هه‌واڵه‌كانی عێراق
ئاساییش

هێزەکانی عێراق و هاوڵاتیانی موسڵ هەوڵەکان یەکدەخەن بۆ رێگرتن لە گەڕانەوەی داعش

خالید تائی

سەربازانی عێراق گەڕەکێك دەپشکنن لە موسڵ بۆ گەڕان بەدوای ئەندامانی رێکخراوی 'دەوڵەتی ئیسلامی' (داعش)دا. [خاوەنی وێنە: ده‌زگای دژەتیرۆری عێراق]

سەربازانی عێراق گەڕەکێك دەپشکنن لە موسڵ بۆ گەڕان بەدوای ئەندامانی رێکخراوی 'دەوڵەتی ئیسلامی' (داعش)دا. [خاوەنی وێنە: ده‌زگای دژەتیرۆری عێراق]

هێزەکانی عێراق پێگەکانیان قایمدەکەنەوە لە موسڵ وەك بەشێك لە گرتنه‌به‌ری زنجیرەیەك رێوشوێن بۆ بەهێزکردنی ئاسایش و رێگرتن لە رێکخراوی "دەوڵەتی ئیسلامی" (داعش) لە هەوڵدانی بۆ گەڕانەوە.

ئەو یەکە سەربازیانەی جێگیرکراون لە سەرانسەری گەڕەکەکانی شارەکەدا ئاسایش دەپارێزن "بە ئاستێکی بەرزی پیشەییانە و رێكوپێك"، ئەندامی ئەنجومەنی پارێزگای نەینەوا، بەیان جەربا بە دیارونای وت.

جەربا وتی لەوكاته‌وه‌ی رزگارکردنی موسڵ راگەیەندرا لە 10 تەمموز "ئاستێکی بەرزی ئەمنی و چالاکی سەربازی لەشارەکەدا هەیە و هەموو هەوڵەکان ئێستا جەختدەکەنە سەر سەقامگیری و رێگە خۆشکردن بۆ قۆناغی بنیاتنانەوە".

جەربا وتی هێزەکانی عێراق پێگەی خۆیان دروستدەکەن و بنکەی پۆلیس و خاڵی پشکنینیان کردۆتەوە و دەستیان بە پشکنین کردووە لە شارەکەدا.

وتیشی: "ئەوان هەواڵگری زیاددەکەن بە هەماهەنگیکردن لەگەڵ دانیشتوان بۆ دۆزینەوەی چەندین حەشارگەی داعش بۆ راوەدونانی تۆڕە نهێنیەکانی گروپەکە."

وتی هاوکات دەبێت هەوڵە ئەمنیەکان دووهێندە بکرێن لە ناوچه‌كانی دەوروبه‌ری موسڵ بۆ رێگرتن لە چەکداران لە دۆزینەوەی پێگەیەك و داوای لە هێزەکانی عێراق کرد سنوری رۆژئاوای پارێزگای نەینەوا دابخەن وەك هەوڵێك بۆ بڕینی رێگای هاتوچۆی داعش و هەوڵەکانی دزەکردنی.

پلانی دوای رزگاربوون

پەرلەمانتاری عێراقی، محەمەد نوری عابید رەببو، کە نوێنەرایەتی پارێزگای نەینەوا دەکات وتی پاراستنی خاکی ئازادکراو کەم بایەختر نیە لە شەڕی ئازادکردن، ئاماژەشیدا به‌وه‌ی كه‌ هێزەکانی عێراق پێویستە لە حاڵەتی ئامادەباشیدا بمێننەوە بۆ هەر ئاستەنگێك.

رەببو بە دیارونای وت: "هێزە ئەمنیەکان بەباشی ئامادەکراون بۆ قۆناغی دوای ئازادکردن و چەندین رێوشوێن گیراونه‌ته‌به‌ر لەو لایه‌نه‌وه‌."

له‌وانه‌ راوەدونانی ئەندامانی داعش، بەتایبەتی ئەوانەی لەگەڵ خەڵکی ئاوارە خۆیان تێکەڵکردووە کە لە شەڕ هەڵهاتون و ئەوانەی لە ناوچە نیشتەنیەکاندا خۆیان حەشارداوە.

هەروەها وتی هەنگاوی لەمجۆرە "پێویستە بۆ بنیاتنانی داهاتویەکی ئارام بۆ شارەکەدا" و ئاماژەشیدا به‌وه‌ی دانیشتوان دەبێت هانبدرێن بۆ ئەوەی خۆبەخشانە کاربکەن بۆ پاراستنی موسڵ و پەیوەندی بکەن بە ریزەکانی هێزە ئەمنیەکانەوە.

وتیشی سەرەڕای رێکارە ئەمنیەکان هەنگاوی وەك شه‌ڕكردن دژی گەندەڵی و حیزب حیزبێنە و دابینکردنی هەلی کار بۆ گەنجان گرنگن بۆ روبەڕوبوونەوەی تیرۆریزم و دابینکردنی سەقامگیری.

بەرپرسیارێتیی پاراستنی موسڵ ئێستا دەکەوێتە ئەستۆی هێزەکانی دژەتیرۆر، لیوای 15 و 16ی سوپا و پۆلیسی فیدراڵی کە پشتیوانی دابیندەکەن بۆ پۆلیسی ناوخۆ و هێزه‌ خێڵه‌كیه‌كان.

راوێژکاری ئاسایش، فازڵ ئەبو رەغیف، وتی بەشداریکردنی ئەو هێزانە "پێویستە بۆ بەهێزکردن و هێشتنەوەی سەرکەوتن" و ستایشی هێنانی "پیاوی گەنجی موسڵ بۆ ناو هێزە ئەمنیە ناوخۆییه‌كان"ی كرد.

هەروەها ستایشی ئەو هەوڵانەی کرد بۆ به‌شداریپێكردنی دانیشتوانه‌كه‌ له‌ هەوڵەکانی کۆکردنەوەی زانیاری هەواڵگریدا بۆ یارمەتیدانی رێگرتن لە دزەکردن و هێرشی داعش له‌ ئایینده‌دا.

هەروەها وتی: "موسڵ دەچێتە قۆناغێکی نوێوه‌ له‌ مێژووی خۆیدا. هەمووان بەرپرسن له‌ شه‌ڕكردن دژی به‌ڵای تیرۆریزم."

ئەم بابەتەت بەدڵە؟

0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500