پرشنگی مۆم و چراکان ناوچەی دۆڵی لالشیان لە باکوری عێراق روناککردەوە لە ئێوارەی 19ی نیسان بۆ یەکەمین جار و دوای چەندین ساڵ، بۆ پێشوازییکردن لە ساڵی نوێی ئێزدیەکان.

ئەو رۆژە بە سەدان ئێزدی لە پەرستگەی لالش لە بەعشیقە کۆبوونەوە بۆ ئاهەنگ گێڕانی ساڵی نوێیان، کە یەکێکە لە ئاهەنگە سەرەکیەکانی گروپەکە، دوور لە ستەمکاریی رێکخراوی "دەوڵەتی ئیسلامی" (داعش).

لەگەڵ زیندوکردنەوەی ئاهەنگەکەدا، کە بەهۆی داعشەوە چەند ساڵێك بوو نەکرابوو، ئێزدیەکان هەوڵیاندا بوونی خۆیان لە عێراقدا بسەلمێننەوە، وەك گروپێکی کەمینە کە بەشێكی دانەبڕاوە لە مۆزایکی کۆمەڵگەی عێراقی.

ئاهەنگەکەی ئەمساڵ سوربوونی ئێزدیەکانینیشاندا بۆ پابەندبوون بە کلتوری خۆیانەوە، سەرەڕای ئەو چەوساندنەوەیەی بەدەستی داعش چەشتبوویان.

چالاکوانی ئێزدی نازك شەمدین بە دیارونای وت ئاهەنگی ساڵی نوێ یەکەمین جار بوو لە شارەکەدا بکرێت دوای زیاتر لە دوو ساڵ.

وتی: "ئاهەنگەکە شێوازێك بوو لە بەرەنگاری، هیوا، زیندبوونەوە و زۆر لەوەش زیاتر. فیشەکێك بوو بۆ ناو دڵی ئەو گروپە تیرۆرستیە."

وتی ئێزدیەکان دەیانەوێت نیشانی جیهانی بدەن کە "گەڕاونەتەوە بۆ خاکەکەیان تا بژین و خۆشگوزەران بن".

برینە قووڵەکان ماونەتەوە

شەمدین وتی هەرچەندە ژیان گەڕاوەتەوە بۆ بەعشیقە و جارێکی دیکە ئاهەنگ دەگێڕدرێت، ئێزدیەکان هێشتا خەڵکێکی بریندارن.

وتی تیمارکردنی برینەکانیان قورس دەبێت، چونکە داعش خۆشیی لێبڕیون، ژنەکانی لاقە کردوون، منداڵەکانی راکێشاون و نیشتیمان و کەلەپوری تێکشکاندوون.

وتیشی: "تەنیا دەمانەوێت بە ئاشتی و ئارامی بژین، دوور لە شەڕ بۆ دەسەڵات و سیاسەت."

شەمدین وتی ئێزدییەکان هێشتا ئازاردەچێژن، بە ئاماژەکردن بەوەی 3,060 ژن لەلایەن داعشەوە رفێندراون، زۆرێکیان لاقەکراون و بردراون بۆ سوریا.

وتیشی داعش منداڵانی ئێزدی رفاندووە و مێشکی شۆردوونەتەوە تا شەڕبکەن بۆ گروپەکە و هێرشی خۆکوژی بۆ گروپەکە ئەنجامبدەن.

"ئەو ژنانەی لەدەست گروپە تیرۆرستییەکە رزگارکراون لە دۆخێکی مرۆیی سەختدا دەژین و پێویستیان بە راوێژکاریی دەرونیی هەیە تا یارمەتییان بدات بەرگەی ئازارەکەیان بگرن،" شەمدین وتی.

بەڕێوەبەری ناحیەی بەعشیقە زەنون یونس یوسف بە دیارونای وت دەسەڵاتی خۆجێی دڵنیایی داوە لەوەی ئێزدیەکان بتوانن ئاهەنگی ساڵی نوێی خۆیان بگێڕن.

وتی ئێستا هەموان دەتوانن بە ئارامی بژین، هیوای خواست بەوەی "هەموو تائیفە و دینەکان بتوانن ئاهەنگی بۆنە ئاینییەکانیان بگێڕن لە بەعشیقە، کە نمونەیەکی بچوککراوەی هەموو وڵاتەکەیە".

پەیامێك بۆ جیهان

دەخیل قاسم کە بەرپرسێکی باڵایە لە شەنگال وتی ئاهەنگ گێڕانی ساڵی نوێ پەیامێك بۆ جیهان دەنێرێت کە ئێزدیەکان نیشتیمانی خۆیان جێناهێڵن و وازی لێناهێنن.

بە دیارونای وت: "ئەم پەیامی ئاشتیە مانای ئەوەنیە [ئێزدییەکان] واز لە مافی خۆیان بۆ دادپەروەری دەهێنن لە بەرامبەر تیرۆستاندا و هەر تاوانێك کە بەرامبەر خاكیان کرابێت و کرابێتە سەر شەرەفیان لە شەنگال و شارۆچکە ئێزدیەکانی دیکە."

وتی ئێزدیەکان بەردەوام دەبن لە داواکردنی پاراستنی مافەکانیان لەلایەن حکومەتی عێراقی و حکومەتی هەرێمی کوردستانەوە و بەسزا گەیاندنی ئەوانەی تاوانیان لەدژیان ئەنجامداوە.

ساڵی نوێی ئێزدی ئاهەنگێکی یادکردنەوە و نوێبوونەوەیە کە رەگێکی کۆنی هەیە و هەموو ساڵێك دەکەوێتە چوارشەممەییەکی نیسانەوە.

لەکاتی ئاهەنگەکەدا، ئێزدیەکان بوخورد دەسوتێنن و چرا لە پەرستگەی لالش دادەگیرسێنن لەکاتێکدا پیاوە ئاینیەکانیان سروتی تایبەت بە بۆنەکە دەخوێننەوە.