هێزەکانی عێراق رێگایەکی گرنگیان لە باشوری موسڵ لە بۆمبی دەستکرد پاککردەوە بۆ خێراترکردنی پێشڕەویی سەربازی دژ بە "دەوڵەتی ئیسلامی لە عێراق و شام" (داعش)، وەك بەرپرسانی عێراقی هەفتەی پێشوو بە دیارونایان وت.

بەرپرسەکان وتیان بەکارهێنانی رێگای 30 کیلۆمەتریی مەخمور عەوسەجە بەشێکی گرنگی ئەرکەکانی رزگارکردنی موسڵ لە دەست داعش دەبێت.

بەرپرسی راگەیاندنی فەرماندەیی ئۆپەراسیۆنەکانی نەینەوا، عەمید فیراس بەشار سەبری، وتی: "شارەزایانی ئەندازیاریی سەربازی سەر بە فیرقەی 15 لەگەڵ لیوای 37 ی زریپۆشی پیادەی سەربە سوپای عێراق توانییان رێگاکە لە تەقەمەنیەکان پاکبکەنەوە کە قەزای مەخمور و گوندی عەوسەجە لە باشوری ناوچەی گەیارە بەیەکدەگەیەنێت."

ناوبراو بە دیارونای وت زیاتر لە 800 بۆمبی دەستکرد پوچەڵکرانەوە کە لەلایەن داعشەوە چێنرابوون.

وتی: "هەموو بۆمبە دەستکردەکانمان لابرد و ئێستا رێگاکە ئەمینە، بەڵام ئەرکەکەمان لێرەدا کۆتایی نایەت. دەبێت بۆمبی دەستکردی زیاتر پوچەڵبکەینەوە و ماڵی بۆمبڕێژکراوی تریش پاکبکەینەوە لەکاتێکدا بەرەو باکور و موسڵ پێشڕەوی دەکەین."

وتیشی: "تەنها چەکی داعش لەئێستادا چاندنی تەقەمەنیە بۆ رێگرتن لە پێشڕەویکردنی یەکە سەربازیەکان پاش ئەوەی توانای بەرگریکردن و روبەڕوبوونەوەی سەربازەکانمانیان نەماوە."

هەروەها وتی: "پاککردنەوەی ئەم رێگایە پێشڕەوییەکی نەوعی ترە لە زنجیرەیەك سەرکەوتن لەلایەن هێزەکانمانەوە."

وتی سەرکەوتنانەش بریتیبوون لەرزگارکردنی زۆر گوند لە باشوری موسڵ و ئاماژەشی بەوە دا کە لە رۆژی 19 تەمموز هێزەکانی عێراق عەوسەجەیان رزگارکرد "دوای شەڕێکی قورس کە تیایدا تیرۆریستەکان زیانی سەختیان لێکەوت".

وتی ئەمە پێشڕەویی سەربازی بەرەو موسڵ بەهێزتر دەکات، لەکاتێکدا هێزەکانی عێراق هەموو ناوچە رزگارکراوەکان بەتەواوی لە دزەکردن و هەڕەشەکانی داعش دەپارێزن.

هەروەها وتی: "هێزەکانمان دەسەڵاتی تەواویان بەسەر ئەو ناوچانەد هەیە کە رزگاریدەکەن و داعش توانای گرتنەوەی تەنها بستێکیشی لە خاکی رزگارکراو نەماوە چونکە بەتەواوی تێکشکاوە لەسەردەستی سەربازە قارەمانەکان."

وتیشی لەوەتی ئۆپەراسیۆنی رزگارکردنی موسڵ دەستی پێکردووە لە مانگی ئازارد، لانیکەم 1,600 چەکداری داعش کوژراون و سەدان ئۆتۆمبیل و چەك و عەمباری کەلوپەلی دوژمن تێکشکێنراون.

جوڵە بەرەو ناوجەرگەی موسڵ

ئەندامی ئەنجومەنی پارێزگای نەینەوا، عەبدولڕەحمان وەکاع، بە دیارونای وت کە دوای رزگارکردنی فڕۆکەخانەی سەربازیی گەیارە، هێزەکانی عێراق تەرکیزیان خستەسەر رێگای مەخمور عەوسەجە کە بەرەو ناوچەی گەیارە دەچێت.

وەکاع وتی رێگاکە مینڕێژکرابوو، بۆیە هێزە سەربازیەکان رێگایەکی تری خۆڵیان بەکاردەهێنا تا بەرەو ناوچەکانی ژێردەستی داعش بکشێن.

وتیشی: "ئێستا رێگاگە لە تەقەمەنی پاککراوەتەوە و کراوەتەوە وەك رێڕەوێکی سەرەکی بۆ یەکە [سەربازیە]کان. گوندەکانی سەر رێگاکەش لەنێوان مەخمور و ناوچەکانی دەرەوەی گەیارە هەموو ئەمینن و ژمارەیەکی پێویست هێزی سەربازی و پۆلیسی ناوخۆییان لێیە."

هەروەها وتی: "لەئێستادا لەگەڵ هێزە سەربازیەکان و لایەنە حکومیەکان لەگفتوگۆداین بۆ دەستپێکردن بە گەڕانەوەی ئاوارەکان بۆ ئەم گوندانە."

وەکاع وتی ئەوگوندەکان بریتین لە مەهانە، خەربەردان، کەپرۆك و حاج عەلی لەسەر رۆخی رۆژهەڵاتی روباری دیجلە کە ئێستا دوورن لە مەودای تەقەی داعش.

وتی: "لەناوخۆشدا هەوڵدراوە ئاو و کارەبا و خزمەتگوزاریە سەرەتاییەکان بۆ ئەو گوندانە بگەڕێنرێنەوە و هیوادارین هەموو دانیشتوانەکانیان بگەڕێنینەوە کە زۆربەیان لە کەمپێکی ئاوارەکاندان لە دیبەگە لە قەزای مەخمور."

هەروەها وتی ئۆپەراسیۆنەکانی رزگارکردن بەردەوامن لە ناوچەکانی بەری رۆژئاوای دیجلە و هێزە چەکدارەکان لەئێستادا دەرگیری شەڕێکی سەختن لەو ناوچانەدا بۆ هەڵکوتانە سەر ناوچەی گەیارە لە باشورەوە.

ئەندامی ئەنجومەنی پارێزگای نەینەوا، عەلی خزەییر بە دیارونای وت: "نابێت هەل بدرێت بە تێرۆریستان هەناسەبدەن و دەبێت فشارێکی زۆریان بخەینەسەر."

وتی: "دەبێت هەلی ئەم لاوازییەی ئێستای ئەندامانی داعش بقۆزینەوە و هێرشیان بکەیەنەسەر و تواناکانیان بنەبڕبکەین تا ناوچەکانی تریش رزگاربکەین لە دەوروبەری موسڵ و بەرەو ناوجەرگەی شارەکە بکشێین."

خوزەییر وتیشی: "داعش ئەمڕۆ روبەڕوی بەرەنگارییەکی جەماوەری دەبێتەوە لە موسڵدا و رۆژەکانی ژمێردراون."