هه‌واڵه‌كانی عێراق
تێرۆریزم

هێزە کوردیەکان تەبایی ئایینی دەگەڕێننەوە بۆ باکوری سوریا

وەلید ئەبولخەیر لە قاهیرە

image

شەڕڤانانی یەکینەکانی پاراستنی گەڵ (یەپەگە) خاچێک دەخەنەوەسەر گومەزی کڵێسایەکی بچوك لە شەدادی. [خاوەنی وێنە: لاپەڕەی فەیسبوکی یەپەگە]

دوابەدوای رزگارکردنی شەدادی لە پارێزگای حەسەکە لە باکوری سوریا، هێزە هاوپەیمانەکان و دانیشتوانەکە بەئاشکرا قسەدەکەن دژی پێشێلکاریە بەبەرنامەکانی "دەوڵەتی ئیسلامی لە عێراق و شام" (داعش) دەرهەق بە مەسیحیەکانی ناوچەکە.

لەپێش و لەپاش رزگارکردنی شەدادی لە شوباتی 2016، شارۆچکەکە شەڕی قورسی بەخۆوە بینی لەنێوان هێزە دیمۆکراتیەکانی سوریا و یەکینەکانی پاراستنی گەڵ (یەپەگە و یەپەژە) لەلایەك و داعشیش لەلایەکی ترەوە.

دانیشتوانی شارۆچکەکە بە دیارونایان وت کە سەرەڕای سەختیی شەڕەکان، جەنگاوەرانی هێزە میانڕەوەکانی ئۆپۆزسیۆن ئەرکی ئەوەیان گرتۆتە ئەستۆ کە فرەڕەنگیی ناوچەکە بپارزێن و پارێزگاری بکەن لە بەهاکانی تەبایی ئایینی و پێکەوەژیان.

کۆتاییهێنان بە ستەمی داعش

جەنگاوەرێکی ئەنجومەنی سەربازیی ئاسوری، فادی داود، وتی وەك بەشێك لەم هەوڵانە، شەڕڤانانی یەپەگە بەمدواییانە خاچێکیان کردەوە بەسەر یەکێك لەو کڵێسایانەوە کە داعش دایڕماندبوون.

داود بە دیارونای وت: "جیاوازینەکردن لەسەر بنچینەی نەژاد و ئایین لەلایەن ئەو هێزانەوە کە دژ بە داعش شەڕدەکەن لە ناوچەی حەسەکە لە باکوری سوریا، پێویست بەباسکردن ناکات."

وتی کڵێسای مەریەمی پاکیزە لە گوندی تەل نەسری، کڵێسای رەیان لە گوندی تەل هەرمیز و کڵێسای مار جەرجیز لە قەبر شامیە لەو کڵێسا گرنگانە بوون لەلایەن داعشەوە تێکدران یان وێرانکران.

وتیشی ئەم کڵێسایانە و زۆری تریش دەگەڕێنەوە بۆ سەردەمە دێرینەکانی مەسیحیەت و پێویستیان بە نۆژەنکردنەوەیەکی چڕوپڕە دوای تێکدان و گڕتێبەردان و وێرانکردنیان لەلایەن داعشەوە.

هەروەها وتی زۆرینەی مەسیحیەکانی ناوچەکە لەدەست چەوساندنەوەی داعش هەڵهاتوون بۆ قامیشلی و ناوچەکانی تری حەسەکە.

داود وتی: "مەسیحیەکانی ناوچەی شەدادی لەژێر ستەمی داعشدا ئەشکەنجەیەکی زۆریان چەشتووە و روبەڕوی رفاندن و باج و زەکات بوونەتەوە."

وتیشی لەپاڵ روخاندنی کڵێساکانی ناوچەکەدا، ئەندامانی داعش دانیشتوانە مەسیحیەکانیان ناچارکردووە بە پۆشینی جلوبەرگی ئیسلامی و نزیکەی 300 کەسیان رفاند، لەوانە ژمارەیەکی زۆریان لەم مانگانەی دواییدا ئازادکران.

هەروەها وتی: "ئامانجی شەڕەکانی ئێستا کۆتاییهێنانە بە ستەمکاریی داعش دژ بە دانیشتوانی ناوچەکە کە ئەم گروپە بێبەشیکردوون لە پەیڕەوکردنی ئەرکە ئایینیەکانیان."

ئەفسەرێکی یەپەگە، فەرهاد خۆجا، بە دیارونای وت: "لەو کاتەوەی داعش دەستیگرتووە بەسەر باکوری سوریا و ناوچەکانی تری سوریادا، دەستیکردووە بە ئازاردانی مەسیحەکان بەبیانوی ئەوەی کافرن."

وتی داعش کڵێساکانی ناچارکرد بە لابردنی رەمزە ئایینیەکانی وەك خاچ و وێنە و ئەیقونەکان چونکە بەگوێرەی ئەندامانی گروپەکە ئەمانە "لەلایەن ئیسلامەوە حەرامکراون".

خۆجا وتی: "ئەوەت لەیادنەچێت ناوچەکە هەرگیز گرژیی ئایینی بەخۆیەوە نەبینیوە لەنێوان دانیشتوانەکەیدا کە سەربە هەموو ئەو گروپە نەژادی و ئایینیانەن لە ناوچەی مەشریقدا [خۆرهەڵات] هەن. زۆر سروشتییە کە ئەو یەکانەی دژی داعش شەڕدەکەن رەمزە ئایینیەکان چاکبکەنەوە و بیگەڕێننەوە ئەو بارەی لەمەوبەر هەبوو."

پێکەوەژیان: رابردو و ئاییندەی سوریا

وتاربێژێکی پێشووی مزگەوتی عومەر لە حەلەب، شێخ موعاز عەبدولکەریم، کە ئێستا لە قاهیرە دادەنیشێت، وتی: "ئەو دەرەنجامانەی ئێستا دەیانبینین، وەك ئازادی بیروڕا و باوەڕی ئایینی، نمونەی باشن بۆ ئەوەی سوریای ئاییندە دەبێت چۆن بێت."

عەبدولکەریم بە دیارونای وت: "بۆ سەدان ساڵە سوریا ناسراوە بە فرەڕەنگیە نەژادی و ئایینیەکەی."

وتیشی: "مەحاڵە ئەم مۆزایکە جوانە لەناوببرێت کە تایبەتمەندیی ئەم وڵاتەیە، بۆیە هیچ مانایەکی نیە و لۆژیکی نیە گەر خەڵکی سوریا ئەو هەموو قوربانیە بدەن بە رۆح و ماڵوموڵك بۆئەوەی لەو سەردەمە تاریکانەدا بژین کە داعش دەیەوێت بیانگەڕێنێتەوە بۆی."

وتی وێرانکردنی کڵێساکان و کردنیان بە بنکەی داعش ناکرێت ببەسترێتەوە بە ئیسلامەوە. وتیشی هیچ دەقێکی ئایینی یان تەفسیرێکی شەریعە نیە پشتگیری لەم کردەوانە بکات.

هەروەها وتی: "بەپێچەوانەوە، رێوشوێنە راستەقینەکانی ئیسلام بانگەشەدەکەن بۆ پاراستنی بیناکانی ئایینە ئاسمانیە غەیرە ئیسلامیەکان و بەرگریکردن لەوانەی ئەو ئایینانە پەیڕەودەکەن."

ئەم بابەتەت بەدڵە؟

1 كۆمێنت
رێوشوێنەکانی کۆمێنت نوسین * واتە ئەم خانەیە پێویستە 1500 / 1500

Her biji ypg

وه‌ڵام بده‌ره‌وه‌