کۆمەڵگا

خۆبه‌خشان له‌ فه‌لوجه‌ ساڵانی حوكمی داعش ده‌سڕنه‌وه‌

سه‌یف ئه‌حمه‌د له‌ ئه‌نبار

image

تیمه‌كانی پاكردنه‌وه‌ داروپه‌ردووه‌كان له‌ شه‌قامه‌كان لاده‌به‌ن، له‌كاتێكدا ورده‌وورده‌ ژیان ده‌گه‌ڕێته‌وه‌ بۆ شاره‌كه‌ دوای ده‌رپه‌ڕاندنی "دەوڵەتی ئیسلامی لە عێراق و شام" (داعش). [سه‌یف ئه‌حمه‌د\دیارونا]

هه‌ڵمه‌تێكی پاكردنه‌وه‌ی گه‌وره‌ به‌رده‌وامه‌ له‌ شاری فه‌لوجه‌ بۆ پاكردنه‌وه‌ی شه‌قامه‌كانی له‌ خۆڵ و خاشاك و داروپەردووی زیاتر له‌ دوو ساڵ حوكمی "دەوڵەتی ئیسلامی لە عێراق و شام" (داعش).

كۆمه‌ڵێك رێكخراوی مه‌ده‌نی و مرۆیی، به‌ هاوبه‌شی له‌گه‌ڵ خۆبه‌خشانی لاو له‌ فه‌لوجه‌، به‌شداریده‌كه‌ن له‌ هه‌ڵمه‌تێكی سێ مانگیدا بۆ پاكردنه‌وه‌ی شه‌قام و مه‌یدانه‌كانی شاره‌كه‌ و بۆیه‌كردنی شۆسته‌كان و چاندنی گوڵ و دره‌ختی هه‌میشه‌ سه‌وز.

ئه‌حمه‌د سه‌لام له‌ به‌ڕێوبه‌رێتی شاره‌وانیی ئه‌نبار به‌ دیارونای وت حكومه‌تی ناوخۆیی و شاره‌وانی چه‌ندین ئۆتۆمبیل و كه‌پسكه‌ری خۆڵیان دابینكردووه‌ بۆ گواستنه‌وه‌ی پاشەڕۆکان بۆ سه‌لوێنكه‌كان له‌ ده‌ره‌وه‌ی شار، له‌ پشتگیرییاندا بۆ هه‌ڵمه‌تی خۆبه‌خشیه‌كه‌.

وتی: "ئه‌مه‌ یه‌كێكه‌ له‌ گرنگترین هه‌ڵمه‌ته‌كانی لاوان و كاریگه‌رییه‌كی ئه‌رێنیی هه‌بووه‌ بۆ هاندانی ژماره‌یه‌كی زۆر له‌ دانیشتوانی فه‌لوجه‌ بۆ به‌شداریكردن تێیدا."

هه‌وڵی پێكه‌وه‌یی

یه‌كێك له‌ رێكخه‌رانی هه‌ڵمه‌ته‌كه‌، محه‌مه‌د راوی، وتی: "ئه‌م هه‌ڵمه‌تی خۆبه‌خشیه‌ به‌ به‌شداریی رێكخراوه‌ مه‌ده‌نی و مرۆییه‌كان و پشتگیریی دانیشتوانی فه‌لوجه‌ ئەنجامدرا و په‌یوه‌ندیی نیه‌ به‌ هیچ پارتێكی سیاسی یان فراکسیۆنێكه‌وه‌."

راوی به‌ دیارونای وت ئامانجی هه‌ڵمه‌ته‌كه‌ پاكردنه‌وه‌ی فه‌لوجه‌ و به‌شداریپێكردنی لاوانه‌ له‌م هه‌وڵه‌دا و پشتگیریكردنی هه‌وڵه‌كانی حكومه‌ت له‌م رووەوە.

داموده‌زگا حكومیه‌كانیش بێپشوودان كاریانكردووه‌ بۆ ده‌ستپێكردنه‌وه‌ی خزمه‌تگوزاریه‌كان و هێنانه‌دیی ئاسایش دوای ئه‌و وێرانكاریه‌ گه‌وره‌یه‌ی داعش ئه‌نجامیداوه‌.

وتیشی هێزه‌كانی عێراق ناوچه‌كانی ده‌وروبه‌ری تەپۆلکەی خۆڵوخاشاكه‌كانیان ئه‌مینكردووه‌ كه‌ له‌سه‌رتاسه‌ری شاره‌كه‌دا هەن و پشكنیویانن بۆ ته‌قه‌مه‌نی و پاشماوه‌كانی شه‌ڕ پێشئه‌وه‌ی لۆریه‌كان پاشەڕۆکان لابه‌رن.

كارمه‌ندان و كرێكارانی شاره‌وانی له‌ فه‌رمانگه‌كانی ئاو و ئاوه‌ڕۆش كیسه‌ی خۆڵی تایبه‌تییان به‌سه‌ر ماڵان و دوكانه‌كاندا دابه‌شكردووه‌ و چه‌ندین حاویه‌ی كۆكردنه‌وه‌ی خۆڵوخاشاكیشیان له‌ ده‌وروبه‌ری شاره‌كه‌ داناوه‌.

رێكخه‌رێكی تری هه‌ڵمه‌ته‌كه‌، ئیبراهیم عه‌واد جومه‌یلی، وتی: "وه‌ك به‌شێك له‌ هه‌ڵمه‌ته‌كه‌، شاره‌وانیی فه‌لوجه‌ چه‌ندین ته‌نه‌كه‌ی خۆڵیان دابینكردووه‌ بۆ دانیشتوان، هه‌ندێكیان له‌ پلاستیك و هه‌ندێكیان له‌ كانزان."

وتیشی: "لاوانی فه‌لوجه‌، پیاوماقوڵان و ته‌نانه‌ت مامۆستایان و خوێندكارانیش هه‌موو به‌شداریده‌كه‌ن له‌ پاكردنه‌وه‌ی گه‌ڕه‌كه‌كانیان و قوتابخانه‌ و ناوچه‌ گشتیه‌كاندا به‌ خۆبه‌خش." هه‌روه‌ها وتی هه‌وڵه‌كانیش به‌رده‌وامن بۆ چاكردنه‌وه‌ی چه‌ندین ده‌روازه‌ی تێكدراوی تۆڕه‌كانی ئاوه‌ڕۆ.

جومه‌یلی به‌ دیارونای وت هه‌ڵمه‌ته‌كه‌ هه‌موو فه‌لوجه‌ ده‌گرێته‌وه‌ و به‌زووترین كات هه‌ڵمه‌تی پاكردنه‌وه‌ی خۆبه‌خشانه‌ی تریش دەستپێدەکات له‌و شارانه‌ی تری ئه‌نبار كه‌ له‌ده‌ست داعش رزگاركراون.

یه‌كێك له‌ خۆبه‌خشه‌كانی هه‌ڵمه‌ته‌كه‌ی فه‌لوجه‌، ساڵح محه‌مه‌د نوعه‌یمی، وتی بونیادنانه‌وه‌ و خستنه‌وه‌گه‌ڕی خزمه‌تگوزاری و پڕۆژه‌ زیانپێگه‌یشتووه‌كان و گێڕانه‌وه‌ی ژیان بۆ فه‌لوجه‌ نابێت هه‌ر ته‌نها به‌ كۆششی حكومه‌ت بێت، به‌ڵكو ده‌بێت هه‌موو هاوڵاتیان تێیدا به‌شداربن.

نوعه‌یمی به‌ دیارونای وت: "ئه‌مڕۆ پێوویستمان به‌ هه‌موو كه‌سێكه‌ كۆببنه‌وه‌ و ناوچه‌كانمان بگه‌ڕێننه‌وه‌ بۆ ئه‌و حاڵه‌ته‌ی له‌وه‌به‌ر تێیدابوون."

سڕینه‌وه‌ی حوكمی داعش

نوعه‌یمی وتیشی: "خه‌ڵكی فه‌لوجه‌ زۆر هاوكاریی كرێكارانی هه‌ڵمه‌ته‌كه‌یان كردووه‌ و خۆڵوخاشاك و پاشەڕۆیان كۆكردۆته‌وه‌ و كۆمه‌كی ئۆتۆمبیله‌كانیان كردووه‌ لایانبه‌رن و دره‌خت و گوڵیان له‌ مه‌یدان و سه‌رشۆسته‌كان چاندووه‌."

وتی هه‌روه‌ها هه‌ڵمه‌ته‌كه‌ی فه‌لوجه‌ پێكهاتووه‌ له‌ لابردنی ئەو پۆسته‌ر و مۆنیومێنتانەی له‌ داعش به‌جێماون پێش به‌جێهێشتنی شاره‌كه‌ و بۆیه‌كردنه‌وه‌ی شۆسته‌كان كه‌ له‌لایه‌ن چه‌كداره‌كانیه‌وه‌ به‌ بۆیه‌ی ره‌ش بۆیه‌كرابوون.

دانیشتوویه‌كی فه‌لوجه‌، حه‌سه‌ن داود شه‌عبانی، 44 ساڵ، وتی هه‌ڵمه‌تی پاكردنه‌وه‌كه‌ "زۆر گه‌وره‌یه‌" و "خۆشحاڵ بووم كه‌ بینیم لاوان و پیاوان كار بۆ لابردنی خۆڵوخاشاك و ته‌نانه‌ت داروپه‌ردووی خانووه‌ روخاوه‌كانیش ده‌كه‌ن و كیسه‌ی خۆڵ دابه‌شده‌كه‌ن و جێگاكان دیاریده‌كه‌ن بۆ دانانی حاویه‌كانی كۆكردنه‌وه‌ی خۆڵوخاشاك."

وتیشی: "ئه‌م قوناغه‌ی ئێستا پێویستی به‌ هه‌ڵمه‌تی زیاتر هه‌یه‌ بۆ پاكردنه‌وه‌ و ئاوه‌دانكردنه‌وه‌ی قوتابخانه‌كان و كردنه‌وه‌ی رێگاكان و چاكردنه‌وه‌ی كونوكه‌له‌به‌ره‌كانی سه‌ر رێگا سه‌ره‌كی و لاڕێكان كه‌ به‌هۆی ته‌قینه‌وه‌ی بۆمبه‌ ده‌ستكرده‌كان و ئه‌و ته‌قه‌مه‌نیانه‌ی تره‌وه‌ دروستبوون كه‌ داعش چاندبوونی له‌ چه‌ند ساڵی رابردوودا."

هه‌روه‌ها وتی: "پێویستمان به‌ هه‌ڵمه‌تی خۆبه‌خشانه‌ی تری لاوان هه‌یه‌ وه‌ك ئه‌مه‌ی فه‌لوجه‌ و شارانی تری ئه‌نبار به‌ پشتگیریی حكومه‌تی ناوخۆ تا بتوانن ژیان بگه‌ڕێننه‌وه‌ بۆ پارێزگاكه‌."

ئەم بابەتەت بەدڵە؟
2
0 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 پیتت ماوە بینووسیت (1500 MAX)