![دانیشتوانی ره‌ققه هه‌ڵدێن له‌ده‌ست "دەوڵەتی ئیسلامی لە عێراق و شام" (داعش) به‌ره‌و شاره‌كانی باكور، عه‌ین عیسا و ته‌ل ئه‌بیه‌ز، له‌سه‌ر سنوری توركیا. [خاوەنی وێنە: هێزه‌كانی سوریای دیمۆكرات]](/cnmi_di/images/2016/11/18/6585-Syria-ISIL-IDP-700_496.webp)
له‌گه‌ڵ نزیكبوونه‌وه‌ی شه‌ڕی رزگاركردنی شاری ره‌ققه‌ی سوری، زۆر له مه‌ده‌نیه‌كان له‌وه ده‌ترسن "دەوڵەتی ئیسلامی لە عێراق و شام" (داعش) به‌كاریانبهێنێت وه‌ك قه‌ڵغانی مرۆیی و هه‌وڵده‌ده‌ن له ناوچه‌كه هه‌ڵبێن، به‌رپرسانی ناوخۆ به دیارونایان وت.
دانیشتوان ده‌ڵێن داعش چنگی له شاره‌كه گیركردووه له‌وكاته‌وه‌ی هێزه‌كانی سوریای دیمۆكرات ئۆپه‌راسیۆنه‌كه‌یان دەستپێکرد له 5 تشرینی دووه‌م، ئینته‌رنێت كه‌فێكانی داخستووه و سه‌فه‌ركردنی قه‌ده‌غه‌كردووه و خاڵی پشكنینی نوێی داناوه.
دانیشتوان وتیان له‌و كاته‌وه داعش هه‌وڵیداوه شاره‌كه له دونیای ده‌ره‌وه داببڕێت و هه‌موو میدیاكان قه‌ده‌غه‌بكات له دانیشتوانه‌كه كه 300,000 كه‌س ده‌بن.
ئه‌وانه‌ی سه‌ركه‌وتووده‌بن له هه‌ڵهاتن له ره‌ققه روبه‌ڕووی جۆرێكی تر له ته‌حه‌دا ده‌بنه‌وه، له‌گه‌ڵ هه‌ڕه‌شه‌ی سه‌ره‌تای وه‌رزی زستان و كه‌موكورتیی كۆمه‌ك بۆسه‌ر ته‌ندروستیی خه‌ڵكه ئاواره‌كه‌ی نێو كه‌مپه‌كانی عه‌ین عیسا و ته‌ل ئه‌بیه‌ز.
فه‌رمانده‌ی یه‌كینه‌یه‌كی هێزه‌كانی سوریای دیمۆكرات، عه‌بدولفه‌تاح نه‌سره‌دین، وتی: "ئاواره‌بووه‌كانی ناوچه گوندنشینه‌كانی ره‌ققه به‌زۆری به‌ره‌و عه‌ین عیسا و ته‌ل ئه‌بیه‌ز ده‌ڕۆن به رێڕه‌وه خێرخوازیه ئه‌مینه‌كاندا كه هێزه‌كانی سوریای دیمۆكرات پێكیهێناون بۆ مسۆگه‌ركردنی سه‌لامه‌تیی ئه‌و مه‌ده‌نیانه‌ی له ناوچه‌كانی داعش هه‌ڵدێن."
نه‌سره‌دین به دیارونای وت پرۆسه‌ی جموجۆڵی مه‌ده‌نیه‌كان ئاسان نیه، چونكه ده‌بێت هێزه ئه‌منیه‌كان سه‌ره‌تا ئه‌وه مسۆگه‌ربكه‌ن كه چه‌كدارانی داعش نه‌یانگرن له‌كاتێكدا هه‌وڵی ده‌ربازبوون ده‌ده‌ن.
وتی هه‌روه‌ها ده‌بێت هه‌ماهه‌نگی بكرێت بۆ ده‌رچوون و جوڵه‌یان تا دڵنیابن له‌وه‌ی له مه‌ترسیی هێرشه ئاسمانیه‌كان بۆسه‌ر داعش به‌دوورن، "به‌تایبه‌تی ئه‌گه‌ر به گروپی گه‌وره بجوڵێن".
وتیشی كاتێك ده‌گه‌نه جێگای ئه‌مین، ئاواره‌كان ده‌پشكنرێن و له ناسنامه‌یان دڵنیاده‌بنه‌وه بۆ رێگه‌گرتن له دزه‌كردنی ئه‌و ئه‌ندامانه‌ی داعش كه ده‌یانه‌وێت هه‌ڵبێن یان ته‌قینه‌وه‌ی خۆكوژی ئه‌نجامبده‌ن دژی مه‌ده‌نی یان هێزه ئه‌منیه‌كان.
وتی پاشان ده‌برێن بۆ كه‌مپه كاتیه‌كان له عه‌ین عیسا و ته‌ل ئه‌بیه‌ز له‌نزیك سنوری توركیاوه، یان كه‌مپی مه‌بروكه نزیك شاری حه‌سه‌كه.
رێكخراوه خێرخوازیه‌كان له ئاماده‌باشیدان
كارمه‌ندێكی خێرخوازی له‌سه‌ر سنوری توركیا و سوریا، ئۆجالان شه‌یخی، وتی رێكخراوه خێرخوازیه‌كان له عه‌ین عیسا و ته‌ل ئه‌بیه‌ز و حه‌سه‌كه كه‌وتوونه‌ته كار بۆ به‌ده‌مه‌وه‌چوونی ئه‌و شەپۆلی مه‌زه‌نه‌كراوه‌ی ئاواره‌بووان دوای ده‌ستپێكی ئۆپه‌راسیۆنه‌كه.
شه‌یخی به دیارونای وت: "به‌ڵام ئاماده‌كاریه‌كان هێشتا زۆر لاوازن به‌هۆی كه‌میی سه‌رچاوه به‌رده‌سته‌كانه‌وه و پێویستیی ده‌ستبه‌جێ به پشتیوانیی نێوده‌وڵه‌تی بۆ هه‌وڵه خێرخوازیه‌كان له‌به‌رتیشكی به‌رزبوونه‌وه‌ی چاوه‌ڕوانكراوی ژماره‌ی ئاواره‌كان."
وتی زیاتر له 800,000 مه‌ده‌نی له‌ناوچه‌كانی ژێرده‌ستی داعشدا ماونه‌ته‌وه و ته‌نها ده‌توانن هه‌ڵبێن بۆ عه‌ین عیسا و ته‌ل ئه‌بیه‌ز، چونكه ناوچه‌كانی ده‌وروبه‌ری وه‌ك ده‌یر زور و حه‌سه‌كه ته‌دمور و حه‌ما و ناوچه گوندنشینه‌كانی خۆرهه‌ڵات له‌ژێرده‌ستی داعش یان رژێمدان.
به‌مه‌زه‌نه‌ی شه‌یخی زیاتر له "5,000 پیاو و ژن و منداڵ، كه زۆریان هه‌ژار و جوتیارن" له ناوچه گوندنشینه‌كانی باكوری ره‌ققه‌وه ئاواره‌بوون له‌كاتی ده‌ستپێكی ئۆپه‌راسیۆنه سه‌ربازیه‌كانه‌وه.
وتی خاچی سوری كوردی چاودێریی پزیشكییان پێشكه‌شده‌كات و كارده‌كات بۆ دابینكردنی ده‌رمان و چاودێریی پزیشكی بۆ پیر و منداڵ و ئه‌وانه‌ی نه‌خۆشیی هه‌میشه‌ییان هه‌یه.
وتیشی له‌هه‌مانكاتدا رێكخراوی كۆبانی بۆ كۆمه‌ك و په‌ره‌پێدان، خۆراك و پێداویستیه سه‌ره‌تاییه‌كان دابینده‌كات بۆ ژماره‌یه‌كی زۆری ئاواره‌كان به‌هاوكاریی گروپی نێوده‌وڵه‌تیی خێرخوازانی مه‌سیحیی.
هه‌روه‌ها وتی: "گه‌وره‌ترین ته‌حه‌دا كه روبه‌ڕووی ئاواره‌كان و ئه‌وانه ده‌بێته‌وه كه په‌یوه‌ندییان به هه‌وڵه‌كانی به‌هاناچوونه‌وه هه‌یه ئه‌وه‌یه كه شەپۆلی نوێی ئاواره‌بووان هاوكاته له‌گه‌ڵ نزیكبووه‌نه‌ی زستان." وتیشی ئه‌مه پێویستی به هه‌وڵی زیاتره بۆ دابینكردنی به‌تانی، جلوبه‌رگی زستانه، ئامێره‌كانی خۆگه‌رمكردنه‌وه، سوته‌مه‌نی و ده‌رمان.
هه‌ڵهاتنی جوتیارێك
جوتیارێكی ناوچه‌كه، مه‌جید جاسم، خه‌ڵكی گوندی عه‌ریقات له ناوچه گوندنشینه‌كانی ره‌ققه، كه له كه‌مپی عه‌ین عیسا داڵده‌دراوه، وتی زۆربه‌ی خه‌ڵك كه له رۆژه‌كانی سه‌ره‌تای شه‌ڕه‌كه‌دا هه‌ڵهاتن له‌و گوند و كێڵگانه‌وه دێن له ده‌وروبه‌ری باكوری پارێزگای ره‌ققه.
جاسم به دیارونای وت خه‌ڵكه‌كه "سه‌ر به‌و كۆمه‌ڵه جوتیارانه‌ن كه پشت به كشتوكاڵ و مه‌ڕوماڵات ده‌به‌ستن".
له‌گه‌ڵ نزیكبوونه‌وه‌ی شه‌ڕه‌كه، چه‌كدارانی داعش له زۆر ناوچه كشانه‌وه و ئه‌و هه‌له بۆ دانیشتوانه‌كه هه‌ڵكه‌وت كه به‌ره‌و ناوچه ئه‌مینه‌كان هه‌ڵبێن.
جاسم وتی بارودۆخه‌كه به‌ڕاستی سه‌خته بۆ ئاواره‌بووه‌كان، "به‌تایبه‌تی دوای ئه‌و ئازارانه‌ی بۆ چه‌ندین مانگ چه‌شتوویانه به‌هۆی نه‌بوونی سه‌رچاوه‌كانه‌وه و ئه‌وه‌ی كه هه‌ندێك له‌وه‌به‌ریش له‌ژێر ئاستی هه‌ژاریدا بوون".
وتی هه‌ندێك به‌پێ هه‌ڵهاتن و ماڵ و كه‌لوپه‌له كه‌مه‌كانیان به‌جێهێشت، له‌كاتێكدا ئه‌وانه‌ی كه‌مێك باریان باشتربوو توانییان به پیكابه‌كانیان و ئامێره كشتوكاڵیه‌كانیان هه‌ڵبێن و هه‌ندێك مه‌ڕوماڵاتیش له‌گه‌ڵ خۆیان به‌رن.
جاسم وتی خۆی و ژماره‌یه‌ك خێزانی تری گونده‌كه‌ی و گونده‌كانی تری نزیكیان "ویستیان هه‌ڵبێن نه‌وه‌ك بمێننه‌وه و بكه‌ونه به‌ر ره‌حمی چه‌كدارانی داعش كه ره‌نگه به‌كاریانبهێننایه وه‌ك قه‌ڵغانی مرۆیی".
وتی هێزه‌كانی سوریای دیمۆكرات رێڕه‌وێكی ئه‌مینیان بۆ كردنه‌وه له گوندی عه‌ریقاته‌وه و رێگایه‌كی خاڵی له مینیان دیاریكرد و دڵنیابوون كه نه‌كه‌ونه به‌ر هێرشی ئاسمانی یان به‌هه‌ڵه وابزانن چه‌كدارانی داعشن و دزه‌ده‌كه‌نه ناوچه‌كه یان له ره‌ققه هه‌ڵدێن.
