر بنیاتنانەوە و چاککردنەوەی ئەو برینانەی بەهۆی هێرشی تیرۆرستیەوە روویانداوە."

وتی: "قۆناغی داهاتوو پێویستی بە ئێمەیە تا نوسینگه‌كانمان بەجێبهێڵین و بچینە مەیدان بۆئەوەی بتوانین راستەوخۆ چاودێری هەوڵەکانی بنیاتنانەوە بکەین." ئاماژەشی دا بەوەی گەنجان "چالاکترین بەشی کۆمەڵگەن و بەباشترین شێوە گونجاون بۆ ئەنجامدانی ئەو جۆرە ئەرکانە".

وتیشی زۆر پشتیوانی پێکەوەژیان و بنیاتنانەوە دەکات وەك بڕوای پێشکەوتن و ئاماژەشی دا بەوەی "ناتوانین بگەینە ئامانجەکانمان بەبێ هەبوونی بنچینەیەکی بەهێزی ئەمنی و ئاشتی کۆمەڵایەتی".

یوسف داوایكرد کۆتایی بە گوتاری توندڕەوی و رەگەزپەرستی بهێنرێت و جەختیكرده‌وه‌ لە گرنگی "راستکردنەوە و رێگرتن لە دووبارەبوونەوەی ئەو سیناریۆیەی کە تیرۆرستان بتوانن پارێزگاکە داگیربکەن".

'ته‌وژمی گۆڕانکاری'

پارێزەر رەزوان نوعەیمی، 38 ساڵ، کە بەربژێرە لە هەڵبژاردنەکانی داهاتوودا، بە دیارونای وت هیواخوازە بتوانن بكه‌ونه‌ناو ته‌وژمێكی گۆڕانکارییه‌وه‌ کە خەڵکی پارێزگاکەی پێویستیانە.

وتیشی: "ئێمە بە قۆناغێکی تاریکدا رۆیشتووین. سێ ساڵ لە تیرۆریزم و تاریکی. ئەمڕۆ هیوادارین بە بەشداریمان لە سیاسەتدا بتوانین باشتر خزمەتی خەڵکه‌كه‌مان بکەین."

هەروەها وتی: "ئاستەنگی زۆر هەن کە دیارترینیان بنیاتنانەوەی ژێرخانی پارێزگاکە و گێڕانەوەی خەڵکی ئاوارە و بەدەستهێنانی سەقامگیرییە."

وتی ئەمە "کردنی ئاسان نیە" و ئاماژەشی دا بەوەی "ئێمە پابەندین بە سەرکەوتن بەسەر هەر کۆسپێکدا و بەدەستهێنانی ئەرکی پێویست بە گیانێکی بەکۆمەڵ و ستراتیژیەتێکی ورد".

وتیشی گرنگە هەڵبژاردنەکان ئەنجامبدرێن لە کاتی خۆیدا کە بۆ 12 ئایار دیاریکراوە.

کۆمسیۆنی باڵای هەڵبژرادنەکانی عێراق رایگەیاند داواکاری لەلایەن 6,904 بەربژێرەوە بەدەست گەیشتووە و کە پێشبڕکێ دەکەن لەسەر 329 کورسی لە پەرلەمانی عێراقدا.

لەو ژمارەیە 907 بەربژێر کێبڕکێدەکەن بۆ 34 کورسی پارێزگای نەینەوا.

کۆمسیۆنەکە کە نوسینگەی خۆی لە ئابدا لە نەینەوا کردەوە، بەربژێرەکان تۆماردەکات کە بۆ دەسەڵات بەربژێرن و تۆماری دەنگدەرانیش نوێدەکاتەوە لەگەڵ بەگەڕخستنی رێکارەکانی پەیوەست بە دەنگدان و ژماردنی ئەنجامەکان.

ئەندامی ئەنجومەنی نەینەوا، حەسەن شەبیب، بە دیارونای وت ژمارەی بەربژێرە گەنجەکان کە کێبڕکێدەکەن بۆ دەسەڵات لە هەڵبژاردنەکانی داهاتوودا "بردنەوەیەکی گرنگە بۆ پرۆسەی سیاسی".

جەختیشی کردەوە لەوەی هەڵبژاردنەکان کراوەن بۆ بەربژێرانی هەموو تەمەنێك و هەڵبژرادنیش بە تاکە رێگەی دیموکراسی دەمێنێتەوە بۆ هەموو خەڵکێك بۆ دیاریکردنی نوێنەرانیان.