خۆبەخشانی لاوی عێراقی لە پارێزگای نەینەوا ئامادەکاری دەکەن بۆ دەستپێکردنی هەڵمەتێك کە پشتگیری له‌ سەقامگیری و پێکەوەژیان دەکات لە پارێزگاکەیاندا، کە تا ئەمدواییانە بەدەست فەرمانڕەوایی رێکخراوی "دەوڵەتی ئیسلامی" (داعش)ەوە دەیناڵاند.

شەممە (23 کانونی یەکەم) 24 ژن و پیاوی گه‌نج لە هەموو تائیفەکان راهێنانێکی چوار رۆژەیان تەواوکرد لە شاری سلێمانی کە ئامادەکاری بوو بۆ هەڵمەتێکی پشتگیری، "مودافەعە"، كه‌ لەلایەن رێکخراوی مێرسی کۆرپسەوە سەرپەرشتی دەکرێت.

پیشەوەرێكی بواری میدیا و وتەبێژی هەڵمەتەکە، نور نەعیمی، چوارشەممە بە دیارونای وت هەڵمەتەکە ئامانجی بەهێزکردنی سەقامگیرییه‌ لە پارێزگای نەینەوا و سڕینەوەی ئاکامە نەرێنیەکانی قۆناغی دەسەڵاتی داعشە.

نەعیمی وتی: "وەك بەشێك لە هەڵمەتێکی یەك ساڵە، گەنجە [بەشداربووەکان] چەندین بابەت لە ئەستۆدەگرن تا بەرگرییان لێبکەن لە کۆمەڵگەکانی خۆیاندا."

وتیشی هەر بەشداربوویەك چەند بابەتێكی لەخۆگرتووە وەك قەزیەیەك بۆ بەرگریی لێکردن لە ماوەی ساڵێکدا.

هه‌ندێك له‌ بابەتەکان بریتین له‌ "ئاشتی کۆمەڵایەتی" و "چارەسەری کێشەی نێوان ئه‌ندامانی تایه‌فە و خێڵە جیاوازەکان" و "مافی ژنانی ئێزدی".

"پشتگیریی گەڕانەوەی خۆبەخشانەی ئاوارەکان" بۆ ناوچەکانی خۆیان و دابینكردنی پێداویستیەکانیان، لەگەڵ "شەڕکردن دژی گوتاری توندڕەوانە" بەشێکی دیکەن لەو قەزیانەی لەلایەن بەشداربووانی هەڵمەتەکەوە هەڵبژێردراون.

نەعیمی وتی: "گه‌نجه‌كان دەچنە ناوچە بەئامانجکراوەکان تا رووبەڕوو خەڵك ببینن لە مزگەوتەکان و پەرستگە و ناوەندە گشتیەکان، تا بتوانن پەیامەکانی خۆیانیان پێبگەیەنن وەك پشتگیرییەك بۆ ئاشتی و سەقامگیری."

وابڕیارە هەڵمەتەکە لە 7 کانونی دووەم دەستپێبکات بە کۆنفرانسێك لە موسڵ بە سەرپەرشتی حکومەتی خۆجێی نەینەوا.

وتی: "مۆڵەتی فەرمی بەدەستهێنراوە لە حکومەتی موسڵەوە بۆ دەستپێکی کار و ئاسانکاریی ئەرکه‌كانی [بەشداربووان]."

وتیشی لاوان هاوکاریی هێزە ئەمنیەکان و ئیمامی مزگەوت و رێبەرەکانی ناوچەکە دەکەن، لەوانه‌ سەرەكخێڵ و ریشسپییەکان، تا دڵنیابن لە پەیوەندییان بە خەڵکی ناوچەکەوە.